Madraim Bobojonov

Madraim Bobojonov (1939-yil, 10-sentyabr, Xorazm viloyati Xonqa tumani Gʻalaba qishlogʻi) — O‘zbekiston SSR xalq artisti (1988). Toshkent sanʼat institutini tugatgan (1970). 1961-yildan Ogahiy nomidagi Xorazm viloyat oʻzbek davlat musiqali drama va komediya teatrida aktyor. Bobojonov ijodiga qahramonona, romantik va fojiaviy rollar yaqin boʻlib, obrazlari joʻshqin his-tuygʻuga toʻla; chuqur dramatik holatlarni mahorat bilan gavdalantiradi. Sahnada yaratgan eng yaxshi rollari: Oʻtkuriy („Parvona“), Gʻofir („Boy ila xizmatchi“), Fazliddin („Nomaʼlum kishi“), Hamlet („Hamlet“), Karl Moor („Qaroqchilar“), Mindaugas; („Mindaugas“), Jaloliddin Manguberdi („Avlodlar qilichi“), Samadov („Oʻn uchinchi rais“), Ogahiy („Dilbandi Xiva“) va boshqalar. Bobojonov televideniye orqali namoyish etilgan bir qancha videofilmlarda ham (Ogahiy, „Ogahiy“; Qozi, „Deyishma“ va boshqalar) oʻynagan. „Nilufar“ (H. Rasul), „Millioner oʻgʻli“ (J. Teshaboyev, H. Islomov) kabi spektakllarni sahnalashtirgan.

Adabiyotlar

• OʻzME. Birinchi jild. Toshkent, 2000-yil