Muhammad Hishom Qabboniy

Muhammad Hishom Qabboniy (arabcha: محمّد هشام قبّاني‎‎ 1945-yil, Livan) islom nazariyotchisi, naqshbandiyliknamoyandalaridan biri, shayx. Tibbiyot va islom huquqi fanlari doktori. Qabboniy Amerikadagi „Musulmonlar hamkorligi“ harakati rahbari, as-Sunna jamgʻarmasi hamda Kamilat nomli musulmon ayollari tashkilotining raisi, Amerika inson huquqlari boʻyicha kengashining, shuningdek, AQSh Davlat departamentining diniy erkinlik masalalari boʻyicha maslahatchisi. Qabboniy „Islom arkonlari va imon“ qomusi, „Naqshbandning soʻfiylik tariqati“ kabi asarlarida islom dinining bugungi kundagi dolzarb masalalarini tahlil qiladi. U oʻz asarlari va chiqishlarida diniy niqobdagi terrorchilik va turli buzgʻunchilik xatti-harakatlarini qoralaydi. Qabboniy 2000- yil 15-18 sentyabrda Toshkentda YUNESKO rahnamoligida oʻtgan „Jahon dinlari – tinchlik madaniyati yoʻlida“ mavzuidagi xalqaro anjumanda ishtirok etdi. Qabboniy xalqlar oʻrtasida doʻstlikni mustahkamlash, moʻtadil, zamon talablariga javob beradigan islomni targʻib etish tarafdori.

Adabiyotlar

• ISLOM ENSIKLOPEDIYASI

„Oʻzbekiston milliy ensiklopediyasi“ Davlat ilmiy nashriyoti, 2004