Metchik

Metchik — teshiklarda vintsimon rezba (ariqcha) ochish (qirqish) uchun moʻljallangan metall qirqish asbobi. Metchikning bir uchi kesuvchi tigʻlari (qirralari) boʻlgan silindrik valikdan, ikkinchi uchi stanok patroniga yoki qisqichga mahkamlashga moʻljallangan quyruqdan iborat.

Asosiy xillari: dastaki metchik (qoʻlda rezba ochish uchun); gayka metchigi (ikki tomoni ochiq teshiklarda rezba ochish uchun); mashina metchigi (parmalash stanoklarida, avtomat va maxsus agregat stanoklarida, asosan, bir tomoni berk teshiklarda rezba ochish uchun); stanok metchigi (gayka qirqish stanoklarida ikki tomoni ochiq teshiklarda rezba ochish uchun); avtomat metchik (gayka qirqish stanoklarida rezba ochish uchun) va boshqalar. Ular legirlangan asbobsozlik poʻlati va tezkesar poʻlatdan yasaladi.