Patra jangi
| Patra jangi | |||||||
|---|---|---|---|---|---|---|---|
| Usmoniylar–Venetsiya urushining (1463–1479) bir qismi | |||||||
| |||||||
| Qoʻmondonlar | |||||||
Usmoniylar imperiyasi
|
Venetsiya Respublikasi
| ||||||
| Kuchlar | |||||||
| 12 000 otliq askar | 1-urush: 2000 nafar 2-urush:nomaʼlum | ||||||
Patra jangi – Venetsiya qoʻshini va Usmoniylar oʻrtasida kechgan harbiy toʻqnashuv. Jangda Usmoniylar gʻolib chiqib, Patrada ikki bor Venetsiya qoʻshinini magʻlub etgan.
Tarixi
1466-yil aprel oyi oxirida Usmoniylarga qarshi urushning ashaddiy tarafdori va himoyachisi Vettore Cappello dengiz qoʼshini bosh qoʻmondoni lavozimida Iacopo Lorendanoning oʻrnini egalladi. U 25 ta galeradan iborat flot bilan suzib chiqib, dengizdagi harakatlarni qayta boshladi. Cappello Usmoniylardan Imbros, Tasos va Samofrakiya orollarini tortib olishga muvaffaq boʻldi. Shuningdek, Afinaga muvaffaqiyatli yurish uyushtirdi, ammo Usmoniylarni yetarli darajada siqib chiqarishga muvaffaq boʻla olmadilar. Ushbu gʻalabalarga qaramay, ular urushning borishini oʻzgartira olmadi. Quruqlikda esa venetsiyaliklarning ahvoli ancha yomon edi[1][2].
Jang
1466-yil avgust oyida Sigismondo Pandolfo Malatesta ketganidan soʻng Iakopo Barbarigo quruqlikdagi qoʻshinlar qoʻmondonligini oʻz qoʻliga oldi. Barbarigo 2 000 kishilik kuchga ega edi. Venetsiyaliklar Patra shahriga hujum qilishdi. Ular shahar devorlarini qattiq oʻqqa tutishdi va devorlar tez orada qulash arafasiga kelib qoldi. Gʻalabaga juda yaqin qolgan bir paytda Usmoniylar qoʼshini sarkardasi Turahanoğlu Umar Bey 12 000 otliqdan iborat qoʻshin bilan kutilmaganda paydo boʻldi. Bu esa venetsiyaliklarni dengiz tomon chekinishga majbur qildi. Venetsiyalik askarlarning koʻpi choʻkib ketdi, kemalari ojiz holatda qoldi. Keyingi qirgʻinda 600 nafar venetsiyalik oʻldirildi va 100 nafari asir olindi. Barbarigo qoʻlga olinib, Patraga olib kelindi va qatl etildi. Asirlar esa Istanbulga olib ketilib, oʼsha yerda qatl qilindi[3][4].
Cappello bu magʻlubiyat xabarini eshitgach, bir necha kundan soʻng Patraga yetib keldi. Venetsiyaning bu jangdagi magʻlubiyati uchun qasos olishni istagan Cappello qoʻshinlarini qirgʻoqqa tushirib, Umar Beyga hujum qildi. Keyingi qonli jang Usmoniylarning gʻalabasi va venetsiyaliklarning tor-mor etilishi bilan yakunlandi. Jangda taxminan 1 200 kishi halok boʻlgan deb aytiladi. Cappello zoʻrgʻa jang maydonidan qochib qutulib, Xalkidaga yoʻl oldi. 1467-yil mart oyida u ogʼir tushkunlikda vafot etdi[5][6].