Salima Rahmon
| Salima Rahmon | |
|---|---|
| Tavalludi |
1991-yil yoki 1992-yil |
| Fuqaroligi |
 Pokiston |
| Taʼlimi | Rawalpindi tibbiyot universitet |
| Kasbi | shifokor |
Salima Rahmon (1991-yil yoki 1992-yil, Svabi, Xaybar Paxtunxva, Pokiston) – Pokistonda yashovchi afgʻonistonlik qochqin shifokor. Turkman millatiga mansub birinchi afgʻon ayol shifokori[1].
Tarjimayi holi
Salima Rahmon 1991-yil yoki 1992-yilda 1979-yilda sovet-afgʻon urushi paytida ota-onasi Afgʻonistondan qochib ketganidan keyin Pokistonning Xaybar Paxtunxva viloyati, Svabi shahridagi qochqinlar lagerida tugʻilgan. Millati turkman. Katta bobosi ham qochqin boʻlgan, 1917-yilda rus inqilobi paytida Turkiston muxtoriyatidan shimoliy Afgʻonistonga qochib kelgan[1]. Salimaning onasida tugʻuruq jarayoni qiyin kechgan va tibbiy yordam cheklangan, shuning uchun chaqaloqning tirik qolishiga umid yoʻq boʻlgan. Mardikor boʻlgan otasi Abdul, agar qizi tirik qolsa, unga taʼlim olishi va shifokor boʻlishiga yordam berishga qaror qiladi[1][2][3]. Salima Islomobod yaqinidagi Attok shahridagi boshlangʻich maktabda oʻz sinfidagi qochqin qizlarning biri boʻlgan va qochqin sifatida oliy taʼlimga oʻtishga qiynalgan, ammo oxir-oqibat 2009-yilda Rawalpindi tibbiyot universiteti tomonidan qochqinlar uchun ajratilgan yagona oʻrinni qoʻlga kiritadi. Ayollarning turmushga chiqish va gilam toʻqishdan boshqa narsa qilmaslik degan anʼnaviy qarashlarga qarshi Salima taʼlim olishni davom ettirib, koʻplab qiyinchiliklarni boshidan kechirgan[2][3]. Salimaning birinchi ishi Ravalpindidagi „Muqaddas oila“ shifoxonasi boʻlgan boʻlib, shifoxonadagi davolanayotgan bemorlar orasida qochqinlar ham, mahalliy aholi ham bor boʻlgan. Keyinroq Salima ginekologiya boʻyicha mutaxassis boʻlishga qaror qilib, „Muqaddas oila“ shifoxonasida qochqinlar uchun mavjud boʻlgan yagona oʻquv joyini qoʻlga kiritadi. Oʻqishi davomida shifoxona COVID-19ga qarshi kurashish markaziga aylangan va Salima koronavirusdan aziyat chekib, farzand koʻrgan ayollar bilan ishlagan. Oʻz mutaxasisligiga ega boʻlgach, Salima qochqin maqomi tufayli amaliyot litsenziyasini olishda bir qancha qiyinchiliklarga duch kelgan, lekin 2021-yil iyun oyida Salima nihoyat Attokda xususiy klinika ochishga muvaffaq boʻladi. Klinika qochqin ayollarni bepul parvarishlash xizmatini koʻrsatadi. Salima Rahmon Afgʻonistondagi turkmanlardan chiqqan birinchi ayol shifokor sifatida shuhrat qozongan[1][3][4]. 2022-yil yanvar oyida Salima Birlashgan Millatlar tashkilotining Afgʻoniston va uning hududlari uchun insonparvarlik chaqiriqlari aks etgan onlayn tadbirida Bosh kotibning gumanitar masalalar boʻyicha oʻrinbosari va favqulodda yordam koʻrsatish boʻyicha koordinatori Martin Griffiths va Qochqinlar boʻyicha oliy komissar Filippo Grandi bilan birga oʻz maʼruzasini qilgan[5]. Salima Rahmon Birlashgan Millatlar tashkilotining Qochqinlar boʻyicha Oliy komissarligining 2021-yilgi Nansen mukofotining Osiyo mintaqaviy laureati boʻlgan[2][3][6]. Mukofot Salimaga 2021-yil sentyabr oyida Shveysariyaning Islomoboddagi elchixonasida Shveysariya elchisi Bénédict de Cerjat va Norvegiya muvaqqat ishlar vakili Elin Kylvåg tomonidan topshirilgan[7].
Manbalar
- ↑ 1,0 1,1 1,2 1,3 Rehman, Saleema. „I’m the First Female Afghan Refugee Doctor in My Community. I Hope More Women Can Follow in My Footsteps.“ (inglizcha). ELLE (2021-yil 4-noyabr). 2026-yil 12-martda asl nusxadan arxivlangan. Qaraldi: 2026-yil 12-mart.
- ↑ 2,0 2,1 2,2 Poirier, Marie-Claude „Afghan refugee doctor dares women and girls to dream“ (inglizcha). UNHCR (2021-yil 29-sentyabr). 2026-yil 12-martda asl nusxadan arxivlangan. Qaraldi: 2026-yil 12-mart.
- ↑ 3,0 3,1 3,2 3,3 Kumar, Ruchi. „An Afghan refugee girl grew up to be a prize-winning doc — with a little help from dad“ (inglizcha). NPR (2021-yil 5-oktyabr). 2026-yil 12-martda asl nusxadan arxivlangan. Qaraldi: 2026-yil 12-mart.
- ↑ Mehmood, Arshad „Afghan Refugee Doctor Serves Pakistan’s Poorest“. The Media Line (2020-yil 13-aprel). 2026-yil 12-martda asl nusxadan arxivlangan. Qaraldi: 2026-yil 12-mart.
- ↑ „Daily Noon Briefing Highlights: Afghanistan“ (inglizcha). United Nations Office for the Coordination of Humanitarian Affairs (2022-yil 7-yanvar). 2026-yil 12-martda asl nusxadan arxivlangan. Qaraldi: 2026-yil 12-mart.
- ↑ „Nansen Refugee Award: Meet the 2021 UNHCR Nansen Refugee Award Regional Winners“ (inglizcha). UNHCR. 2026-yil 12-martda asl nusxadan arxivlangan. Qaraldi: 2026-yil 12-mart.
- ↑ „Dr Saleema Rehman wins UNHCP Nansen Award“. Pakistan Observer (2021-yil 29-sentyabr). 2026-yil 12-martda asl nusxadan arxivlangan. Qaraldi: 2026-yil 12-mart.