Polimeriya

Polimeriya (yun. polymereia — koʻp murakkablik) — genlarning oʻzaro taʼsiri tiplaridan biri. Polimeriyada bir belgining rivojlanishi bir xilda taʼsir etuvchi 2 va undan ortiq, allel boʻlmagan genlarga bogʻliq. Polimeriya 1909-yilda shved olimi [N.G. Nilson-Ele] tomonidan kashf etilgan. Xoʻjalik nuqtai nazaridan qimmatli boʻlgan belgilar masalan: gʻoʻzaning boʻyi, tola chiqimi, tola uzunligi, koʻsagining ogʻirligi, chigitining yogʻliligi va boshqa belgilari Polimeriya tipida irsiylanadi. Shartli ravishda kumulyativ va nokumulyativ Polimeriya ajratiladi. Kumulyativ Polimeriyada belgining fenotipda kuchli yoki kucheiz namoyon boʻlishi genotipda ishtirok etadigan dominant allellarning soniga bogʻliq. Miqdoriy belgilar kumulyativ Polimeriya tipida irsiylanadi. Nokumulyativ Polimeriyada belgining fenotipik namoyon boʻlishi dominant allellar soniga bogʻliq emas. Dominant belgining namoyon boʻlishi uchun genotipda birgina dominant allelning boʻlishi kifoya. Biokimyoviy darajada Polimeriya asosida belgining rivojlanishiga taʼsir qiluvchi biosintez reaksiyalari yotadi.