Risolat Haydarova

Risolat Haydarova
Tavalludi	1966-yil 6-noyabr (1966-11-06) Toshkent, OʻzSSR, SSSR
Fuqaroligi	SSSR→ Oʻzbekiston
Kasbi	Jurnalist, yozuvchi, tarjimon

Risolat Haydarova (1966-yil 7-noyabr, Toshkent, OʻzSSR, SSSR) – taniqli oʻzbek yozuvchisi, jurnalisti. Tarixiy yoʻnalishdagi bir qancha asarlar muallifi. 2014-yildan O‘zbekiston Yozuvchilar uyushmasi a’zosi. “Shuhrat “ medali (2021), Odil Yoqubov nomidagi xalqaro mukofot (2025) sohibasi.

Hayoti

Risolat Haydarova 1966-yil 7-noyabr kuni Oʻzbekiston SSR tarkibidagi Toshkent shahrida tugʻilgan. Oʻrta taʼlimni tugatgach, 1984-yilda Toshkent davlat universiteti (hozirgi Oʻzbekiston Milliy universiteti)ning jurnalistika fakultetiga oʻqishga qabul qilinadi. Oliygohni 1989-yil muvaffaqiyatli tamomlaydi.

Mehnat faoliyati

Oʻz faoliyatini dastlab Oʻzbekiston televideniyesida muharrir sifatida boshlaydi (1989-2005). Keyin „Poytaxt“ radiosining xalqaro axborot boʻlimida tarjimon, muallif va boshlovchi boʻlib ishlaydi (2005-2008). 2008-yilda „Region.uz“ axborot sayti va gazetasida mas’ul kotib, „UzReport.com“ biznes xabarlar portalida tarjimon boʻlib bir muddat faoliyat yuritadi. 2010-yilgacha „Sharq biznes xabarnomasi“ gazetasida mas’ul kotib boʻlib ishladi. 2010-yildan 2011-yilgacha Oʻzbekiston auditorlar palatasida jamoatchilik bilan aloqalar boʻlimi rahbari, matbuot kotibi lavozimida faoliyat olib bordi. 2011-yildan 2013-yilgacha „Oʻzenergosozlash“ unitar korxonasida tarjimon sifatida ishladi. 2014-2018 yillarda „Sharq yulduzi“ va „Zvezda Vostoka“ jurnallari birlashgan tahririyatida muharrir, keyin nasr boʻlimi boshligʻi sifatida faoliyat yuritgan. Ayni paytda Oʻzbekiston Yozuvchilar uyushmasining Xalqaro aloqalar va badiiy tarjima boʻlimida ishlab kelmoqda.

Tarjimonlik faoliyati

Risolat Haydarova yozuvchilikdan tashqari, tarjimonlik faoliyati bilan ham shugʻullangan. XX asr serb, xorvat, sloven, rus, belorus, shuningdek, O‘zbekistonda yashab ijod qilayotgan rusiyzabon yozuvchilarning asarlarini, jumladan, Nobel mukofoti sovrindorlari Ivan Bunin (“Xilvat xiyobonlar”), Ivo Andrich (“Drina ko‘prigi”), Aleksandr Soljenitsin (“Ivan Denisovichning bir kuni”) asarlarini, shuningdek, belorus yozuvchisi Vladimir Korotkevichning “Ko‘hna afsona”, belorus bolalar yozuvchisi Ales Karlyukevichning “Shuburshun va uning do‘stlari” qissalarini, toshkentlik adiba Galina Dolgayaning “Yugurik suvlar qo‘shig’i” romani, “Sohibqiron” nasriy triptixi, serb yozuvchisi Miodrag Jurjevich, makedon yozuvchisi Dimitar Solyev, xorvat yozuvchisi Ranko Marinkovich, turk yozuvchisi Umar Sayfiddin hikoyalarini oʻzbekchaga oʻgirgan.

Ijodi

Dastlabki hikoyalari maktab o’quvchisi bo’lgan yillarida bolalar nashrlarida chop etilgan. 1984-1989-yillarda universitetda tahsil olayotgan vaqtida hikoyalari „Oʻzbekiston adabiyoti va sanʼati“, „Turkiston“, „Toshkent oqshomi“ gazetalarida chop etilgan. 1990-yilda Respublika yosh ijodkorlarining „Do'rmon“ seminarida qatnashib, nasr yo'nalishida g'olib bo'lgan. Birinchi kitobi “Mag’rura” 2007-yilda chop qilingan. “Karantin” qissasi (2020), “G’urg’urtepada saraton” hikoyalar turkumi (2021), “”Sebzor” nasriy to’plami (2022), “Javzo” (2011), “Suyumbika” (2025) tarixiy romanlari, qator esse va adabiy maqolalari nashr etilgan. Hikoyalari turk, qozoq, rus, belorus, bolgar tillariga tarjima qilingan. Shukur Xolmirzayev nomidagi I xalqaro hikoyalar tanlovi g‘olibi (2021). Ivan Buninning “Xilvat xiyobonlar” hikoyalar turkumining o‘zbek tiliga tarjimasi uchun 2022-yilda O‘zbekiston Yozuvchilar uyushmasining “Yilning eng yaxshi tarjimasi” mukofoti, 2025-yilda tarixiy mavzudagi asarlari uchun Odil Yoqubov nomidagi xalqaro mukofot bilan taqdirlangan.