Qodir baxshi

Qodir baxshi
Qodir baxshi
Tavalludi	Abdi Rahimov; 16-aprel 1937-yil; OʻzSSR, Dehqonobod tumani, Chalka qishlogʻi
Vafoti	29-avgust 1986-yil ; (49 yoshda); OʻzSSR, Dehqonobod tumani, Chalka qishlogʻi
Janrlar	Dostonchilik
Kasbi	Baxshi
Fuqaroligi	OʻzSSR

Ziyosferada ismi Abdi va familiyasi Rahimov boʻlgan boshqa kishilar haqida ham maqolalar mavjud.

Qodir baxshi (taxallusi; asl ismi Abdi Rahimov; 1937-yil 16-aprel – Dehqonobod tumani Chalka qishlogʻi – 1986-yil 29-avgust) – oʻzbek baxshisi.

Hayoti

Buxoro pedagogika institutini tugatgan (1966). Baxshilik sirlarini dastlab bobosi Turdi baxshidan oʻrgangan. Soʻng Umir shoir Safar oʻgʻliga shogird tushgan. 18 yoshida mustaqil dostonchi boʻlib yetishgan Qodir baxshi 1960-yillarda Qashqadaryo va Surxondaryoda, Tojikiston va Turkmanistonda yashayotgan keksa baxshilar davrasida boʻlib, ular repertuarini, doston ijrochilik mahoratini, doʻmbira chertish sanʼatini egallagan. Uning repertuari boy va rang-barang. „Alpomish“, „Yodgor“, „Kuntugʻmish“, „Shirin bilan Shakar“, „Rustam“, „Murodxon“, „Yusuf bilan Ahmad“, „Yusuf va Zulayho“, „Goʻroʻgʻlining tugʻilishi“, „Zaydinoy“, „Goʻroʻgʻli va Yunus pari“, „Shahidnoma“ singari 70 ga yaqin dostonlar, koʻplab terma va ertaklarni ijro etgan. Ammo u bilgan dostonlarning juda oz qismi va bir necha termalar yozib olingan.

Qodir baxshi faqat repertuarining boyligi bilan emas, balki yoqimli, shirador ovozi, ayniqsa, musiqa asboblarini yaxshi chala olish iqtidori bilan ajralib turgan. U doʻmbiradan tashqari, dutor, rubob, tor, gʻijjak, qoʻbizda mohirlik bilan kuylar ijro etib, doston yoxud terma aytavergan yo, aksincha, boshqa cholgʻu asboblaridagi kuylarni doʻmbirada ijro etgan. Qodir baxshi respublika baxshilar koʻrik-tanlovining 5 marta gʻolibi, Moskva (1971) va Parijda (1974) oʻtgan xalq ijodkorlari xalqaro kongresslarining laureati. Qodir baxshining „Oychinor“ (1984), „Jorxun maston“ (1989) dostonlari, „Norguloy“ dostonidan parcha va qator termalari chop etilgan. Uning nomida kinoteatr, maktab bor. Dehqonobodda uymuzeyi tashkil etilgan^[1].

Manbalar

↑ Fayl:National Encyclopedia of Uzbekistan logo.png „Qodir baxshi“, Oʻzbekiston milliy ensiklopediyasi (Q-harfi). Toshkent: „Oʻzbekiston milliy ensiklopediyasi“ Davlat ilmiy nashriyoti, 2000–2006-yillar.

Adabiyotlar

M. Murodov; A. Ergashev. Alpomishnoma, 1-kitob, 1999.

Havolalar

Bu maqolada boshqa til boʻlimlariga ishorat yoʻq.
Siz ularni topib va ushbu maqolaga qoʻshib, loyihaga yordam berishingiz mumkin.

Ushbu maqolada Oʻzbekiston milliy ensiklopediyasi (2000-2005) maʼlumotlaridan foydalanilgan.

Ushbu maqola chaladir. Siz uni boyitib, ZiyoSferaga yordam berishingiz mumkin.
Bu andozani aniqrogʻiga almashtirish kerak.

[1] Fayl:National Encyclopedia of Uzbekistan logo.png „Qodir baxshi“, Oʻzbekiston milliy ensiklopediyasi (Q-harfi). Toshkent: „Oʻzbekiston milliy ensiklopediyasi“ Davlat ilmiy nashriyoti, 2000–2006-yillar.

[1]