Post Tower

Post Tower
Post Tower
	; Post Tower binosi 2013-yilda
Umumiy maʼlumot
Turi	Kompaniya bosh qarorgohi
Meʼmoriy uslubi	Postmodernist
Joylashuvi	Bonn, Germaniya
Narxi	78 Million €
Egasi	DHL Group (Deutsche Post AG)
Balandligi	162.5 m (533 ft)
Texnik holati
Material	Steel, Concrete, Glass
Size	107,000 m2 (1,150,000 kv ft)
Qavatlar soni	41 Obergeschosse (Yer usti qavatlari) ; 5 Untergeschosse (Yer osti qavatlari)
Binoning ichki maydoni	7,000 m2 (75,000 kv ft)
Liftlar soni	19
Dizayn va konstruksiya
Meʼmor	Helmut Jahn
Arxitektor firma	Murphy and Jahn

Post Tower — Germaniyaning Bonn shahrida joylashgan, Deutsche Post pochta xizmatlari va DHL logistika xizmati kabi ikkita brendga ega DHL Group logistika kompaniyasining bosh qarorgohidir. Balandligi 162.5 metr (533 fut) boʻlgan ushbu bino Germaniyadagi oʻn oltinchi eng baland osmonoʻpar bino, shuningdek, Germaniyada Frankfurt am Main shahridan tashqaridagi ikkinchi eng baland bino hisoblanadi. Post Tower nemis-amerikalik meʼmor Helmut Jahn (Helmut Yan) tomonidan loyihalashtirilgan va 2002-yilda „Silver Emporis Skyscraper Award“ (Kumush Emporis osmonoʻpar bino mukofoti) bilan taqdirlangan.

Dizayn

Bino Rhein (Reyn) daryosi boʻyida, Bonndagi eski parlament hududining markazida, Deutsche Welle binosi yaqinida joylashgan boʻlib, taxminan 55 000 m² (590 000 kv fut) ofis maydoniga ega. Qurilish ishlari 2000-yil may oyidan 2002-yil dekabrigacha davom etgan boʻlib, binoning karkas qismiga 80 000 m³ (2,8 million kub fut) beton va 16 000 tonna konstruktiv poʻlat sarflangan. Binoning oʻlchamlari: balandligi — 162,5 m (533 fut), kengligi — 41 m (135 fut), uzunligi — 81,1 m (266 fut) (aylana devorlari bilan birga 86,55 m (284,0 fut)), ogʻirligi — 300 000 tonna. Bino 41 ta yuqori qavat va 5 ta yer osti qavatlaridan iborat. Minoraning egallagan maydoni (poydevori) 7 000 m² (75 000 kv fut) ni tashkil etadi. Post Tower poʻlat va shishadan iborat bino sifatida qurilgan. Bino poydevori ikkita bir-biridan siljigan doira segmentlarining bosqichma-bosqich joylashgan ikkita yarim ellips shakliga ega. Shu sababli koʻplab ofis devorlari, eshiklari va pollari va liftlari umumiy hisobda 93 000 m² (1 000 000 kv fut) hajmdagi shishadan ishlangan.

Iqlim nazorati konsepsiyasi

Tashqi qobiq va asosiy fasad oʻrtasida 120 sm (47 dyuym) boʻshliqqa ega boʻlgan ikki qavatli shisha fasad jalyuzilar (venetian blinds) orqali tartibga solinadigan tabiiy shamollatishni taʼminlaydi. Old tomondagi shimolga qaragan derazalar tekis, janubga qaragan fasaddagi shisha derazalar esa havo oqimining yaxshiroq aylanishini taʼminlash uchun bir oz qiyalik qilib ishlangan (rasmga qarang). Markazlashtirilmagan yer osti konvektori orqali tashqi havo fasadlar orasidagi boʻshliqdan soʻrib olinadi, soʻngra moʻtadillashtirilib (konditsiyalanib), ofislarga uzatiladi. Havo binoning ichki hududlariga eshiklar va yoʻlaklar orqali ham yetib boradi. Ofis havasi Sky Gardens (Osmon bogʻlari) hududiga sizib oʻtadi, u yerlarni isitadi va keyin Sky Gardens’ning sharqiy hamda gʻarbiy tomonlaridagi fasad klapanlari orqali tashqariga chiqarib yuboriladi. Ikki qavatli fasad ulkan energiya tejash imkonini beradi. Post Tower beton karkasni isitish va sovutish uchun soniyasiga 130 litrgacha (29 imp gal; 34 US gal) yer osti suvlaridan foydalanish orqali katta afzalliklarga ega boʻladi. Qolgan energiya ehtiyoji markaziy issiqlik taʼminoti tizimi, sovutish uskunalari va issiqlik nasoslariga ulanish orqali qoplanadi.

Post Tower