Kontent qismiga oʻtish
Ilova test rejimida ishlamoqda: matnlar, jumlalar va soʻzlardagi xatoliklar tez orada tahrirchilar tomonidan tuzatiladi ✦
Ilova test rejimida ishlamoqda: matnlar, jumlalar va soʻzlardagi xatoliklar tez orada tahrirchilar tomonidan tuzatiladi ✦
Ilova test rejimida ishlamoqda: matnlar, jumlalar va soʻzlardagi xatoliklar tez orada tahrirchilar tomonidan tuzatiladi ✦
Ilova test rejimida ishlamoqda: matnlar, jumlalar va soʻzlardagi xatoliklar tez orada tahrirchilar tomonidan tuzatiladi ✦
Ilova test rejimida ishlamoqda: matnlar, jumlalar va soʻzlardagi xatoliklar tez orada tahrirchilar tomonidan tuzatiladi ✦
Ilova test rejimida ishlamoqda: matnlar, jumlalar va soʻzlardagi xatoliklar tez orada tahrirchilar tomonidan tuzatiladi ✦
Ilova test rejimida ishlamoqda: matnlar, jumlalar va soʻzlardagi xatoliklar tez orada tahrirchilar tomonidan tuzatiladi ✦
Ilova test rejimida ishlamoqda: matnlar, jumlalar va soʻzlardagi xatoliklar tez orada tahrirchilar tomonidan tuzatiladi ✦
Ilova test rejimida ishlamoqda: matnlar, jumlalar va soʻzlardagi xatoliklar tez orada tahrirchilar tomonidan tuzatiladi ✦
Ilova test rejimida ishlamoqda: matnlar, jumlalar va soʻzlardagi xatoliklar tez orada tahrirchilar tomonidan tuzatiladi ✦
Ilova test rejimida ishlamoqda: matnlar, jumlalar va soʻzlardagi xatoliklar tez orada tahrirchilar tomonidan tuzatiladi ✦
Ilova test rejimida ishlamoqda: matnlar, jumlalar va soʻzlardagi xatoliklar tez orada tahrirchilar tomonidan tuzatiladi ✦

Kabob

ZiyoSfera, erkin ensiklopediya

Kabob — birinchi navbatda, goʻsht, jigar, buyrak, dumba, charvi va boshqa masalliklardan choʻgʻda pishirib tayyorlanadigan taom, keyin esa goʻshtdan qovurib tayyorlanadigan ayrim oʻzbek milliy taomlari maʼnosini anglatadi.

Etimologiyasi

Kabab soʻzi forscha boʻlib, panjara qilish va yoqish maʼnolarini bildiradi

Turlari

  • six kabob;
  • titrama kabob;
  • qozon kabob;
  • parranda kabob;
  • qiyma kabob;
  • tandir kabob;
  • pomidor kabob;
  • dumbul kabob;
  • charvi kabob;
  • loʻla kabob  va boshqa turlari bor.

Tayyorlanishi

Kabob — qoʻy goʻshtining lahm hamda dumba qismlaridan olib, har biri 10-12 g keladigan loʻnda-loʻnda boʻlaklarga boʻlinadi, unga mayda toʻgʻralgan piyoz, tuz, qalampir (murch), kashnich urugʻi, zira, uzum sirkasi (anor yoki limon suvi) aralashtiriladi. Masalliq sirlangan yoki chinni idishga solinib, bir necha soat (4 soatdan 24 soatgacha) salqin joyda saqlanadi. Soʻngra goʻsht sixga 5-6 boʻlakdan qilib oʻtkaziladi (sixning uchida yogʻ boʻlishi kerak). Sixlar koʻrada toshkoʻmir yoki pista koʻmir choʻgʻida pishiriladi. Kabobning bir tomoni qizarib pishgandan soʻng ikkinchi tomonini agʻdarish kerak. 1 kg goʻshtga 2-3 bosh piyoz, 1 choy qoshiqda tuz, 4 osh qoshiqda uzum sirkasi (yoki bir dona limon); ziravor taʼbga koʻra kerak boʻladi.

