Oʻzbekiston Konstitutsiyasining 30 yilligi
| „Oʻzbekiston Konstitutsiyasining 30 yilligi“ esdalik nishoni | |
|---|---|
| Turi | esdalik nishon |
| Taqdirlash asosi | O‘zbekiston mustaqilligini mustahkamlash, mamlakatning iqtisodiy, siyosiy, ijtimoiy, ilmiy va maʼnaviy salohiyatini yuksaltirish, mudofaa qudratini oshirish, davlat chegaralarining daxlsizligini taʼminlash, tinchlik va barqarorlikni asrashga munosib hissa qoʻshgan shaxslarni taqdirlash |
| Mamlakat |
 Oʻzbekiston |
| Holati | topshiriladi |
| Taʼsis etilgan sanasi | 2022-yil 8-noyabr |
Oʻzbekiston Konstitutsiyasining 30 yilligi — Oʻzbekiston Respublikasining Konstitutsiyasi qabul qilinganining 30 yilligi munosabati bilan 2022-yilda taʼsis etilgan esdalik nishoni. U Oʻzbekiston Respublikasi Prezidentining 2022-yil 8-noyabrdagi PF–243-son „Oʻzbekiston Konstitutsiyasining 30 yilligi“ esdalik nishonini taʼsis etish toʻgʻrisidagi farmoni bilan taʼsis etilgan. Mazkur farmon bilan esdalik nishonining nizomi va tavsifi ham tasdiqlangan.
Maqsadi
Esdalik nishoni O‘zbekiston mustaqilligini mustahkamlash, mamlakatning iqtisodiy, siyosiy, ijtimoiy, ilmiy va maʼnaviy salohiyatini yuksaltirish, mudofaa qudratini oshirish, davlat chegaralarining daxlsizligini taʼminlash, tinchlik va barqarorlikni asrashga munosib hissa qoʻshgan shaxslarni taqdirlash maqsadida taʼsis etilgan.
Shuningdek, nishon bilan millatlararo doʻstlik va totuvlikni mustahkamlash, demokratik islohotlarni chuqurlashtirish, inson huquqlari va erkinliklarini taʼminlash, adolatli fuqarolik jamiyatini barpo etish, Konstitutsiyaning jamiyat hayotidagi oʻrni va ahamiyatini targʻib qilish hamda yosh avlodni qonunga hurmat va Vatanga sadoqat ruhida tarbiyalashga hissa qoʻshgan shaxslar taqdirlangan. Nishon bilan barcha soha vakillari, mehnat faxriylari, harbiy xizmatchilar, huquqni muhofaza qiluvchi organlar xodimlari va boshqa shaxslar, shuningdek, Oʻzbekiston fuqarosi boʻlmagan shaxslar ham taqdirlanishi mumkin boʻlgan.
Koʻrinishi
Esdalik nishoni 0,25 mikron qalinlikda oltin bilan qoplangan mis qotishmasidan tayyorlangan boʻlib, diametri 34 millimetr boʻlgan doira shakliga ega. Uning umumiy balandligi 54 millimetr, qalinligi esa 2,2 millimetrni tashkil etadi. Nishonning old va orqa tomonlari chetlari qabariq doira bilan oʻralgan.
Nishonning old tomonida milliy naqshlar fonida qonuniylik va adolat timsoli boʻlgan tarozi hamda ochiq holatda tasvirlangan Oʻzbekiston Respublikasining Konstitutsiyasi ramziy aks ettirilgan. Kitob tasviri ichida balandligi 8,6 millimetr boʻlgan „30“ raqami, uning pastki qismida esa balandligi 2,5 millimetr boʻlgan „YILLIGI“ yozuvi joylashgan. Kitob ortida davlat suvereniteti va davlat chegaralarining daxlsizligini ifodalovchi milliy naqshdagi mustahkam darvoza tasvirlangan.
Nishonning aylanasi milliy naqshlar bilan bezatilgan. Yuqori qismida „OʻZBEKISTON“, pastki qismida esa „KONSTITUTSIYASINING“ yozuvlari joylashtirilgan. Yozuvlar va tasvirlar zarhal rangda boʻlib, harflarning balandligi 1,8 millimetrni tashkil etadi.
Taqdirlash
Esdalik nishoni Oʻzbekiston Respublikasi Prezidenti yoki uning nomidan vakolatli mansabdor shaxslar tomonidan tantanali vaziyatda topshirilgan. Taqdirlangan shaxslarga nishon bilan birga uning guvohnomasi ham berilgan. Nishon koʻkrakning chap tomoniga, davlat mukofotlaridan keyin taqiladi.