Sariq (qishloq)

Sariq — Qashqadaryo viloyati, Muborak va Mirishkor tumanlaridagi qishloq. Sariq — umumturkiy etnonim bo‘lib, turkman, qozoq, qirg‘iz, boshqird, qoraqalpoq va o‘zbeklar tarkibida qabila, urug‘ yoki urug‘ tarmog‘ini bildiradi. Quyi Qashqadaryo turkmanlarining sariq/sarig‘/sari urug‘i mavjud. Qishloq nomlari etnonimdan hosil bo‘lgan. Qo‘ng‘irotlar qo‘shtamg‘ali bo‘limining qorag‘ursoq urug‘i tarmog‘i — sariq. Janubiy Tojikiston laqaylarida sorichol urug‘i, sori, sorimraz va sorimbachcha patronimlari mavjud. Qatag‘onlarning ham sari/sori, sariqatag‘on va saribosh qatag‘on urug‘i borligi ma’lum. Mang‘it, Batosh va boshqa urug‘ hamda qabilalarning sari/sariq/sarig‘ urug‘i mavjud bo‘lgan. Sariq so‘zi yirik qabila nomlariga ham qo‘shilgan: Sari Uyshun, Sari Uyg‘ur, Sari Nayman, Sari Qipchoq, Sari Qangli, Sari Qirg‘iz, Sari No‘g‘ay. Sari leksemasi yirik etnik birliklarning urug‘i (qabilasi) yoki undan kichik bo‘limi, tarmog‘ini bildirgan. Etnonim totem asosida yuzaga kelgan. Tatar tilida sarik — qo‘y, sarikchilik — qo‘ychilik. V.V. Radlov lug‘atida sarik — qo‘y.