Salamanka universiteti

Asos solingan sanasi	1218-yil

Salamanka universiteti - Yevropadagi qadimgi universitetlardan biri. 1218-yil Ispaniyaning Salamanka shahrida tashkil topgan. Oʻrta asrlar va Uygʻonish davrida Bolonya, Parij, Oksford universitetlari qatori Yevropadagi yirik madaniy markazlardan biri boʻlgan. Bu davrda universitetda tabiiy fanlar oʻqitilgan, arab madaniyati anʼanalari rivojlantirilgan; Ibn Sino, Ibn Rushd va boshqa mashhur olimlarning asarlari ilk bor tarjima qilingan, dastlabki ensiklopedik nashrlar tayyorlangan. Inkvizitsiya hukmronligi davri (XVI asr)da Kopernikning geliotsentrik sistemasi oʻqitilgan yagona oʻquv yurti boʻlgan. Ispaniyaning iqtisodiy tushkunligi munosabati bilan XVII asr boshlaridan, ayniqsa, XIX asrning 60y.lari Madrid universiteti ispan fanining markaziga aylangandan soʻng Salamanka universiteti mavqei pasaydi. universitet falsafa va filologiya, huquq, tibbiyot, tabiiy fanlar boʻyicha mutaxassislar tayyorlaydi. 24 mingga yaqin talaba taʼlim oladi; kutubxonasida 200 mingdan ortiq asar saqlanadi.