Nevralgiya

Nevralgiya (qadimgi yunoncha: νεῦρον — „nerv“ + ἄλγος — „ogʻriq“) — sezuvchi nerv tolalarining zararlanishi hisoblanadi. Nerv tolalari boʻylab tarqaladigan kuchli ogʻriq nevralgiya deyiladi. Nerv vaqti-vaqti bilan sanchib, zirqirab yoki tortishib ogʻriydi. Uch shoxli nerv, quymich nervi, qovur-gʻalararo nerv nevralgiyasi koʻproq uchraydi. Uchlik nerv shamollaganida yuz, koʻz va tishlarda kuchli ogʻriq seziladi. Infeksion kasalliklar, intoksikatsiya, shikastlanishlar, moddalar almashinuvining buzilishi, ateroskleroz, organizmning sovuq qotishi, zararli odatlar, kasbga aloqador kasalliklar sabab boʻladi. Nevralgiya qaysi soha nervida boʻlsa, oʻsha soha nervining poyasi, qobigʻi taʼsirlanadi, nerv poyasi shishadi, atrofidagi muskullar tortishadi (masalan, uch shoxli nerv nevralgiyasida yuz muskullari tortishishi), baʼzan nervda struktur oʻzgarishlar kuzatiladi.

Nevralgiya xurujida ogʻriyotgan joyda teri oqarishi yoki qizarishi, terlash, koʻz yoshlanishi yoki soʻlak oqishi, baʼzan toshmalar paydo boʻlishi mumkin.

Nevralgiyaning kelib chiqish sababi koʻra davo chorasi qilinadi. Ogʻriq qoldiruvchi, yalligʻlanishiga qarshi, umumiy quvvatga kirgizuvchi dorilar buyuriladi, fizioterapiya, sanatoriy va kurortlarda davolanish tavsiya qilinadi.