Muhiddin Boboxoʻjayev

Muhiddin Boboxoʻjayev
Tavalludi	1929-yil 25-iyun Sherobod, Surxondaryo viloyati, Oʻzbekiston SSR, SSSR
Vafoti	?
Mukofotlari	Oʻzbekiston xalq maorifi aʼlochisi

Muhiddin Boboxoʻjayev (1929-yil 25-iyun, Sherobod, Surxondaryo viloyati, OʻzSSR – ?) – oʻzbek olimi va adabiyotshunosi. Adabiyot sohasidagi bir qancha ilmiy ishlar muallifi. 1957-yilda Oʻzbekiston SSR Maorif vazirligi tomonidan „Xalq maorifi aʼlochisi“ unvoni bilan mukofotlangan.

Hayoti

Muhiddin Boboxoʻjayev 1929-yil 25-iyunda Oʻzbekiston SSR tarkibidagi Surxondaryo viloyatining Sherobod tumanida tugʻilgan. Dastlab, boshlangʻich taʼlimni qishlogʻidagi maktabida oladi. 1948-yilda Sheroboddagi „Makarenko“ nomidagi maktabni muvaffaqiyatli yakunlaydi. Shu yili Toshkent shahrida joylashgan Vladimir Lenin nomidagi Oʻrta Osiyo davlat universiteti (hozirgi Oʻzbekiston Milliy universiteti)ning filologiya fakultetiga oʻqishga qabul qilinadi.

Faoliyati

Oliygohni 1953-yilda muvaffaqiyatli tamomlab, Sheroboddagi oʻrta maktablarning biriga oʻqituvchi sifatida oʻz faoliyatini boshlaydi. Ishga kirganidan soʻng, tez orada ilmiy boʻlim mudiri sifatida ishini davom ettirgan. 1955-yil Surxondaryo viloyati oʻqituvchilar malakasini oshirish instituti direktori etib tayinlanadi. Uning rahbarligida 1957-yil „Orfografik mashgʻulotlar“, 1958-yilda „Oʻzbek tili grammatikasiga doir“ kitoblari nashr etilgan. 1960-yil Termiz davlat universitetiga aspirantura taʼlim bosqichiga qabul qilinib, 1964-yilda muvaffaqiyatli tamomlaydi. Shu yili „Yigirmanchi yillar sovet poeziyasida zamonaviylik uchun kurash“ mavzusida dissertatsiyasini yoqlaydi. Boboxoʻjayev shu paytgacha kam tadqiq qilingan oʻzbek adabiyot namoyondalarini faoliyatini oʻrganib chiqdi. Ular orasida, Muhammadsharif Soʻfizoda, Shokir Sulaymon, Botu, Elbek, Xosiyat Tillaxonova, Oltoy, Abdulhamid Majidiy va Faqiriylar bor edi. Oʻzbekiston SSR matbuotida uning bir qancha yirik ilmiy va ijodiy maqolalari chop etilgan. „Oʻzbek sovet adabiyotida Ulugʻ oktyabr sotsialistik revolyutsiyasi temasi“, „Yoshlik kuychisi“, „Shoira va jurnalist“, „Maktab va shoir“, „Oʻzbek sovet adabiyotining dastlabki taraqqiyot davriga rus adabiyotining taʼsiri masalasiga doir“, „Oʻzbek sovet adabiyotida Lenin obrazi“ maqolalari shular jumlasidan. 1965-yildan 1971-yilgacha Termiz davlat universitetining fakultet dekani, ilmiy va oʻquv ishlari boʻyicha prorektor lavozimlarida faoliyat yuritdi. 1972-yil kafedra dotsenti sifatida ishladi. Faoliyati davomida eng yirik ilmiy ishi „Oʻzbek sovet adabiyoti tanqidchiligida markscha-lenincha gʻoyaviylik uchun kurash“ hisoblanadi.

Mukofotlari

1957-yil Oʻzbekiston SSR Maorif vazirligi tomonidan „Xalq maorifi aʼlochisi“ unvoni bilan mukofotlangan. Bundan tashqari, Oʻzbekiston SSR Oliy Soveti prezidiumining bir qancha davlat mukofotlari bilan mukofotlangan.