Kyurasao
Kyurasao hududi 444 kvadrat kilometr. Poytaxti - Villems-tad shahri. Aholisi - 160 ming kishi (2018). Milliy bayrami - Mustaqillik kuni, 10-oktabr 2010-yil (Niderlandiya Antil orollaridan). Rasmiy tili - Niderland va papyamento tili. Pul birligi - gulden. Telefon kodi - +599. Vaqt birligi - UTC-4. Internet- domeni - .ap, .cw.
Boshqaruv shakli, aholisi
Konstitutsion monarxiya. 2010-yili Niderlandlar tarkibidagi Antil orollarining qayta tuzilishi natijasida Niderlandlar Qirolligi tarkibidagi federatsiya subʼekti hisoblanadi.
Papyamento (78,4%), niderland (9,5%), ispan (6,1%) va ingliz (3.5%) tillarida soʻzlashadi. Nasroniylik asosiy eʼtiqod dinidir.
Joylashuvi va tabiati
Kyurasao Karib dengizidagi kichik Antil orollari guruhidagi orol. Venesuela qirgʻoqlaridan 80 km uzoklikda joylashgan. Shamolga roʻpara orollar guruhida Margaritadan keyin kattaligi boʻyicha 2-oʻrinda turadi.
Oroldan 11 km janubi-sharqda Kichik Kyurasao joylashgan boʻlib, u ham Kyurasaoga tegishli. Shimoli-gʻarbda Sint-Kristof- felberg togʻi (372 metr) eng yuqori nuqtasidir. Yiliga 500 mm yogʻinlar yogʻadi. Orol atrofi marjon riflar bilan oʻralgan. Iqlimi - tropik, passatli. Passat shamollari oroldagi kuchli namlikni pasaytiradi. Kristoffel milliy parki Kyurasao orolidagi eng katta tabiatni muhofaza qilish hududi boʻlib, tepaliklarda joylashgan. Bu yerda oq dumli bugʻu, iguana, dengiz toshbaqasini uchratish mumkin. Kaktuslarning yuzdan ortiq turi, palma, mansaniya uchraydi.
Divi-divi daraxti Orolning milliy timsoliga aylangan.
Tarixi
Orollar 1499-yili ispaniyalik dengizchi Alonso de Oxeda tomonidan ochilgan. XVI asr boshida bu yerlar Ispaniya protektorati boʻldi va yirik flot bazasiga aylandi. Ammo bu yerga koʻchib kelganlar chuchuk suv yetmasligi sababli orolni tark etishdi. Ular oʻrnini gollandiyaliklar egalladi. 1634-yili orollar Gollandiyaning Vest-Indiya kompaniyasi nazorati ostiga oʻtdi. 1863-yili qullikning bekor qilinishi bilan Kyurasao iqtisodiy tanazzulga botdi. 1870-yillarda orolni Germaniyaga sotish boʻyicha loyiha koʻrib chiqildi. Ammo AQSh bilan munosabatlarning murakkablashuvi ehtimolidan kelib chiqib bu reja amalga oshmadi.
1916-yilda orolda neftni qayta ishlash zavodi ochildi. 1954-yili hudud yarim avtonom maqomga ega boʻldi va Niderlandiya Antil orollari deb nomlandi.
2010-yil 10-oktabrda Niderlandlar va Niderlandlar Antili oʻrtasida imzolangan bitimga koʻra, Bonayre, Sint-Estatius va Sabaga Niderlandiya avtonom hududlari maqomi berildi. Kyurasao va Sint-Marten esa Niderlandiya Qirolligi tarkibi mustaqil subyektga aylandi. Niderlandlar hukumati mudofaa va tashqi siyosat masalalarini oʻz zimmasiga oldi.
Iqtisodiyoti
1920-yildan neftni qayta ishlash tarmogʻi hisobiga iqtisodiy jadal rivojlandi.
Kyurasao bojsiz savdo hududi hisoblanadi. Hozirda iqtisodiyot asosini sayyohlik va ofshor biznesi tashkil qiladi.
Tuprogʻi unumsizligi va chuchuk suv yetishmasligi bois qishloq xoʻjaligi kam taraqqiy etgan. Asosiy savdo sheriklari - AQSh, Gvatemala, Singapur, Dominikan Respublikasi, Gaiti, Venesuela va Braziliya.
Havolalar
https://triplook.me/ru/countries/curacao-island
Manba
- ↑ Rahmatov, Laziz. Dunyo mamlakatlari: Avstraliyadan Hindistongacha. Toshkent: Yangi kitob, 2019 — 374-bet. ISBN 978-9943-5544-8-1.