Oila va xotin-qizlar qoʻmitasi
O‘zbekiston Respublikasi Oila va xotin-qizlar qo‘mitasi — oila institutini mustahkamlash, xotin-qizlarning huquq va qonuniy manfaatlarini himoya qilish, gender tenglikni ta’minlash hamda xotin-qizlarni ijtimoiy qo‘llab-quvvatlash sohasida yagona davlat siyosatini amalga oshiruvchi respublika ijro etuvchi hokimiyat organidir. Qo‘mita o‘z faoliyatini O‘zbekiston Respublikasi Vazirlar Mahkamasi rahbarligida amalga oshiradi[1].
Tarixi
O‘zbekiston mustaqillikka erishganidan so‘ng, 1991-yil 27-dekabrda Termiz shahrida bo‘lib o‘tgan O‘zbekiston xotin-qizlari konferensiyasida O‘zbekiston Xotin-qizlar qo‘mitasi jamoat tashkiloti sifatida tashkil etilgan. Tashkilotning ilk raisi sifatida shoira Halima Xudoyberdiyeva saylangan.[1]
Keyinchalik qo‘mita xotin-qizlarning huquq va manfaatlarini himoya qilish, oilani mustahkamlash hamda gender tenglikni ta’minlash sohasidagi davlat siyosatini amalga oshiruvchi davlat boshqaruvi organi sifatida rivojlantirildi. O‘zbekiston Respublikasi Prezidentining tegishli farmon va qarorlari asosida uning vakolatlari kengaytirildi hamda faoliyati takomillashtirildi[1].
Faoliyati
Qo‘mita quyidagi asosiy yo‘nalishlarda faoliyat yuritadi:[1]
xotin-qizlarning huquqlari, erkinliklari va qonuniy manfaatlarini himoya qilish; gender tenglikni ta’minlashga qaratilgan davlat siyosatini amalga oshirish; xotin-qizlarning bandligi va tadbirkorligini qo‘llab-quvvatlash; ehtiyojmand oilalar va xotin-qizlarni ijtimoiy himoya qilish; oilaviy qadriyatlarni mustahkamlash; oilalardagi nizolar, ajrimlar va tazyiq hamda zo‘ravonlik holatlarining oldini olish; xotin-qizlarning ta’lim olishi va kasbiy ko‘nikmalarini rivojlantirish; xotin-qizlarning jamiyat va davlat boshqaruvidagi faolligini oshirish.[1]
Tuzilmasi
Qo‘mita markaziy apparatdan, Qoraqalpog‘iston Respublikasi Oila va xotin-qizlar qo‘mitasi, viloyatlar va Toshkent shahar hududiy boshqarmalari hamda tuman (shahar) bo‘limlaridan iborat[1].