Mirpoʻlat Mirzo

Mirpoʻlat Mirzo
Tavalludi	1949-yil 20-avgust (1949-08-20) Chimkent, Qozoq SSR, SSSR
Vafoti	22-fevral 2018-yil(2018-02-22) (68 yoshda) Toshkent shahri, Oʻzbekiston
Fuqaroligi	Oʻzbekiston
Taʼlimi	Oʻrta Osiyo davlat dorilfununi
Kasbi	shoir
Unvoni	Oʻzbekistonda xizmat koʻrsatgan madaniyat xodimi

Mirpoʻlat Mirzo (1949-yil 20-avgust, Chimkent, Qozoq SSR – 2018-yil 22-fevral, Toshkent, Oʻzbekiston) – oʻzbek shoiri, Oʻzbekistonda xizmat koʻrsatgan madaniyat xodimi.

Hayoti

Mirpoʻlat Mirzo 1949-yilning 29-avgustida Qozogʻiston SSRning Chimkent viloyatida joylashgan Sayram qishlogʻida tugʻilgan. Qishloqda oʻrta taʼlimni olgach, Oʻrta Osiyo davlat dorilfununi (hozirgi Oʻzbekiston Milliy universiteti)ning jurnalistika fakultetiga 1967-yili qabul qilinadi. 1971-yilda oliygohni muvaffaqiyatli tamomlaydi.

Mehnat faoliyati

1971-yilda „Yangi asr avlodi“ nashriyotida oʻz mehnat faoliyatini boshlagan Mirpoʻlat Mirzo, keyinchalik Oʻzbekiston yozuvchilar uyushmasida adabiy maslahatchi sifatida faoliyatini davom ettirdi. Soʻng, „Yozuvchi“ nashriyotida bosh muharrir sifatida ishlab, tajriba orttirgan. 1997-yildan boshlab, uzoq yillar davomida „Jahon adabiyoti“ jurnalining bosh muharriri oʻrinbosari sifatida ishlagan.

Ijodi

Mirpoʻlat Mirzo oliygohda oʻqib yurgan paytlarida, sheʼrlar yozishni boshlagan. 1971-yilda „Guliston“ jurnalida ilk sheʼrlar toʻplami chop etilgan boʻlsa, 1975-yilda ilk sheʼriy kitobi nashr etilgan. Shu bilan birgalikda, 1978-yilda „Ishq fasli“, 1981-yilda „Yaxshi kunlar“, 1985-yilda „Sunbula“, 1988-yilda „Moviy daryo“, 1990-yilda „Atirgul va yulduzlar“ kitoblari nashrdan chiqarilgan.

1991-yilda Oʻzbekiston Respublikasi mustaqillikka erishganidan soʻng, bir qancha publitsistik toʻplamlari chop etildi. Jumladan, 2004-yilda „Saylanma“, 2009-yilda „Surur“, 2011-yilda „Rayhon isi“ hamda 2016-yilda „Men nechun sevaman Oʻzbekistonni“ publitsistik toʻplamlari nashr etildi. „Qachon tong otadi“ dramasi Chimketdagi oʻzbek davlat teatrida sahnalashtirilgan.

Tarjimonlik faoliyati

Mirpoʻlat Mirzo nazm va nasr janrlaridan tashqari tarjimonlik faoliyati bilan ham shugʻullanib turgan. Jumladan, Lessingning ijodiga tegishli boʻlgan „Donishmand Natan“ hamda William Shakespearening „Yoz tuni gʻaroyibotlari“ romanlarini oʻzbek tiliga toʻliq tarjima qilgan. 2004-yilda „Somon yoʻli chechaklari“, 2005-yilda „Sayra, doʻmbiram“, 2008-yilda „Lojuvard osmon“, 2010-yilda „XX asr rus sheʼriyati“ kabi xalqaro antologiyalarni oʻzbek tiliga tarjima qildi.

Mukofotlari

1998-yilda „Pasternak“ nomidagi Rossiya davlat mukofoti bilan, 2001-yilda esa „Alash“ nomli Qozogʻiston xalqaro mukofotlari bilan mukofotlangan.

Havolalar

• Mirpoʻlat Mirzo she'rlari. Мирпўлат Мирзо шеърлари.