Six kabob xalq orasida shashlik deb ham ataladi. ,,Shashlik” degani qadimgi turkiy tillarda ,,sixlik” maʼnosini anglatgan, chunki ,,shish” bu six demakdir. ,,Kabob” esa qovurilish maʼnosida keladi. Yaʼni sixga ilib qovurilgan bu ovqat insoniyatning, ayniqsa, ibtidoiy chorvadorlarning eng qadimiy taomlaridan hisoblanadi. Oʻsha davrlarda six tayyorlaydigan metall boʻlmagan, albatta. Odamlar goʻsht boʻlaklarini choʻpga ilib pishirganlar. Choʻpga tizilgan goʻsht boʻlaklarini choʻgʻ ustiga gorizontal terib pishirish sira mumkin emas, chunki choʻp kuyib uzilib tushadi. Shuning uchun goʻsht ilingan yogʻoch six (shish) larni yerga vertikal qilib sanchib, shamol esgan yonbosh tomondan choʻgʻ bilan taʼsir ettirib pishirishgan. Kabobning uchiga bir boʻlak yogʻ ilish odati ham oʻshandan qolgan. Bu yogʻ erib ostidagi qator goʻsht boʻlaklariga singib borgan. Endilikda kabobning uchiga yogʻ ilish odatdangina iborat boʻlib, amaliy ahamiyati yoʻq, chunki gorizontal qilib qoʻraga terilgan kaboblarning uchidagi yogʻ goʻshtga shimilmasdan choʻgʻ ustiga oqib, alanga oladi. ,,Shish” – six ekanligi va uni yogʻochdan tayyorlanganligi ,,Qirgʻiz taomlari” kitobida batafsil bayon qilingan. Kabob uchun son va biqin goʻshtlari, dumba yogʻi olinadi va hamma vaqt bosh barmoqning birinchi boʻgʻini kattaligida toʻgʻraladi. Yaʼni buning hajmi taxminan 15-16 grammlik boʻlaklar boʻladi. Yogʻ ham xuddi shu kattalikda toʻgʻraladi. Buni bir togʻoraga solib tuz, zira, kashnich urugʻi, murch sepiladi. Piyozni mayin toʻgʻrab, yaxshilab aralashtiriladi. Yaʼni goʻshtni hovuchlab olib togʻoraga qaytarib, zarb bilan tashlayveriladi. Bunga yana mineral suvdan sevalab mijiyveriladi, toki suv, piyozning seli, tuz va ziravorlar goʻshtning bagʻriga xoʻb singib ketsin. Shundagina kabob yaxshi pishadi. Agar yangi soʻyilgan qoʻy yoki mol goʻshti boʻlsa, uni hech sirkalab oʻtirmay toʻgʻrab, tuz sepib sixga ilib pishiraverish mumkin. Agar goʻshtning oʻzi yangi boʻlsa ham, biroq shabadalanib, seli quribroq qolgan boʻlsa, u sirkalanadi. Sirkalashda ziravorlar, piyoz seli mineral suv va anor, olcha, pomidor kabi nordon sharbatlar qoʻshib ezgʻilanadi. Kabob goʻshti bagʻridagi selning qaynashi asosidagina pishadi. Sirkalashdan maqsad ham shu, agar goʻsht sellik boʻlmasa, sirti choʻgʻda tezda kuyib, qobiq olib ichiga issiq oʻtmaydi, natijada usti kuygan, ichi xom boʻlib yaxshigina masalliq isrof boʻladi. Yaxshi ezgʻilangan goʻshtni darhol sixlarga oʻtkazib pishiraverish mumkin, mijilmagan goʻshtni sevalangan sharbat va ziravorlarnisingdirish uchun salqin joyga bir necha soat olib qoʻyiladi. Sirkalash deganda, bunga sirka ham qoʻshilar ekanda, degan xulosa chiqmasligi kerak, baʼzilar xom goʻshtga sirka qoʻshib olib qoʻyishadi. Bunday qilish xato, chunki sirka (ayniqsa oq sirka) goʻsht bagʻridagi bor selni ham chiqarib yuboradi, qiyin pisha- digan, pishsa ham bemaza boʻlib qoladi. Aslida sirkani tayyor kabobning yuziga sepib isteʼmol etiladi. Shu maqsadda faqat uzum, olma va anjir sirkalaridan- gina foydalanishni maslahat beramiz. Toʻgʻrab tayyorlangan goʻsht boʻlaklarini sixning uzunligiga qarab toʻrt, olti, sakkiz boʻlakdan oʻtkaziladi va anʼanaga koʻra oxirgi boʻlagi dumbayogʻdan iborat boʻladi.

