Kundelik.kz
| Kundelik.kz | |
|---|---|
 | |
| Asl nomi | Күнделік.кз |
| Joriy holati | faol |
| Sayt turi | Raqamli taʼlim platformasi, elektron kundalik va jurnal |
| Qaysi tillarda | qozoqcha, ruscha |
| Ochilgan sanasi | 2016-yil |
| Mamlakat |
 Qozogʻiston |
| URL | kundelik.kz portal.kundelik.kz/v2 kundelik.kz |
Kundelik.kz (qozoqcha: Kүndelіk.kz) — Qozogʻiston boʻyicha yagona taʼlim internet-portali. Kundelik.kz tizimi davlat-xususiy sheriklik asosida joriy etilgan va xususiy investorlar mablagʻlari hisobidan moliyalashtiriladi. Hozirgi kunda tizimda 6500 dan ortiq maktab roʻyxatdan oʻtgan.
Har oy portalga 4 500 000 dan ortiq odam tashrif buyuradi, sahifalarni koʻrishlar soni esa 350 milliondan oshadi (2023-yil fevral oyidagi Yandex. Metrika maʼlumotlariga koʻra)[1].
Tarixi
2016-yilda „Dnevnik.ru“ loyihasi rahbari Gavriil Levi maʼlumotiga koʻra, Qozogʻiston hududida „Kundelik.kz“ taʼlim platformasi joriy etildi. Bugungi kunda loyiha rasmiy saytida berilgan maʼlumotlarga koʻra, ushbu platformadan 6 mingga yaqin maktab va qariyb 4 million foydalanuvchi foydalanmoqda.
„Kundelik.kz“ni texnik jihatdan Taʼlim va fan vazirligi emas, balki loyiha davlat-xususiy sheriklik doirasida ishlab chiqilgan. „Kundelik“ loyihasi bosh direktori Muxtor Iliyasovning aytishicha, investorlar yangi tizimni yaratgani uchun davlatdan umuman mablagʻ olmagan. Uning soʻzlariga koʻra, loyiha oʻzini 11 yil ichida oqlaydi. Vazirlikning ushbu loyihani qoʻllab-quvvatlab, keng joriy etishdagi asosiy maqsadi — oʻqituvchilarni qogʻozbozlikdan xalos etish va Qozogʻistonda raqamli taʼlim tizimini shakllantirishdir.
Qozogʻistondagi oʻqituvchilarning fikricha, „Kundelik.kz“ Rossiyadagi „Dnevnik.ru“ loyihasining deyarli aynan nusxasi hisoblanadi. Muxtor Iliyasov eksklyuziv intervyusida „Kundelik“ kompaniyasining bir qismi rossiyaliklarga tegishli ekanini tasdiqlagan[2].
Albatta, boshidanoq kompaniyamizni qozogʻistonlik kompaniya deb aytib kelmoqdaman. Biroq kompaniyamizning 45 foizi Rossiyaning „Dnevnik.ru“ kompaniyasiga tegishli. Yaʼni, loyihaning „yuragi“, asosini ishlab chiqqan odamlar — rossiyaliklar. Metodika, uch tildagi faoliyati, akademik baholash tizimi va darslar sonini esa biz joriy etdik. Rossiyada ushbu loyiha ustida 150 kishi ishlamoqda, shundan oʻnlab odamlar bizga yordam berish uchun ajratilgan. Qozogʻiston tomondan esa ushbu loyihada oʻn ikki kishi — hisobchi, yuristlar va operatorlar ishlamoqdamiz.
Foydalanish
Kundelik.kz tizimiga roʻyxatdan oʻtish arizasini faqat maktab taqdim eta oladi. Maktab maʼmuriyati sinfdagi oʻquvchilar soni, ularning ism-familiyasi, ota-onalarning ism-familiyasi hamda boshqa maʼlumotlarni taqdim etishi kerak.
Maktab oʻquvchilari haqidagi barcha maʼlumotlar yuborilgandan soʻng, „Kundelik“ mualliflari uni besh kun ichida tekshiradi va ariza haqiqatan ham maktab tomonidan yuborilganiga ishonch hosil qilgach, maʼlumotlarni tasdiqlab, ariza yuborgan maktabga tizim administratori uchun login va maxfiy parol yuboradi.
Tizim administratorini maktab tayinlaydi. Ushbu vazifa yuklatilgan administrator tashkilotning shaxsiy sahifasini toʻldirib, oʻquvchilar roʻyxati, oʻqituvchilar va ota-onalar haqidagi maʼlumotlarni tizimga kiritadi. Barcha maʼlumotlar bazaga kiritilgach, dars jadvali va boshqa akademik maʼlumotlar toʻldiriladi. Shundan soʻng administrator har bir sinf rahbariga oʻquvchilar va ota-onalarning maxfiy parollarini tarqatadi. Sinf rahbari esa oʻz navbatida har bir oʻquvchi va uning ota-onasiga alohida login hamda maxfiy parol beradi.
Oʻquvchi, ota-ona va oʻqituvchi login hamda maxfiy parolni olgach, saytdagi „Kirish“ tugmasini bosib platformaga kiradi. Oʻqituvchi oʻquvchiga baho qoʻyadi va uy vazifasini yozadi. Ota-ona farzandining baholarini koʻrishi, dars jadvali va uy vazifalari bilan tanishishi mumkin. Oʻquvchi esa faqat oʻz baholari, oʻqiyotgan sinfining uy vazifalari va dars jadvalini koʻrish imkoniyatiga ega[2].
Manbalar