RepRap Snappy
RepRap Snappy – RepRap loyihasining bir qismi boʻlgan, ochiq manbali va qatlamli eritish usulida ishlaydigan 3D printer. U dunyodagi eng yuqori darajada oʻz-oʻzini nusxalay oladigan 3D printer hisoblanadi[1][2].
Ushbu printer RepRap loyihasining asosiy gʻoyasi boʻlgan „umumiy maqsadli va oʻzini-oʻzi koʻpaytiradigan ishlab chiqarish mashinasi“ni yaratish maqsadida ishlab chiqilgan[3]. RepRap Snappy oʻz qismlarining 73 foizini oʻzi ishlab chiqara oladi. Buning uchun loyihada 3D printerda chop etib boʻlmaydigan qismlar iloji boricha kamaytirilgan[4]. Masalan, odatda chop etib boʻlmaydigan tasmalar va podshipniklar oʻrniga maxsus tishli mexanizmlar qoʻllanilgan. „Snappy“ (shirqillovchi) nomi printer qismlarining bir-biriga shirqillab tushuvchi ulagichlar orqali biriktirilishi sababli berilgan. Bu usul yordamida kichik qismlarni birlashtirib, katta boʻlaklarni yasash mumkin. Bu esa, birinchidan, chetdan olinadigan (chop etilmaydigan) qismlarga ehtiyojni kamaytirsa, ikkinchidan, qismlarni chop etish uchun katta hajmli printer shart emasligini anglatadi. Printerning oʻzi nusxalay olmaydigan qismlari faqat motorlar, elektronika, shisha platforma va bittagina podshipnikdir. Printer oʻzi uchun kerakli barcha plastik qismlarni chop etishi uchun taxminan 150 soat vaqt sarflaydi. Oʻzining noyob dizayni va gʻoyasi sababli RepRap Snappy „Uplift Prize Grand Personal Manufacturing“ mukofotida faxriy yorliq bilan taqdirlangan[5].
Manbalar
- ↑ By „The Most Self-Replicating RepRap Yet“. Hackaday (2015-yil 12-sentyabr). Qaraldi: 2016-yil 26-iyul.
- ↑ „The Utopian Promise Of RepRap, the 3D Printer That Can—Almost—Print Itself“ (2016-yil 24-fevral). Qaraldi: 2016-yil 26-iyul.
- ↑ „RepRap - RepRapWiki“. reprap.org. Qaraldi: 2016-yil 26-iyul.
- ↑ „RepRap Snappy is the Most 3D Printable 3D Printer Yet“ (2015-yil 21-sentyabr). Qaraldi: 2016-yil 26-iyul.
- ↑ „Prize Specifications“ (en-US) (2010-yil 18-iyul). Qaraldi: 2016-yil 26-iyul.