Pishirish qoidalari

a) kabobni toshkoʻmir choʻgʻida pishirish xato. Bunda tutun bilan oltingugurt va karbonat angidrid gazi ajrab chiqadi, kabob goʻshtining oralariga, jigar boʻlsa, teshikchalariga kirib qoladi. Bunday kabobni koʻp yegan kishi ogʻir dardga duchor boʻlishi mumkin;

b) toshkoʻmir choʻgʻi juda kuchli boʻladi va kabobning sirtini tez kuydirib qoʻyishi, yogʻini eritib, alanga olib yonib goʻshtni qoraytirishi mumkin. Shuning uchun sixlarni terishdan oldin choʻgʻ yuziga bir qavat qum sepgan maʼqul, shunda kabobdan tomgan yogʻ yonmaydi;

d) aslida kabobni yogʻoch koʻmirda (buni ,,pista koʻmir” deb ham atashadi) pishirish lozim. Yogʻoch koʻmir ham mevali daraxtlarning koʻmiri boʻlishi kerak. Buning uchun: oʻrik, tut, yongʻoq oʻtinlari va uzum zangi ayni muddaodir. Sababi bu oʻtinlardan ajralgan tutunning zahri kabobga urmaydi. Hech boʻlmasa, saksovul oʻtinidan foydalangan maʼqul;

e) qoʻraga terilgan six kaboblarning, avvalo, bir tomonini singdirib pishirib, soʻng ikkinchi tomoni pishiriladi;

f) kabobni bemavrid yelpiyverish ham xato hisoblanadi, chunki toʻzigan kul goʻshtga yopishaveradi;

g) goʻshtning selini oʻzida saqlab qolish uchun kabobni urvoqlagan maʼquldir. Urvoq uchun qattiq non talqoni juda qoʻl keladi. Urvoq yirikroq boʻlsa, yana soz, chunki u selni shimib goʻshtning mazasini oʻziga oladi. Shu maqsadda urvoq uchun un ishlatish xato, negaki, u kabobga tegishi bilan xamirga aylanib qoladi, koʻproq sepilgan joylari pishmay taomni, bemaza qilib Qoʻyadi. Ana shu qoidalarga toʻla amal qilib pishirilgandagina six kabob haqiqiy tansiq taom hisoblanadi. Dasturxonga tortishda har bir xoʻrandaga ikki sixdan likopga solib yoki bir necha portsiyasini birdan katta laganga tuzab yonboshiga zira-piyoz garnir kilinadi, yuziga uzum sirkasi sevalanadi. Bundan tashqari yana pomidor, bodring, rediska va turplardan garnir qilish yoki salat berish ham mumkin.

Jigar kabob

Yangi soʻyilgan qoʻy yoki molning jigarini olib kabobga toʻgʻragandek qilib 15-16 gramm loʻnda boʻlaklarga ajratiladi. Buni sixga tortib pista koʻmirda pishiriladi. Shunga eʼtibor qilish kerakki, jigar kabob ortiqcha qovurilib, qotib ketmasligi uchun biroz sirt olib seli chiqishi bilanoq dasturxonga tortiladi, yuziga tuz sepiladi. Jigar kabobni qoʻra oldidayoq issigʻida tanovul etgan maʼqul, sovub qolsa, ham taʼmi, ham shifoligi qirqiladi.  Dasturxonga jigar kabob zira-piyoz hamda yangi sabzavot garnirlari bilan tortiladi.

Buyrak kabob

Qoʻy yoki mol buyragidan yogʻini ajratib sirtidagi pardasini olib tashlab yaxshilab yuviladi. Soʻngra kabobga moʻljallab toʻgʻraladi. Toʻgʻramaga tuz, zira, kashnich urugʻi va murch sepib mayda chopilgan piyozga qorishtirib, to hidi ketguncha yaxshilab mijiladi. Bunga mineral suv yoki anor (pomidor) sharbati sevalansa ham boʻladi. Tayyor boʻlgach, toʻrt boʻlakdan sixga tortilib laxcha choʻgʻ ustida kizartirib qovuriladi. Qovurish oldidan urvoqlansa ham boʻladi. Dasturxonga tortishda har bir xoʻrandaga ikki sixdan likopchaga solinib, yuziga uzum sirkasidan sevalanadi, yoniga zira-piyoz yoki yangi sabzavotlardan garnir beriladi.

