Men Oʻzbekiston fuqarosiman

Men Oʻzbekiston fuqarosiman

Muallif(lar)	Narzulla Jo'rayev, G'anisher Mamatov, Laziz Tangriyev
Mamlakat	Oʻzbekiston
Til	oʻzbekcha
Nashriyot	Gʻafur Gʻulom nomidagi nashriyot-matbaa ijodiy uyi
Sahifalar soni	224
ISBN	978-9943-03-323-8

Men Oʻzbekiston fuqarosiman – 2010-yil Gʻafur Gʻulom nomidagi nashriyot-matbaa ijodiy uyi tomonidan chop etilgan kitob. Kitobda Oʻzbekistondagi ijtimoiy-iqtisodiy islohotlar haqida maʼlumotlar berilgan. Shu bilan birgalikda, 16 yoshga toʻlishi bilan Oʻzbekiston Respublikasi fuqarosi boʻlganlar uchun mamlakat konstitutsiyasi, uning aholisi, hokimiyat organlari, inson huquq va erkinlari, ijtimoiy himoya siyosati, milliy qadriyatlar hamda shu kabi maʼlumotlar mavjud. Kitob Oʻzbekiston Respublikasi Ichki ishlar vazirligi xorijga chiqish-ketish va fuqarolikni rasmiylashtirish boshqarmasi bilan hamkorlikda nashrdan chiqarilgan. 10000 nusxada chop etilgan. Mualliflari oʻzbek jamiyatshunosi Narzulla Joʻrayev, Gʻanisher Mamatov, Laziz Tangriyevlar hisoblanadi.

Kitob mazmuni

1-bob:Oʻzbekiston Respublikasi fuqarosining pasporti

Kitob Oʻzbekiston Respublikasining birinchi Prezidenti Islom Karimovning quyidagi soʻzlari bilan boshlangan:

Ulug' ajdodlarimizdan muqaddas meros bo'lib kelayotgan Vatanga muhabbat tuyg'usi farzandlarimiz, bugungi va kelajak avlodlarimiz uchun chinakam e'tiqodga, chinakam aqidaga aylansin.

1-bobda Oʻzbekiston Respublikasi Prezidentning 1999-yil 26-fevraldagi „Oʻzbekiston Respublikasining pasport tizimini takomillashtirish toʻgʻrisida“gi PF-2240-sonli farmoni, pasportga kiritiladigan belgilar, fuqarolik pasporti beriladigan hollar, pasportning almashtirish sabablari haqida maʼlumotlar aks etgan.

2-bob:Oʻzbekiston Respublikasi Konstitutsiyasi

2-bob „Oʻzbekiston Respublikasi Konstitutsiyasi“ deb nomlangan. Bobda Konstitutsiyaga kiritilgan oʻzgaritirishlar, konstitutsiyaning tarkibiy qismlari, preambulasi va moddalar haqida maʼlumotlar keltirilgan.

3-bob:Oʻzbekiston – suveren demokratik respublika

3-bob „Oʻzbekiston – suveren demokratik respublika“ deb nomlangan. Mazkur bobda mamlakat aholisi, uning etnik tarkibi, mamlakatning joylashuv hududi, geografik nuqtalari, geografik koordinatalari, aholining diniy tarkibi, ekologiyasi, davlatning qurilish shakli, ijtimoiy munosabatlari, davlat tarkibi va subyektlari, qonun chiqaruvchi, ijro etuvchi va sud hokimiyatlari, Qoraqalpogʻiston Respublikasining davlat tuzumi, davlat ramzlari hamda 12 viloyatlarning tabiati, iqlimi, xoʻjaligi va sanoatiga oid faktlar mavjud. Shu bilan birgalikda Oʻzbekistonning davlat ramzlari, davlat bayrogʻidan foydalanish hollari, davlat gerbi tasnifi va undan foydalanish joylari, davlat madhiyasi va uni kuylash tartibi va hollari haqida aniq maʼlumotlar bor. Toshkent shahrining maqomi, uning qisqacha tarixi, nomlanishi, shahardagi yirik sanoat majmualari, Toshkent zilzilasi, avtomagistrallar, maktablar va bir qator jamoat joylari boʻyicha faktlar keltirilgan. Mamlakatning qonunchilik hokimiyati, faoliyati va vakolatlari boʻyicha Konstitutsiyadan bandlar keltirilgan. Mahalliy davlat hokimiyati asoslarining vakolatlari, vakillik va ijroiya organlari, respublikadagi saylov tizimi, prokuraturaning vazifalari va BMTning „Inson huquqlari umumjahon deklaratsiyasi“ haqida ham maʼlumotlar mavjud.

4-bob:Oʻzbekiston Respublikasi fuqarosining huquqi, erkinligi va majburiyatlari

Kitobning 4-bobi „Oʻzbekiston Respublikasi fuqarosining huquqi, erkinligi va majburiyatlari“ deb nomlangan. Bunda Oʻzbekiston fuqarolarining huquqlari, erkinliklari, majburiyatlari, inson huquqlarini himoya qilish boʻyicha xalqaro meʼyorlar, ijtimoiy, iqtisodiy, madaniy huquqlar, shaxsning huquqiy majburiyatlarining tasniflari keltirilgan.

5-bob:Oʻzbekiston jamiyatining ijtimoiy tizimi

Kitobning 5-bobi „Oʻzbekiston jamiyatining ijtimoiy tizimi“ deya nomlangan. Mazkur bobda, Oʻzbekiston davlatining ijtimoiy himoya siyosati, iqtisodiy islohotlarning 5 tamoyili, aholi ijtimoiy barqarorligini taʼminlashning Oʻzbekiston tamoyillari, sogʻliqni saqlash va ijtimoiy bagʻrikenglik sohasidagi oʻzgarishlar, inson va jamiyat tushunchalari ochib berilgan. Yoshlar va jamoat tashkilotlari fuqarolik jamiyatining bir qismi ekanligi, ijodiy va madaniy faoliyat mamlakat hayotining muhim qismi ekanligi keltirilgan.

6-bob:Oʻzbekiston, uning milliy davlatchiligi va maʼnaviy qadriyatlari

Kitobning 6-bobi „Oʻzbekiston, uning milliy davlatchiligi va maʼnaviy qadriyatlari“ deb nomlangan. Mazkur bobda oʻzbek millati va uning davlatchiligi, milliy anʼanalar va qadriyatlar, oʻzbek millatining urf-odatlari, oʻzbek davlatchiligi muhim oʻrin tutgan allomalarning hayoti va faoliyati haqida maʼlumotlar bor.