Maqsud Isoqov
| Maqsud Uzoqovich Isoqov | |
|---|---|
 | |
| "MRI" DM direktori | |
|
Mansab davri 2022-yil 29-aprel – hozirgacha | |
| Hukumat boshligʻi | Abdulla Oripov (siyosatchi) |
| Prezident | Shavkat Mirziyoyev |
| Oʻtmishdoshi | Bobir Islomov |
| Shaxsiy maʼlumotlari | |
| Tavalludi |
1971-yil 28-yanvar Qoʻqon, Fargʻona viloyati, OʻzSSR |
| Fuqaroligi |
 Oʻzbekiston |
| Ilmiy unvoni | Geologiya-mineralogiya fanlari doktori |
| Maʼlumoti | Toshkent davlat texnika universiteti |
| Vebsayti | [1] |
Isoqov Maqsud Uzoqovich (1971-yil 28-yanvarda Fargʻona viloyati, Qoʻqon shahrida tug‘ilgan) — o‘zbekistonlik geolog olim, geologiya-mineralogiya fanlari doktori(2017)[1], professor. U foydali qazilma konlarini geologik xaritalash, izlash va razvedka qilish, geologik modellashtirish hamda geologiya-qidiruv ishlari uslubiyotini takomillashtirish yo‘nalishlaridagi ilmiy ishlari bilan tanilgan. Hozirda “Mineral resurslar instituti” davlat muassasasi direktori lavozimida faoliyat yuritadi.
Ta’limi
Isoqov Maqsud Uzoqovich 1993-yilda Toshkent davlat texnika universitetining “Foydali qazilma konlarini geologik xaritalash, izlash va razvedka qilish” mutaxassisligini tamomlagan. 1995–1999-yillarda O‘zbekiston Respublikasi Davlat geologiya va mineral resurslar qo‘mitasi huzuridagi Mineral resurslar instituti aspiranturasida tahsil olgan.
2004 yili AQSHda SABIT dasturi boʻyicha Newmont, Barrick Gold va Phelps Dodge kabi bir qator yetakchi togʻ-kon sanoati va metallurgiya kompaniyalarida stajirovka oʻtagan.
Ilmiy va tashkiliy faoliyati
Maqsud Isoqovning ilmiy faoliyati foydali qazilma konlarini izlash, geologik modellashtirish, namunalash ishonchliligi va geologiya-qidiruv ishlari metodologiyasini takomillashtirish masalalariga bag‘ishlangan. U tog‘ jinslarining moddiy tarkibini o’rganish, konlarning hosil bo‘lish genezisini o‘rganish hamda ularni samarali razvedka qilishga doir bir qator ilmiy maqolalar va metodik tavsiyalar muallifidir. Uning ilmiy ishlari O‘zbekiston Respublikasi Davlat geologiya va mineral resurslar qo‘mitasi tizimidagi ilmiy markazlar, jumladan, “Mineral resurslar instituti” va “Geologiya va geofizika instituti”da amaliy tadqiqotlarga asos bo‘lgan. U rahbarlik qilgan ilmiy jamoalar tomonidan O‘zbekistondagi bir qator foydali qazilma konlarini qayta baholash, yangi istiqbolli maydonlarni aniqlash va resurs bazasini kengaytirishga oid tadqiqotlar amalga oshirilgan. Ayniqsa, Navoiy KMK va Olmaliq KMKlarga qarashli konlar va maydonlarda olib borilgan geologik va texnologik tadqiqotlar uning rahbarligida yangi ilmiy natijalar bilan boyitilgan.
Maqsud Isoqov rahbarligida nodir metallar va kamyob yer elementlarining noan’anaviy konlarini qidirish hamda mineral xomashyoni qayta ishlashning innovatsion usullari ishlab chiqilgan va sanoatga joriy etilgan. Shuningdek, uning rahbarligida konseptual jihatdan yangi avlod raqamlashtirilgan geologiya, geodinamika va metallogeniya mazmunidagi zamonaviy xaritalar yaratilgan. U 80 dan ortiq ilmiy ishlar (maqolalar, o‘quv qo‘llanmalar va b.), monografiyalar, patentlar shuningdek zaxiralarni hisoblash bo‘yicha ilmiy hamda ishlab chiqarish hisobotlari muallifi hisoblanadi.
Tashkiliy faoliyatida Maqsud Isoqov O‘zbekiston geologiya tizimining modernizatsiyasiga alohida hissa qo‘shgan. U rahbarlik qilgan davrda “Mineral resurslar instituti”da laboratoriyalar zamonaviy texnika va asbob-uskunalar bilan jihozlangan, yosh olimlarni qo‘llab-quvvatlash, ilmiy stajirovkalarni tashkil etish va xalqaro ilmiy hamkorlik yo‘lga qo‘yilgan.