Dumba-jigar kabob

Ushbu tansiq taom jigarning shifobaxshligiga yana toʻqtutarligini orttirishga qaratilgan boʻlib, eng muhimi: jigarni yana lazzatliroq qilish, dumbaning esa yogʻliligini yumshatish, yaʼni 50 foizcha kamaytirish maqsadida qadimgi pazandalar tomonidan ijod etilgandir. Jigar bilan dumba yogʻ olinadi. Jigarni 15 garmmlik, dumbani biroz maydaroq — 10 grammli boʻlaklarga ajratiladi. Bu kabobni pishirishning ikki usuli bor. Birinchisida: sixlarga bitta boʻlak jigar va bitta yogʻ qilib olti boʻlakdan oʻtkazib bevosita oʻtga qoʻyish oldidan yuziga tuz, murch, zira va kashnich urugʻini birga qoʻshib tuyilgan murakkab ziravor sepiladi va qizartirib pishiriladi; ikkinchi usulda: toʻgʻralgan jigar bilan yogʻ yuziga oʻsha ziravorlar sepilib myasorubkadan oʻtkazilgan piyoz massasini qorishtirib mijiladi. Sixlarga terilgach, non talqon bilan urvoqlab soʻng qoʻraga teriladi. Har ikkala usulda ham choʻgʻ kuchli boʻlmasligi shart, aks holda yogʻ erib, alanga olib, kabobni qoraytirib yuboradi. SHu sababli buni pistakoʻmir (mevali daraxtlarning choʻgʻi)da pishirish tavsiya etiladi. Yoki toshkoʻmir oʻt oldirilgan boʻlsa choʻgʻ yuziga koʻmib turarli darajada qum sepib, kaboblarni qator terib yelpimasdan qovurilsa, ayni muddao boʻladi. Dasturxonga tortishda sixi bilan bir necha portsiyasini birga laganga yoki har bir xoʻrandaga ikki sixdan likopchaga solinadi, yuziga uzum yoki olma sirkasidan sevalanadi. Garniriga zira-piyoz, koʻk piyoz, rediska, bodring, pomidor, turp kabi yangi sabzavotlardan bir yoki bir necha xilidan tanlab olinadi.

Qiyma kabob

Ushbu tansiq taom bizga ozarbayjon pazandaligining taʼsirida kirib kelgan boʻlib asli nomi ,,Loʻla kabob”. ,,Loʻla”ning maʼnosi turkiy tilda ,,yumaloq yostiq” demakdir. Parhezligi uning tez hazmlanishidadir. Bayram va toʻylarda tayyorlanadi, aziz mehmon dasturxoniga qoʻyilsa, gʻoyat manzur tushadi. Bunday kabobni, albatta, yangi va yogʻliroq goʻshtdan tayyorlash zarur. Goʻshtni qiymalagichdan oʻtkaziladi. Agar qoʻy va mol goʻshtlarini aralashtirib qiyma qilinsa, yana-da mazaliroq boʻladi. Qiymaga mayin halqa qilib toʻgʻralgan piyoz qoʻshib mijilsa, ilashimliligi ortadi. Qiymaning sixga yopishqoqligi ortishi va pishganda oqib ketmasligi uchun tuxumning oqidan qoʻshiladi. Taʼmini yaxshilash uchun esa tuyilgan kashnich urugʻi, murch va tuz qoʻshib aralashtiriladi. Ana shunday hozirlangan qiymadan bir hovuch olib sixga gʻijimlab yopishtiriladi va uzunligi 8-10 sm keladigan qilib yumaloq yostiqqa (bodringga) oʻxshatib yasaladi, seli oqib ketmasligi uchun sirtini non talqonga belab olinadi. Pista koʻmirda pishiriladi. Haqiqiy ozarbayjoncha pishirish uzum zangining choʻgʻida amalga oshiriladi. Chunki uzum zangining tutuni qiyma oralariga kirsa ham bezarardir. Tayyor kabobni har bir xoʻrandaga ikki yoki toʻrt sixdan moʻljallab likopchasiga solib, yoniga zira-piyoz yoki yangi sabzavotlardan garnir qilib dasturxonga tortiladi.

