Madeleine McTernan
| Madeleine McTernan | |
|---|---|
| Shaxsiy maʼlumotlari | |
| Tavallud sanasi | 2000-yil 29-dekabr |
| Sport | |
| Mamlakat | Avstraliya |
| Qaysi sport | para suzish |
| Klubi | Sharks Aquatics SC |
| Murabbiy(lar)i | Ken Malcolm |
Madeleine „Maddie“ McTernan (2000-yil 29-dekabrda tugʻilgan) – avstraliyalik para suzuvchi. 2020-yilgi Yozgi Paralimpiya oʻyinlari va 2024-yilgi Yozgi Paralimpiya oʻyinlarida Avstraliya sharafini himoya qilgan va kumush medalga sazovor boʻlgan.
Shaxsiy hayoti
McTernan 2000-yil 29-dekabr kuni Kvinslend shtatining Nambour shahrida tugʻilgan. Aqliy jihatdan nogironlikka ega. McTernan New South Wales shtatining Woolgoolga shahrida joylashgan St Francis Xavier maktabida tahsil olgan va Coffs Harbourda voyaga yetgan. 2016-yilda u Gold Coast shahriga koʻchib oʻtgan va Southportdagi Aquinas kollejida taʼlim olgan[1].
Suzish faoliyati
McTernan suzish musobaqalarida S14 toifasi boʻyicha ishtirok etadi. U suzishni bolaligidan boshlagan va 2013-yilda oltinchi sinfda oʻqiyotgan paytida ilk bor musobaqadagi medalini qoʻlga kiritgan. Coffs Harbour shahrida sportchiga Eugene Brogmus murabbiylik qilgan[2]. McTernan suzish faoliyatini davom ettirish maqsadida Gold Coastdagi Sent Hilda suzish klubiga oʻtgan[1].
2019-yilda Londonda boʻlib oʻtgan para suzish boʻyicha jahon chempionatida McTernan S14 toifasida ayollar oʻrtasida 100 metrga chalqancha suzish bahslari finalida 5-oʻrinni egalladi. Shuningdek, u ayollar oʻrtasida SM14 toifasida 200 metrga individual kompleks suzish bahslarida 9-oʻrin, S14 toifasida 200 metrga erkin usulda suzish yoʻnalishida esa 10-oʻrinni egalladi, biroq musobaqaning final bosqichiga chiqa olmadi.
2019-yilda Brisben shahrida boʻlib oʻtgan INAS Global oʻyinlarida sportchi Avstraliya terma jamoasi tarkibida ishtirok etib, ayollar oʻrtasida II1 toifasida 4 × 50 metr va 4 × 200 metrga erkin usulda estafeta suzish bashlarida 2 ta oltin medal, 50 metr va 200 metrga chalqancha suzish, 4 × 100 metrga estafeta hamda aralash jamoaviy bahslarning 4 × 100 metrga erkin usulda suzish yoʻnalishida 4 ta kumush medal, shuningdek, 100 metrga chalqancha suzish musobaqasida bitta bronza medalni qoʻlga kiritgan.
2020-yil fevral oyida McTernan Melburnda boʻlib oʻtgan para suzish boʻyicha jahon seriyasi bahslarida 200 metrga erkin usulda suzish boʻyicha finalda gʻalaba qozonib, individual yoʻnalishdagi oʻzining ilk xalqaro oltin medalini qoʻlga kiritgan. 2020-yilning noyabr oyida Avstraliya virtual qisqa masofaga suzish chempionatida ayollar oʻrtasida 400 metrga erkin usulda suzish boʻyicha yangi jahon rekordini oʻrnatgan[3].
2020-yilgi Yozgi Paralimpiya oʻyinlarida McTernan Ruby Storm, Ricky Betar va Benjamin Hance bilan birgalikda S14 toifasida 4 x 100 metrga erkin ususlda suzish bahslarida ishtirok etib, 3:46.38 natija bilan kumush medalni qoʻlga kiritdi[4]. Ular musobaqa gʻoliblari hisoblanmish Buyuk Britaniya vakillaridan deyarli 6 soniyaga ortda qolishdi. Britaniyalik sportchilar ushbu musobaqada jahon rekordini oʻrnatgan edi. Shuningdek, u ayollar oʻrtasida S14 toifasida 100 metrga chalqancha usulda suzish bahslari finaliga chiqib, yakunda 4-oʻrinni egalladi[5].