Uning rahbarligida bir qator fan doktorlari hamda falsafa doktorlari dissertatsiya himoya qilishgan. Ko‘p yillik tadqiqotlari natijasida u geologiya-mineralogiya fanlari doktori ilmiy darajasini olgan hamda professor unvoniga ega bo‘lgan.
Geologiya fanlari universitetidagi faoliyati
Maqsud Isoqov Geologiya fanlari universitetida ilmiy va tashkiliy faoliyat olib borgan. Uning rahbarligi davrida universitet va institut tizimida laboratoriyalar modernizatsiya qilinib, zamonaviy geologik tadqiqot usullari joriy etilgan. Shuningdek, xalqaro ilmiy hamkorlik va ishlab chiqarish korxonalari bilan integratsion loyihalar rivojlantirilgan. Natijada geologik tadqiqotlar bo‘yicha bir qator ishlab chiqarish korxonalari va xalqaro tashkilotlar bilan ilmiy hamkorlik yo‘lga qo‘yildi. U O‘zbekiston geologiya sohasining rivojlanishida oliy ta’lim muassasalarining o‘rnini mustahkamlash, amaliyotga yo‘naltirilgan ta’lim dasturlarini kengaytirish va yosh kadrlarni rag‘batlantirish tizimini takomillashtirishda muhim tashabbuslarni ilgari surdi.
Xalqaro tashkilotlarda a’zoligi
Maqsud Isoqov 2014-yildan buyon Xitoy - ShHT Yer haqidagi fanlar sohasidagi hamkorlik ilmiy-tadqiqot markazi ilmiy qo‘mitasi a’zosi hisoblanadi. M. U. Isoqovning ushbu Ilmiy qo‘mita tarkibidagi faoliyati O‘zbekiston geologiya maktabining xalqaro ilmiy maydondagi ishtirokini mustahkamlash, xorijiy ilmiy markazlar bilan hamkorlik aloqalarini kengaytirish hamda sohada zamonaviy ilmiy yondashuvlarni rivojlantirishdagi faol o‘rnini namoyon etadi.
Mehnat faoliyati
Isoqov Maqsud Uzoqovich o‘z mehnat faoliyatini 1993-yilda “Toshkentgeologiya” ishlab chiqarish birlashmasining Sharqiy-Qurama geologik-qidiruv ekspeditsiyasida texnik-geolog sifatida boshlagan. Keyinchalik ushbu tizimda geolog va boshqa muhandislik lavozimlarida faoliyat yuritgan.
- 1995–1999-yillarda Mineral resurslar institutida aspiranturada tahsil olgan. 1999–2006-yillarda institutda 2-toifali muhandis, yetakchi muhandis, katta ilmiy xodim, sektor mudiri va bo‘lim mudiri lavozimlarida ishlagan.
- 1996–1999 yillarda Buyuk Britaniyaning RTZ kompaniyasi tomonidan Oʻzbekistonda rangli metallarga istiqbolli yangi hududlarni bashoratlashga qaratilgan ilmiy-texnik loyihada ishtirok etgan.
- 2006–2008-yillarda “Olmaliq kon-metallurgiya kombinati” AJ Angren kon boshqarmasida bosh geolog lavozimida faoliyat yuritgan.
- 2008–2009-yillarda “Mineral resurslar ilmiy-tadqiqot instituti” davlat korxonasida direktor vazifasini bajaruvchi, 2009–2015-yillarda esa institut direktori lavozimida ishlagan.
- 2015–2018-yillarda O‘zbekiston Respublikasi Vazirlar Mahkamasining geologiya va yoqilg‘i-energetika kompleksi bilan bog‘liq axborot-tahlil departamentida sho‘ba mudiri sifatida faoliyat olib borgan.
- 2018–2019-yillarda H.M. Abdullayev nomidagi “Geologiya va geofizika instituti” davlat muassasasi direktori bo‘lgan.
- 2019–2022-yillarda Geologiya fanlari universiteti huzuridagi “Mineral resurslar instituti” davlat muassasasi direktori lavozimida ishlagan.
- 2022–2025-yillarda Geologiya fanlari universiteti rektori vazifasini bajaruvchi sifatida faoliyat yuritgan.
- 2025-yil 13-martdan boshlab “Mineral resurslar instituti” davlat muassasasi direktori lavozimida ishlab kelmoqda.
Mukofotlari
- 2021-yilda „Sodiq xizmatlari uchun“ medali bilan mukofotlangan.
2021-yilda „Innovatsion gʻoyalar yetakchisi“ koʻkrak nishoni bilan taqdirlangan.
Manbalar
- ↑ „Maqsud Isoqov Geologiya fanlari universiteti rektori vazifasini bajaruvchi etib tayinlandi“. uzreport.news (2022-yil 30-aprel). Qaraldi: 19-mart 2024-yil.