Dumbul kabob

Makkajoʻxorining dumbul soʻtasidan tayyorlanadi. Tozalangan soʻta 3-4 sm dan qilib kesiladi va namakobga 2-3 soat solib qoʻyiladi. Soʻng 2-3 donadan qilib sixga oʻtkaziladi va laxcha choʻgʻda pishiriladi. Kabob Oʻrta Osiyo va Yaqin Sharq, Kavkaz xalqlarining sevimli taomi hisoblanadi. Kabobni aslida chorvador xalqlar ijod etgan.

Qoʻziqorin kabob

Qoʻziqorinning noyob masalliq ekanligi aniq. Shuning uchun bu kabob unutilib ketgan tansiq taomdir. Bahorda qoʻziqorin paydo boʻlganida faqat bir martagina tayyorlash mumkin. Qoʻziqorinni terib kelib yongʻoqday va tuxumdaylari  saralab olinadi, kattaroqlarini esa maydalab kesiladi. Chovliga solib sovuq suvda chayqab yuborgach 1-2 minut qaynoq suvga botirib olinadi, suvi silqigach, 5-6 boʻlakdan qilib sixga oʻtkaziladi, mayin, tuz va tuyilgan murch sepiladi, picha unga belab olib, qoʻradagi mevali daraxtning oʻtinidan tushgan laxcha choʻgʻ ustida jizzillatib pishiriladi. Totli boʻlishi uchun sirtiga sariyogʻ surkab turiladi. Dasturxonga tortishda toʻrt sixdan likopga solib yoniga koʻk piyoz yoki rediskadan garnir beriladi.

Pomidor kabob

Retsepti sodda, pishirilishi oson boʻlsa ham xonadonlarda kamdan-kam tayyorlanadigan bu tansik taom aholi oʻrtasida kam tarqalgan. Pomidor xomligicha koʻp isteʼmol etiladigan sabzavot, uni sixga ilib choʻgʻ ustida pishirib yeyilsa, bu ham foydaliroq, yogʻli va kuchli kalloriyali goʻsht kaboblarga garnir sifatida tortilsa ham boʻladi. Yaxshi qizargan va kattaligi tuxumday keladigan pomidorlardan tanlab olib, sovuq suvda chayqab yuborilganidan soʻng ikki donadan qilib sixga ilinadi. Pomidorlarning oʻrtasidan emas, balki ikki chetlaridan qoʻsh sixga ilinishi shart. CHunki bitta sixga ilinsa, pishgan tomoniga seli toʻplanib qolib ikkinchi, pishmagan tomoniga sira agʻdarib boʻlmaydi. Pomidor kabobni qoʻradagi uncha kuchli boʻlmagan choʻgʻda xuddi goʻsht kabob singari pishiriladi. Dasturxonga tortishda likopchaga 2 donadan solib sixi sugʻurib olinadi, yuziga mayin tuz va murch sepiladi, yonboshiga toʻgʻralgan piyoz solinadi[1].

Qozon kabob

,Kabob” ning maʼnosi ,,qovurilgan” demakdir. Binobarin, goʻshtni yoqqa solib emas, balki quruq oʻzini qizitilgan qozonga yopib qizartirib qovurishga asoslangan ushbu tansiq taom ham qadimda paydo boʻlgan tansiq taom hisoblanadi. Qoʻy goʻshtining son, peshnob, qovurga qismlaridan olib qalinligini 1-2 sm, kattaligini shapaloqdek yoki undan kichikroq qilib toʻgʻraladi. Goʻsht boʻlaklari anor yoki pomidor sharbatiga, yoki piyoz seliga botirib olinib, yuziga tuz va zira sepiladi. Qozonni obdon qizdirib, ostiga va devorlariga goʻsht boʻlaklari yopiladi, darhol togʻoracha bostirib, bugʻ chiqib ketmaydigan qilib atrofiga sochiq oʻraladi. Olovini juda sust berib 40-45 minutcha qoldirilsa, singib pishadi[2].