2022-yil Madeyrada boʻlib oʻtgan para suzish boʻyicha jahon chempionatida S14 toifasida aralash jamoaviy bahslarning 4 × 100 metrga erkin usulda suzish yoʻnalishida, shuningdek, aralash jamoaviy bahslarning 4 × 100 metrga kompleks suzish bahslarida kumush medallarga sazovor boʻldi[6]. Ayollar oʻrtasida S14 toifasida 200 metrga erkin usulda suzish yoʻnalishida finalda 4-oʻrinni, S14 toifasida 100 metr chalqancha suzish boʻyicha esa 5-oʻrinni egalladi. Ayollar oʻrtasida SB14 toifasida 100 metrga brass usulida suzish bahslarida 12-oʻrinni egalladi va finalga chiqa olmadi.
2022-yil Angliyaning Birmingem shahrida boʻlib oʻtgan Hamdoʻstlik oʻyinlarida McTernan ayollar oʻrtasida S14 toifasida 200 metrga erkin usulda suzish boʻyicha 5-oʻrinni egalladi[7][8]. 2023-yilda Angliyaning Manchester shahrida oʻtkazilgan para suzish boʻyicha jahon chempionatida u aralash jamoaviy bahslarning 4 × 100 metrga kompleks usulda estafeta yoʻnalishida oltin, aralash jamoaviy bahslarning 4 × 100 metrga erkin usulda suzish boʻyicha esa kumush medalni qoʻlga kiritdi. Shu bilan birga, sportchi ayollar oʻrtasida S14 toifasida 200 metrga erkin usulda suzish bahslarida 8-oʻrin va S14 toifasida 100 metrga chalqancha suzish boʻyicha esa 6-oʻrinni egalladi.
2024-yilgi Parij Paralimpiadasida McTernan S14 toifasida aralash jamoaviy bahslarning 4 × 100 metrga erkin usulda suzish yoʻnalishida kumush medalni qoʻlga kiritdi. Shuningdek, S14 toifasida ayollar oʻrtasida 200 metrga erkin usulda va 100 metrga chalqancha suzish bahslarida 5-oʻrinni egalladi[9].
Manbalar
- ↑ 1,0 1,1 Flanagan, Sam. Swimmer's big gesture. Coffs Coast Advocate (2019-yil 12-iyun).
- ↑ Coffs Harbour has a new world record holder. Coffs Coast Advocate (2020-yil 3-dekabr).
- ↑ Reilly, Eliza. McTernan strikes gold for country. Gold Coast Bulletin (2020-yil 19-fevral).
- ↑ „Australian Paralympic Team for Tokyo 2021“ (en-US). The Roar. Qaraldi: 2022-yil 24-iyul.
- ↑ „Paralympics Australia Names Powerful Para-Swimming Team For Tokyo“. Paralympics Australia (2021-yil 16-iyun). 2021-yil 24-iyunda asl nusxadan arxivlangan. Qaraldi: 2021-yil 20-iyun.
- ↑ „Grant Patterson“. 2022 World Para Swimming Championships. Qaraldi: 2022-yil 27-iyun.
- ↑ „Cole, Patterson And Levy Amongst Stars Of The Pool Ready To Splash And Dash In Birmingham“. Commonwealth Games Australia (2022-yil 5-may). Qaraldi: 2022-yil 6-may.
- ↑ „2022 Commonwealth Games Results“. Commonwealth Games Australia (2020-yil 17-iyun). Qaraldi: 2022-yil 15-avgust.
- ↑ „Paralympics Australia Names Swimming Team For Paris 2024 Games“. Paralympics Australia (2024-yil 14-iyun). Qaraldi: 2024-yil 15-iyun.