Sinklinal

Sinklinal (yun. synklino — egilaman), sinklinal burma — choʻkindi va vulkanogen choʻkindi qatlamlarning botiq burmali strukturasi; egilgan qatlamlarning qabariq tomoni pastga qaragan boʻladi. S. strukturalar togʻ hosil boʻlish jarayonida tektonik harakatlar natijasida togʻ jinslari qatlamlarining burmalanishidan hosil boʻladi. S. yadrosi (markazi), asosan yosh qatlamlardan iborat. Strukturaning qarama-qarshi qanotlaridagi qatlamlarning yotishi S. markaziga yoʻnalgan boʻladi. S.ning botiqlik darajasi mazkur strukturani toʻldirib turuvchi togʻ jinslari qatlamlarining qalinligiga muvofiqdir. Koʻpgina qazilma boyliklar S. bilan bogʻlik. Qavariq tomoni pastga qaragan S. burmalar antiklinallar bilan almashinib keladi.