Laziz Azizzoda
- Vikipediyada ismi Laziz boʻlgan boshqa kishilar haqida ham maqolalar mavjud.
| Laziz Azizzoda | |
|---|---|
| Tavalludi |
1889-yil Toshkent |
| Vafoti |
1987-yil Toshkent |
| Istiqomat joylari | Toshkent, Buxoro, Moskva |
| Fuqaroligi | Turkiston general-gubernatorligi, Turkiston ASSR, Oʻzbekiston SSR |
| Kasbi | sharqshunos |
| Sohasi | sharqshunoslik, jurnalistika |
| Ish joylari | „Buxoro axbori“ gazetasi, Toshkentdagi oliy oʻlka badiiy texnikumi, Millatlar xalq komissarligi qoshidagi oʻzbek shoʻbasi, Oʻzbekiston Fanlar akademiyasi Sharqshunoslik instituti |
| Taʼlimi | Oʻrta Osiyo davlat universiteti (hozirgi Oʻzbekiston Milliy universiteti)ning sharq fakulteti |
Laziz Azizzoda (1889, Toshkent — 1987, Toshkent) — ilmiy xodim, sharqshunos. „Milliy istiqlol“ tashkiloti faollaridan biri sifatida qatagʻon qilingan.
Tarjimayi holi
Laziz Azizzoda 1889-yilda saroybon oilasida tugʻilgan. Eski maktabni tugatib, Toshkent madrasalaridan birida tahsil olgan (1914—1917). Toshkentning Eski shahar qismidagi Rossiya Kommunistik bolsheviklar partiyasi musulmon byurosida masʼul lavozimlarda ishlagan. Soʻngra Buxoro Xalq Sovet Respublikasiga borib, „Buxoro axbori“ gazetasida muharrir oʻrinbosari va nashriyotda direktor oʻrinbosari boʻlib ishlagan (1920—1921)[1]. Soʻngra Toshkentdagi oliy oʻlka badiiy texnikumida direktor oʻrinbosari (1921-yil yozi), Millatlar xalq komissarligi qoshidagi oʻzbek shoʻbasida kotib va „Uchqun“ jurnalida tahrir hayʼati aʼzosi boʻlib ishlagan (Moskva, 1923—1924).
1924-yilda Oʻrta Osiyo davlat universiteti (hozirgi Oʻzbekiston Milliy universiteti)ning sharq fakultetiga oʻqishga kirib, bir yildan soʻng diplom olgan. 1925—1926-yillarda Ilmiy markazda ishlagan. Laziz Azizzoda shu yillarda Turkistondagi milliy istiqlol uchun boshlangan yashirin harakatda ishtirok etadi. Tarqatib yuborilgan „Milliy ittihod“ tashkiloti oʻrniga, uning tashabbusi bilan „Milliy istiqlol“ tashkiloti tuziladi (1926). 1926-yil oxirlarida Moskvaga chaqirib olinadi. Moskvaga borib, Sharq xalqlari kommunistik universitetida oʻqituvchilik qilgan, ayni vaqtda SSSR xalqlari etnik madaniyati ilmiy-tekshirish institutining aspiranturasida oʻqigan[2].
1927-yil aprelida, nomzodlik dissertatsiyasi himoya qiladigan kuni aksilinqilobchilik va millatchilik faoliyati bilan shugʻullangan yashirin tashkilotning faollaridan biri sifatida Davlat xavfsizlik boshqarmasi qamoqqa olinadi. Laziz Azizzoda sovet davlatining qatagʻon siyosati qoralangan 50-yillarda ozodlikka erishadi. Oqlanganidan soʻng uzoq muddat Oʻzbekiston Fanlar akademiyasi Sharqshunoslik institutida ilmiy xodim boʻlib xizmat qiladi[3]. Laziz Azizzoda oʻtgan asrning 30—50-yillarida yashagan davlat, jamoat va madaniyat arboblariga bagʻishlangan kitob va risolalar muallifi.
Maqolalari
- Azizzoda L. Shahar boshligʻi haqida musulmon bolsheviklarining qarori: [Toshkent shahri boshligʻi Islombek Xudoyorxonov haqida] // Ishtirokiyun. 1918-yil 16-noyabr.
- Azizzoda L. Oʻlka musulmon byurosi saylanishi munosabatida // Ishtirokiyun. 1919-yil 17-oktyabr.
- Azizzoda L. Buxoroda inqilob // Ishtirokiyun. 1920-yil 14-mart.
- Azizzoda L. Kuchimiz ortmoqda // Buxoro axbori. 1921-yil 13-mart.
- Azizzoda L. Hamma narsa bilim uchun // Buxoro axbori. 1921-yil 5-aprel.
- Azizzoda L. Behbudiy // Maorif va oʻqituvchi. 1926-yil 2-son.
Manbalar
- ↑ Karimov N. Abdulla Qodiriy zamondoshlari. Entsiklopediya. Toshkent: Akademnashr, 2019 — 26-bet.
- ↑ Tarixning nomaʼlum sahifalari: hujjat va materiallar. Birinchi kitob / toʻplovchi va masʼul muharrir N.Karimov. Toshkent: Gʻafur Gʻulom nomidagi nashriyot-matbaa ijodiy uyi, 2009 — 101-bet.
- ↑ Istoriya i istoriki Uzbekistana v XX stoletii / Otvetstvennыy redaktor D.A. Alimova. Tashkent: Navro‘z, 2014 — 344-bet.