Tandir kabob

Maʼlumki, tandir kulolchilik boshlangan davrlarda kelib chiqqan. U faqat nongagina emas, goʻsht va boshqa masalliqlarni ham pishirishga moslashtirib ishlangan edi. Keyinchalik unda asosan non yopiladigan boʻlib ketgan. Ibtidoiy davrlarda odamlar ovchilikdan va chorvachilikdan undirgan masalliqlarini to qozon kelib chiqqunga qadar tandirda pishirganlar. Ana shunday qadimiy tansiq taomlardan biri tandir kabobdir. Bu taomni tayyorlash uchun yangi soʻyilgan qoʻy yoki soʻqim goʻshtining son qismidan olib hajmini shapaloqday qilib kesiladi. Goʻsht boʻlaklarini namakobga (1 litr issiq suvga 50 gr tuz eritiladi) 30 minutcha botirib qoʻyiladi. Soʻng olib suvi sirqitiladi. Zira, kashnich urugʻi, murchni aralashtirib tuyib elaki qilinganiga tengma-teng un qoʻshib hozirlangan ziravor urvoqqa belab olib qizitilgan tandir devorlariga yopiladi. Goʻshtning sirti qizarib singib pishgach, kafgir bilan koʻchirib olinadi. Mayda boʻlaklarga kesib, dasturxonga tortiladi.

Chet el kaboblari

  • Adana kabobi (yoki qiyma kabobi) — keng temir shish ustiga oʻrnatilgan va koʻmir ustida panjara qilingan uzun, qoʻlda qiyma goʻsht kabobi. Turkiyaning Adana shahri nomi bilan atalgan kabob odatda „issiq“ yoki achchiqdir. Anʼanaviy Adana kabobi issiq koʻmirda pishirilgan yuqori yogʻli qoʻzi goʻshti yordamida tayyorlanadi. Toʻgʻri Adana kabobi, qiyma qoʻzichoq, qizil qalampir (qalampir) va tuzda faqat uchta ingredient ishlatiladi.
  • Ali Pasha kabobi, „Ali Posho kabobi“ — filoga oʻralgan pomidor, piyoz va maydanoz qoʻshilgan kubikli qoʻzichoq.[3]
  • <b id="mwAlc">Alinazik</b> — yirtqichlardan qovurilgan maydalangan goʻsht kabobi, sarimsoq, qatiq va baqlajon qoʻshiladi.
  • <b id="mwAls">Beyti kabobi</b> — Qoʻzi yoki mol goʻshti, ziravorlangan va shish ustida panjara qilingan, koʻpincha lavashga oʻralgan va ustiga pomidor sousi va yogurt qoʻshilgan, Istanbuldagi mashhur Beyti kabobxonasiga borib taqaladi va ayniqsa Turkiyaning yirik shaharlarida mashhur.
  • Boʻston kabobi — Qoʻzi goʻshti va baqlajon goʻshti.[3]
  • Buğu kabobi — Bugʻda pishirilgan kabob — bu skovorodkada yoki sopol idishda pishiriladigan turkcha pishiriq . Goʻshtni oʻz sharbatida pishirish uchun kostryulkaning qopqogʻi muhrlangan. Taom marvarid piyoz, sarimsoq, kekik va boshqa ziravorlar bilan tayyorlanadi. Tekirdagʻda zira bilan xizmat qiladi; Izmirda mastik bilan xizmat qiladi.
  • <b id="mwAnc">Cağ kabobi</b>, 'soʻzli kabob' — qoʻzichoq kubiklari avval chogʻda (gorizontal aylanadigan tupurik), soʻngra shishda qovuriladi, soʻnggi paytlarda mashhurligi ortib borayotgan Erzurum viloyatining oʻziga xos xususiyati.
  • Ciğer kabobi, „jigar kabobi“ — odatda toʻgʻralgan piyoz, salat va non bilan isteʼmol qilinadi.
  • Çökertme kabobi — Yogurt va kartoshka bilan toʻldirilgan dana kabobi.
  • Çöp şiş, „kichik shish kabob“ — Efes yaqinidagi Selchuk va Germencikning ixtisosligi, yogʻoch shishlarda qora murch, timyan va yogʻ bilan marinadlangan pomidor va sarimsoq bilan maydalangan suyaksiz goʻsht.[4]
  • Döner kabop, turkchada „aylanadigan kabob“ boʻlib, vertikal aylanadigan tupurikda asta-sekin qovurilgan qoʻzichoq, mol goʻshti yoki tovuq goʻshtidir. Yaqin Sharq shawarma, meksikalik tacos al pastor va yunon giroslari XIX asrda Bursada ixtiro qilingan turk döner kabobidan olingan.[5] Nemis uslubidagi döner kabob sendvichi, baʼzan ingliz tilida oddiygina „kabob“ deb ataladi, 1970-yillarda Berlindagi turk muhojirlari tomonidan taqdim etilgan va Germaniya va Evropaning koʻp qismida eng mashhur olib ketiladigan taomlardan biriga aylangan. U koʻpincha turklar tomonidan sotiladi va Germaniyada turk-nemis ixtisosligi hisoblanadi.[6]
  • Hünkari kabobi, 'Sultonning kabobi' — patlıcan beğendi (baqlajon pyuresi), rayhon, timyan va dafna yaprogʻi bilan aralashtirilgan dilimlenmiş qoʻzichoq goʻshti.[3]
  • Iskender kabobi — qatiq, pomidor sousi va sariyog ' bilan xizmat qiladigan döner kabobi Bursada paydo boʻlgan. Kabob 1867 yilda Iskender afandi tomonidan ixtiro qilingan. U Cağ kabobdan ilhomlanib, uni gorizontaldan vertikalga aylantirdi.
  • İslim kabobi, bugʻda pishirilgan kabob — kungaboqar yogʻida marinadlangan baqlajon kabobining terisiz yana bir versiyasi.[3][4]
  • Qogʻit kabobi — Qogʻozga oʻralgan qoʻzichoq.[4]
  • Kuzu shish — marinadlangan sut bilan boqilgan qoʻzichoq goʻshti bilan tayyorlangan shis
  • Testi kabobi, 'sopol-koʻza kabob' — Oʻrta Anadolu va Oʻrta Gʻarbiy Qoradengiz mintaqasidagi taom boʻlib, sopol idish yoki koʻzada olovda pishirilgan goʻsht va sabzavotlar aralashmasidan iborat (testi turkchada koʻza degan maʼnoni anglatadi). Idish non xamiri yoki folga bilan yopiladi va xizmat qilishda buziladi.

