Qamariddin Usmonov
| Qamariddin Usmonov | |
|---|---|
| Tavalludi |
1935-yil Samarqand viloyati, OʻzSSR, SSSR |
| Fuqaroligi |
 SSSR→ Oʻzbekiston |
| Millati | oʻzbek |
| Mashhur ishlari | tarix fan darsliklari |
Qamariddin Usmonov – taniqli oʻzbek olimi, tarix fanlari doktori, professor[1]. Oʻzbekistonda xizmat koʻrsatgan yoshlar murabbiysi. Oʻzbekiston Respublikasida umumtaʼlim maktablarining 5-sinf oʻquvchilari uchun moʻljallangan „Tarixdan hikoyalar“, yettinchi va sakkizinchi sinf oʻquvchilari uchun moʻljallangan „Oʻzbekiston tarixi“ fan darsliklari muallifi. Shuningdek, oliy taʼlim muassasalari hamda akademik litsey talabalari uchun ham bir necha qoʻllanmalarni yaratgan[2][3].
Hayoti
Qamariddin Usmonov 1935-yili Oʻzbekiston SSR tarkibidagi Samarqand viloyati Forish tumani(hozirgi Jizzax viloyati hududi)da tugʻilgan. Oʻrta taʼlimni tumandagi maktablardan birida olgach, 1952-yili Jizzax davlat pedagogika universitetiga oʻqishga qabul qilinadi hamda 1956-yilda muvaffaqiyatli tamomlaydi. 1956-yildan 1961-yilgacha esa, Samarqand davlat universitetining tarix fakultetida oʻqidi. 1964-yil Toshkent xalq xoʻjaligi institutiga tarix kafedrasiga aspirantura taʼlim bosqichida tahsil olish uchun qabul qilindi.
Faoliyati
1967-yili „Injiner-texnik va iqtidorli kadrlarni tayyorlash, joy-joyiga qoʻyish va tarbiyalash (1961-1985-yillar)“ mavzusida nomzodlik dissertatsiyasini himoya qilgan. Bir necha yillar davomida, Toshkent xalq xoʻjaligi institutida turli lavozimlarda, jumladan, assistent, katta oʻqituvchi, dotsent hamda kafedra mudiri sifatida faoliyat olib borgan. 1990-yili „Oʻzbekistonda ziyoli kadrlarni shakllantirishga partiyaviy rahbarlik (1961-1985-yillar)“ mavzusida doktorlik dissertatsiyasini yoqlagan. Olimga 1991-yili professor ilmiy unvoni taqdim etilgan. Ilmiy rahbarligida 3 ta fan doktori va 3 ta fan nomzodlari ilmiy ishlarini muvaffaqiyatli ravishda himoya qilgan. Qamariddin Usmonov Oʻzbekistonda tahsil oladigan talaba va oʻquvchilar uchun nashr etilgan fan darsliklari muallifi hisoblanadi. Jumladan, 2006-yil oliy taʼlim muassasalarining „Iqtisod-moliya“ yoʻnalishi talabalari uchun ishlab chiqilgan „Oʻzbekiston tarixi“ darsligi, kollej hamda akademik litseylarda tahsil oluvchi oʻquvchilar uchun 2002-yildan 2010-yilgacha 4 marotaba nashr etilgan Oʻzbekistonning 1917-yildan 1991-yilgacha davrlarini qamrab oluvchi „Oʻzbekiston tarixi“ darsligi, 7-8-sinf oʻquvchilari uchun moʻljallangan „Oʻzbekiston tarixi“ hamda 5-sinf oʻquvchilari uchun chop etilgan „Tarixdan hikoyalar“ fan darsliklari.
Mukofotlari
Qamariddin Usmonovning uzoq yillik ilmiy izlanishlari va faoliyati hukumat tomonidan eʼtirof etilgan. „Oʻzbekistonda xizmat koʻrsatgan yoshlar murabbiysi“ faxriy unvoni bilan mukofotlangan.
Manbalar
- ↑ O'zbekiston tarixchilari. "Fan va texnologiyalar" nashriyoti, 2012 — 200-bet. ISBN 978-9944-10-811-0.
- ↑ „0 ‘ZBEKIST0N TARIXI Oliy о ‘quv yurtlari barcha bakalavr yo ‘nalishlari uchun (tarix yo'nalishidan tashqari) darslik“. n.ziyouz.com.
- ↑ „Q.Usmonov, M.Sodiqov. O'zbekiston tarixi 1917-1991“. lib.cspu.uz.