Panglima Kinta masjidi
| Masjid | |
Panglima Kinta masjidi
| |
 | |
Panglima Kinta masjidi (malaycha: Masjid Panglima Kinta) — Malayziyaning Perak shtati Ipox shahrida joylashgan masjid. 1898-yilda oʻsha paytda Kinta hukmdori (Panglima Kinta) boʻlgan Datoh Panglima Kinta Muhamad Yusuf bin Lassam tomonidan shu yili vafot etgan rafiqasi Saaida binti Chik xotirasiga bagʻishlab bunyod etilgan. 2012-yilda madaniy meros obyekti sifatida rasman roʻyxatga olingan[1].
Tarixi
Masjid majmuasi Kinta daryosi yaqinida 45,000 kvadrat fut maydonni egallagan yer uchastkasida barpo etilgan. Qurilish ishlariga 15 000 dollar mablagʻ sarflangan. Ilgari masjid mahalliy aholi orasida islom dini targʻib qilinadigan markazlaridan biri boʻlgan.
Bir necha yil oʻtgach, masjid majmuasida qoʻshimcha inshootlar barpo etilgan. Xususan, Panglima Kinta oilasi aʼzolari uchun qabriston va masjid hududida dars mashgʻulotlari oʻtkaziladigan madrasa tashkil etilgan. Keyinchalik tahorat olish joyi, binoning oʻng tomonida joylashgan „balai lintang“ nomli zal, qabriston hamda masjid xodimlari uchun turar joy ham qurilgan.
Maʼlumotlarga koʻra, Misrdan kelgan Shayx Tholji ismli ustoz shu yerda yashagan va mahalliy aholiga Qur’on oʻqishni oʻrgatishga hissa qoʻshgan. Vafotidan soʻng masjidning orqa hovlisida joylashgan Datuk Panglima Kinta oilaviy maqbarasiga dafn etilgan[2].
Masjid 2012-yilda Milliy meros departamenti tomonidan madaniy meros obyekti sifatida rasman roʻyxatga olingan[3].
Meʼmorchiligi
Panglima Kinta masjidini qurishda ishlatilgan asosiy materiallar gʻisht va ohakli suvoq boʻlib, u oq boʻyoq hamda koʻk chiziqlar bilan bezatilgan.
Mustamlaka uslubi Mugʻal va neoklassik (rim va yunon dizaynlariga asoslangan) motivlar bilan qorishgan holda, masjid toʻrtburchak shaklda, taxminan 40 metr uzunlikda va 25 metr kenglikda qurilgan. Namozxona ikki pogʻonali piramida tom bilan yopilgan kvadrat shakli bilan ajralib turadi.
Uning old tomonda ayvoni bor va ikki minora bilan oʻralgan. Uning tom chizigʻi tishli parapet (crenellated) koʻrinishida boʻlib, bu Mugʻal meʼmorchiligining ommabop belgisi hisoblanadi. Yarim doira shaklidagi arkalar ayvon va old verandani koʻtarib turadi. Gumbazchalar minoralarni tojdek bezaydi; minoralar Islomning besh ustunini ramziy ifodalash uchun besh boʻlimga ajratilgan[4].
Namozxona eng koʻpi bilan 400 kishini sigʻdira oladi, tigʻiz paytlarda, ayniqsa juma namozi vaqtida, qoʻshimcha 200 kishi yoʻlaklardan foydalanishi mumkin[5].
Galereya
-
1898-yilda qurilgan masjid
-
1928-yilda qurilgan masjid minbari
-
Oilaviy maqbara masjidning orqa tomonidagi hovlida joylashgan
-
Ipoh tarixi muzeyi
Yana qarang
Manbalar
- ↑ Suri, Muhammad Zulsyamini Sufian „Masjid Panglima Kinta semai minat pertanian bandar“. Berita Harian (2017-yil 17-oktyabr).
- ↑ Fauzi, Bennie Zie. „Jejak Masjid Perak selami keunikan seni bina“. Berita Harian (2015-yil 27-sentyabr).
- ↑ „Masjid Panglima Kinta“. Portal Masjid Malaysia.
- ↑ 4 Kinta Valley mosques. New Straits Times (2017-yil 29-iyun).
- ↑ „Masjid Panglima Kinta“. Islamic Tourism Centre.
