Novshadil spirt

Novshadil spirt (nashatir spirt) — ammiakning suvdagi 3—10% li eritmasi. Tibbiyotda, asosan, 10% li ammiak eritmasi ishlatiladi. Hushdan ketganlarga hidlatiladi, u burun-halqum shilliq pardasi nervlariga taʼsir etib, markaziy nerv sistemasini qoʻzgʻatadi, alkogoldan zaharlanganlarni qusishni chaqirish uchun yarim stakan suvga 5 tomchi tomizib ichiriladi. Terisi yogʻli yuzni artish, yuz va qoʻl terisini yumshatish uchun 0,5% li eritmasi qoʻllanadi. Mikroblarga qarshi taʼsirga ega boʻlgani sababli novshadil spirtdan baʼzan jarrohlik amaliyotida ham foydalaniladi. Shifokor koʻrsatmasi asosida foydalanish tavsiya qilinadi.