Mahmud Saʼdiy

Mahmud Saʼdiy
Tavalludi	1939-yil Narpay tumani, Samarqand viloyati, Oʻzbekiston SSR
Vafoti	23-noyabr 2019-yil
Fuqaroligi	SSSR→ Oʻzbekiston
Kasbi	jurnalist
Mukofotlari	Fidokorona xizmatlari uchun, Oʻzbekistonda xizmat koʻrsatgan jurnalist, Oʻzbekiston Respublikasi Mustaqilligiga 15 yil

Mahmud Saʼdiy — taniqli oʻzbek jurnalisti. Oʻzbekistonda xizmat koʻrsatgan jurnalist. „Fidokorona xizmatlari uchun“ ordeni, „Oʻzbekiston Mustaqilligiga 15 yil“ nishonlari sohibi. Turli yillarda davriy gazetalar va jurnallarda faoliyat yuritgan. „Oltin qalam“ milliy mukofoti sovrindori.

Hayoti

Mahmud Saʼdiy 1939-yil 20-iyul Oʻzbekiston SSR tarkibidagi Samarqand viloyatining Narpay tumanida tugʻilgan. Tumandagi oʻrta maktabda tahsil olgach, 1961-yil Oʻzbekiston Milliy universiteti filologiya fakultetining jurnalistika boʻlimiga qabul qilingan. Oliygohni 1965-yilda muvaffaqiyatli tamomlagan. 2019-yil 23-noyabr kuni 80 yoshida vafot etgan.

Faoliyati

Oʻz mehnat faoliyatini dastlab, „Sharq yulduzi“ jurnalida adabiy xodim sifatida boshlaydi. Soʻngra, „Guliston“ jurnalida katta adabiy xodim, keyinchalik boʻlim mudiri sifatida faoliyatini davom ettirdi. „Oʻzbekiston adabiyoti va sanʼati“ gazetasida boʻlim mudiri, „Maʼrifat“ gazetasi tahririyatida sharhlovchi, boʻlim muharriri sifatida faoliyatini olib borgan. „Maʼrifat“ gazetasida jurnalistning „Gurung“ nomli rukni mavjud boʻlib, bunda hayotiy kichik hikoyalar, ibratli voqealarni berib borgan. Mahmud Saʼdiy oʻzining muallifligidagi xalqaro jurnalistika yoʻnalishida tahsil oladigan oliy taʼlim talabalari uchun „Tahrir sanʼati“ oʻquv dasturi qoʻllanmasini ishlab chiqqan. 1989-yilda „Oʻz qadrini bilgan qadr topadi“ asarini yozib tugatgan. Oʻzbek adabiyoti va yozuvchiligidagi jiddiy va dolzarb muammolarga bagʻishlangan „Teran tomirlar“ kitobi nashr qilingan. Oʻzbek ommaviy axborot vositalaridan birida keltirilishicha, jurnalist Mahmud Saʼdiy baʼzi bir tushunmovchiliklarni tanqid qilgan. Jumladan, bitiruvchi talabalar koʻp bora ishlatadigan „Diplomni himoya qilmoq“ jumlasi, aslida notoʻgʻri ekanligini, uning oʻrnida „Diplomni yoqlamoq“ jumlasini ishlatish maqsadga muvofiqligini aytib oʻtgan.

Mukofotlari

Mahmud Saʼdiy oʻzining uzoq yillik faoliyati va jurnalistik mahorati sabab hukumat tomonidan bir necha bor eʼtirof etilgan. Turli yillarda „Fidokorona xizmatlari uchun“ ordeni hamda „Oʻzbekiston xizmat koʻrsatgan jurnalist“ unvonlari bilan taqdirlangan. 2006-yilda „Oʻzbekiston mustaqilligiga 15 yil“ esdalik nishoni bilan mukofotlangan. Oʻzbekistondagi jurnalistlarga taqdim etiladigan milliy mukofot „Oltin qalam“ bilan ham mukofotlangan.