Natan Mallayev

Natan Murodovich Mallayev (1922.22.1 — Toshkent — 1996-yil) — adabiyotshunos, tarjimon. Oʻzbekistonda xizmat koʻrsatgan fan arbobi (1973). Filologiya fanlari doktori (1978), professor (1980). Toshkent davlat pedagogika institutini tugatgan (1942). „Qardosh xalqlar adabiyoti“ (hozirgi oʻzbek klassik adabiyoti) kafedrasi mudiri (1965-1991). Mallayev „Oʻzbek adabiyoti tarixi“ (oʻrta maktablar uchun, 1953-1972), „Oʻzbek adabiyoti tarixi“ (un-t va pedagogika institutlari uchun, 1963-1965) kabi darsliklar muallifi. Asosiy ilmiy tadqiqotlari Navoiy ijodini oʻrganish va mumtoz adabiyot bilan xalqogʻzaki ijodining oʻzaro taʼsirini tadqiq etishga karatilgan („Ulugʻ shoir va mutafakkir“, 1969-yil; „Navoiy ijodining xalqchil negizi“, 1973-yil; „Soʻz sanʼatining gultoji“, 1991-yil va boshqalar). Mallayev „Abulqosim Firdavsiy“ (1962) monografiyasini yozgan. S. Ayniyning „Qisqacha tarjimai holim“ asarini oʻzbek tiliga tarjima qilgan. Firdavsiy "Shohnomasining 2 jilddan iborat nasriy tarjimasini, Majlisiy („Qissai Sayfulmulk“ dostoni), Navoiy (ruboiy, tuyuq, lirika) asarlarini nashrga tayyorlagan. Mallayev Navoiy asarlarining ruscha 10 jildli nashrini (5- va 10-jildlar, 1968-yil) tayyorlashda qatnashgan. Oliy oʻquv yurtlari va oʻrta maktablar uchun dastur va xrestomatiyalar tuzgan (1952-1974-yillar).