Oʻlmas Olloberganov

Oʻlmas Olloberganov (1971-yil 25-iyulda tugʻilgan) — taniqli oʻzbek ijrochisi va musiqachisi. Oʻzbekistonda jonli ijroning yetakchi xonandasi.

Biografiya

Oʻlmas Olloberganov 1971-yil 25-iyulda Buxoro viloyati Kogon shahrida tugʻilgan (mashhur xonanda, sozanda hamda boshlovchi). Otasi Ollobergenov Xudoyor — oliy toifalik veterinar, onasi Bozorova Toʻybibi — oliy toifali nemis tili oʻqituvchisi.

Oʻlmas Olloberganov yoshligidan musiqaga boʻlgan qiziqishi tufayli oʻrta maxsus taʼlim maktabida oʻqib yurganidanoq musiqa bilim yurtida „qashqar rubobi“ cholgʻu asbobida ham taʼlim olgan, 1990-yilda Oʻzbekiston Davlat Konservatoriyasiga imtiyozli ravishda oʻqishga kirib, 1995-yilda tamomlagan.

Faoliyati

Oʻz faoliyatini 1990-yilda boshlagan. Xalqqa „Qurbon olam“, „Kutaman“, „Parizod“, „Azizim“, „Goʻzalsan“ deb nomlangan qoʻshiqlari bilan mashhur. Oʻzbekistonda jonli ijro boʻyicha yetakchi xonanda.

Oʻqish davomida 1990-yilda xonandalar va sozandalar oʻrtasida boʻlib oʻtgan XI Respublika koʻrik tanlovida imtiyozli diplom va laureat unvoniga, 1991-yil maqom ijrochilari I mintaqa koʻrik tanlovida II darajali diplomi va laureat unvoni bilan taqdirlangan. Ustozlari Oʻlmas Rasulov, Fattohxon Mamadaliyev va bir qancha ustozlardan tahsil olib 1995-yilda Oʻzbekiston Respublikasi madaniyat ishlari vazirligi maqom ijrochilarining Yunus Rajabiy nomidagi xalqaro tanlovida I darajali diplom va laureat unvoni bilan taqdirlangan. 1997-yilda Samarqand viloyatida „Xoji Abdulaziz Abdurasulov“ nomidagi I Respublika xonandalar tanlovida 1-oʻrin soxibi boʻlgan hamda juda koʻplab festival va koʻrik tanlovlarda qatnashgan. 2018-yil American Sephardi Federatsiyasi tomonidan Shoshmaqom laureati unvoni bilan taqdirlangan. 2021-yil Oʻzbekiston Respublikasi Prezidenti tomonidan Oʻzbekiston Respublikasi „ Mustaqilligining 30-yilligi“ koʻkrak nishoni bilan taqdirlangan.

1996-yilda Turkiyada „Oʻzbekiston kunlari“ festevalida;

1999-yilda Fransiyada „Oʻzbekiston kunlari“ festevalida;

2001-yilda London, AQSH davlatlarida „Ozbekiston kunlari“ festevalida milliy sanʼat namoyishida;

2002-yilda Yaponiyada „Oʻzbekiston kunlari“ festevalida;

2010-yilda Ozarbayjon Respublikasida „Oʻzbekiston yoshlari“ kunida;

2014-yilda Fransiyada „Xalqaro tinchlik kuni“da;

2015-yilda AQSH da „Navroʻz“ festevalida;

2017-yilda Tojikiston Respublikasida „ Doʻstlik munosabati“ nomli konsert dasturida;

2017-yilda Isroil davlatida „Buxoro Yaxudiylari“ butun dunyo kongressida maqom kechasida;

2018-yilda AQSHda Yunus Rajabiy nomidagi IV xalqaro shoshmaqom festevalida hamda juda koʻplab shunga oʻxshash festival va konsertlarda faol qatnashgan.

32 yillik ijodi davomida 200 dan ortiq qoʻshiqlar yozgan hamda bir nechta musiqiy albomlarni xalqqa taqdim etgan. Bular 2002-yilda „Parizod“, 2005-2006-yillarda „Kutaman“, 2008-yilda „Azizim“, 2010-yilda „Bu hayot“, 2012-yilda „Sogʻinch“, 2013-yilda „Goʻzalsan“. Oʻzbekiston Respublikasi Madaniyat oltin fondida 30 dan ortiq klassik mumtoz yoʻnalishdagi qoʻshiqlari joy olgan.

Faoliyati davomida 2006-yil 13-14-may kunlari Turkiston sanʼat saroyida „Kutaman“ deb nomlangan; 2012-yil 14-15-iyun kunlari Istiqlol sanʼat saroyida „Bu hayot“ deb nomlangan; 2013-yilda 12-13-iyun kunlari Istiqlol sanʼat saroyida „Goʻzalsan“ deb nomlangan konsert dasturlarini xalqqa taqdim etgan. 2026-yil 28-mayda Doʻstlik ordeni bilan taqdirlangan.

Havolalar

Oʻlmas Olloberganovning rasmiy Telegram kanali .

Oʻlmas Olloberganovning rasmiy Yutub kanali .

Oʻlmas Olloberganovning rasmiy Instagram .

Rus Vikipediyasida Oʻlmas Olloberganov haqidagi maqola.