Shohjaxon Sobirov
| Shohjaxon Sobirov | |
|---|---|
| Sobirov Shohjaxon Gʻanijon oʻgʻli | |
_28.jpg) | |
| Fuqaroligi |
 Oʻzbekiston |
| Kasbi | dasturchi, muhandis-innovator, vikipediyachi |
| Faoliyat yillari | 2019-yildan |
| Millati | oʻzbek |
| tashkilot(s) | Yoshlar ishlari agentligi, Oʻzbekcha Vikipediya |
| Mukofotlari |
„Yil talabasi – 2022“ (respublika bosqichi gʻolibi) „Oʻzbekiston uchun 100 gʻoya“ gʻolibi „Mirzo Ulugʻbek vorislari“ tanlovi gʻolibi |
Sobirov Shohjaxon Gʻanijon oʻgʻli (2001-yil 18-may, Pop tumani, Namangan viloyati, Oʻzbekiston) — oʻzbekistonlik dasturchi, ixtirochi-innovator va jamoat faoli. Oʻzbekcha Vikipediya interfeys administratori hamda Yoshlar ishlari agentligi tomonidan oʻtkaziladigan „WikiMarafon“ loyihasi rahbari. „Yil talabasi – 2022“ tanlovining respublika bosqichida „Yilning eng faol ixtirochi-innovatori“ nominatsiyasi gʻolibi.
Tarjimai holi va taʼlimi
Shohjaxon Sobirov 2001-yil 18-mayda Namangan viloyatining Pop tumanida tugʻilgan. Millati — oʻzbek.
2008–2019-yillarda Pop tumanidagi 10-sonli ixtisoslashtirilgan davlat umumtaʼlim maktabida tahsil olib, uni aʼlo baholar bilan tamomlagan.
2019-yilda Namangan muhandislik-qurilish institutining Energetika va sanoatni axborotlashtirish fakultetiga talabalikka qabul qilingan va 2023-yilda bakalavriat bosqichini muvaffaqiyatli tamomlagan.
2024-yilda Toshkent davlat texnika universitetining Elektronika va avtomatika fakulteti magistratura bosqichiga davlat granti asosida oʻqishga qabul qilingan.
Faoliyati va yutuqlari
Shohjaxon Sobirov talabalik davridanoq axborot texnologiyalari, energetika samaradorligi va dasturiy taʼminot sohasida qator loyihalarni amalga oshirib kelmoqda.
Ilmiy-amaliy va innovatsion loyihalari
- Muallifligidagi „Elektr energiya tejovchi“ loyihasi uchun 60 million soʻm miqdorida grant yutib olingan va ushbu loyiha amaliyotga joriy etilgan.
- Jamoaviy ilmiy loyihasi Oʻzbekiston Respublikasi Favqulodda vaziyatlar vazirligi tomonidan 400 million soʻm miqdorida moliyalashtirilgan.
- IT-Parkning Namangan viloyati filiali bilan hamkorlikda 7 ta loyihasi moliyalashtirilgan boʻlib, u ishlab chiqqan ilovalar Google Play Store platformasida joylashtirilgan.
- Oʻzbekiston Respublikasi Adliya vazirligi tomonidan uning 6 ta dasturiy taʼminotiga mualliflik huquqi guvohnomalari berilgan.
- 20 dan ortiq ilmiy maqolalar hamda 4 ta oʻquv-uslubiy qoʻllanma muallifi hisoblanadi.
Ijtimoiy faoliyati va tanlovlardagi ishtiroki
- Oʻzbekiston Respublikasi Prezidenti huzuridagi Davlat xizmatini rivojlantirish agentligi qoshidagi „Kelajak liderlari“ klubi aʼzosi.
- „Yil talabasi – 2022“ tanlovining respublika bosqichida „Yilning eng faol ixtirochi-innovator talabasi“ nominatsiyasi boʻyicha 1-oʻrinni egallagan.
- Namangan viloyati IT-Park tomonidan oʻtkazilgan „Ideathon“ tanlovida 2-oʻrinni qoʻlga kiritgan.
- IT-Park tashkil etgan „Best startup project“, Innovatsion rivojlanish vazirligi tomonidan oʻtkazilgan „Mirzo Ulugʻbek vorislari“ hamda „Oʻzbekiston uchun 100 gʻoya“ tanlovlari gʻolibi boʻlgan.
- „Oʻzbekiston yoshlari forumi – 2021“ doirasida yoshlar elchisi sifatida qatnashgan va ilgari surgan tashabbuslari «Top-200» talikka kirib, maxsus sertifikat bilan taqdirlangan.
Vikipediyadagi faoliyati
Shohjaxon Sobirov Oʻzbekcha Vikipediyani rivojlantirish va boyitishda faol ishtirok etib keladi:
- Oʻzbekiston Respublikasi Yoshlar ishlari agentligi tomonidan tashkil etilgan „WikiStipendiya marafoni“ning 1-mavsumida 2-oʻrinni egallab, 40 million soʻm pul mukofoti bilan taqdirlangan.
- „WikiStipendiya marafoni“ doirasidagi „Wikioromgoh“ loyihasining 2-mavsumida „Eng yaxshi tahrirchi“ nominatsiyasi gʻolibi boʻlgan.
- Hozirda „WikiMarafon“ loyihasi rahbari sifatida faoliyat yuritmoqda.
Uning faoliyati MTRK tizimidagi „Oʻzbekiston“, „Oʻzbekiston 24“, „Yoshlar“ telekanallari hamda bir qator markaziy matbuot nashrlarida yoritilgan.
Ilmiy ishlari va qoʻllanmalari
- 20 dan ortiq ilmiy maqolalar (respublika va xalqaro ilmiy jurnallarda);
- 4 ta oʻquv-uslubiy qoʻllanma;
- 6 ta elektron hisoblash mashinalari (EHM) uchun dasturiy taʼminot guvohnomasi.