Kara Mehmet
Kara Mehmet posho – Usmoniylar imperiyasi harbiy amaldori, 1822-yilda qisqa muddat Kapudan posho lavozimini egallagan. Bu voqea Gretsiya mustaqillik urushi davrida yuz bergan.
Kara Mehmet posho ilgari artilleriya bosh qoʻmondoni boʻlgan, 1822-yil yanvar oyida Gretsiyadagi qoʻzgʻolon koʻtargan Usmoniylar garnizonlarini kuchaytirish uchun yuborilgan quruqlik qoʻshinlariga qoʻmondon etib tayinlangan. Fevral oyining oxirida esa Patra shahriga yetib kelgan[1].
Oʻsha davrda kapudan posho lavozimini egallab turgan harbiy amaldor 18-iyun kuni Konstantinos Kanaris tomonidan oʻldirilganidan, bu vaqtda Patrada boʻlgan Kara Mehmet esa uning oʻrniga bu lavozimga tayinlangan. Uni olib kelish uchun Usmoniylar floti Istanbuldan Egey dengizi orqali yuborilgan[2] va avgust boshlarida posho flot qoʻmondonligini oʻz qoʻliga olgan[3].
8-sentyabr kuni Usmoniylar floti Patradan chiqib, qamal ostida qolgan Nauplia shahri taʼminoti uchun yoʻlga chiqqan, biroq 20–25 sentyabr kunlarida boʻlib oʻtgan harbiy amaliyot muvaffaqiyatsiz yakuniga yetgan va Kara Mehmed Souda qoʻltigʻiga chekinishga majbur boʻlgan[4].
Kiklad orollaridagi natijasiz harakatlardan soʻng, Usmoniylar floti Tenedos oroli tomon yoʻl olgan. 10-noyabr kuni flot u yerda yunonlar tomonidan hujumga uchragan va oʻzining ikki qavatli kemasidan ayrilgan, bu kema Kanaris tomonidan yoqib yuborilgan. Tartibsiz holga tushgan turk floti Dardanel orqali chekinib, Istanbuldagi bazasiga qaytgan[5]
Yil oxiriga kelib, Kara Mehmet posho lavozimidan chetlatilgan va uning oʻrniga Koca Hüsrev Mehmed posho tayinlangan[6].
Manbalar
- ↑ Gordon, History of the Greek revolution, Volume 1, p 334-336
- ↑ Gordon, History of the Greek revolution, Volume 1, p 370
- ↑ Gordon, History of the Greek revolution, Volume 1, p 439
- ↑ Gordon, History of the Greek revolution, Volume 1, p 439-441
- ↑ Gordon, History of the Greek revolution, Volume 1, p 469-470
- ↑ Gordon, History of the Greek revolution, Volume 2, p 13