Kabab koobideh (کباب کوبیده) it kūbide (کوبیده) Eronning qiyma goʻshtli kababi boʻlib, u maydalangan qoʻzichoq, mol goʻshti yoki tovuqdan tayyorlanadi, koʻpincha maydanoz va tugʻralgan piyoz bilan aralashtiriladi.

Kabab Koobideh tarkibiga quyidagilar kiradi: maydalangan goʻsht, piyoz, tuz, qalampir va ziravorlar. Ushbu mahsolotlar aralash silliq va yopishqoq holga kelguncha aralashtiriladi. Aralashmaning bir-biriga yopishishi uchun bitta tuxum qoʻshiladi. Keyin aralash shish atrofida bosiladi. Koobideh Kabab odatda 18 yoki 20 sm uzunlikda boʻladi.

Kabāb-e barg (forscha: کباب برگ‎‎) kabob forscha uslubda qoʻzichoq, tovuq yoki mol goʻshtidan mangalda pishirilgan issiq taomdir. Kabab Barg uchun asosiy kerakli masalliqlar -bu mol goʻshti, qoʻzichoq goʻshti yoki tovuq koʻkragi, piyoz va zaytun moyi filesidir

Marinad odatda yarim stakan zaytun moyi, uchta piyoz, sarimsoq, yarim choy qoshiq zaʼfaron, tuz va qora murch aralashmasidan tayyorlanadi. Bir kilogramm qoʻzichoq 4 yoki 5 sm qalinligida boʻlaklarga boʻlib olinadi . Sovutgichda bir kecha marinadlangan holatda saqlanishi va konteynerning usti yopiq boʻlishi kerak. Ertasi kuni qoʻzichoq uzun, ingichka metall shishlarga oʻraladi. keyin esa har tomoni 5-10 daqiqa davomida mangalda pishiriladi. Kabob-e Barg.

Iroq

Iraqi kebab كباب عراقي Baghdad
Anʼanaviy Iroq kabobi, qoʻzichoq goʻshtidan tayyorlangan va yogʻli tuzilishi bilan mashhur

Manbalar

  1. ↑ Mahmudov K. O‘zbek tansiq taomlari, 1989 — 35-bet. 
  2. ↑ Mahmudov K. O‘zbek tansiq taomlari, 1989 — 128-bet. 
  3. ↑ 3,0 3,1 3,2 3,3 Turkish Cookery by M.Günür ISBN 975-479-100-7
  4. ↑ 4,0 4,1 4,2 The Complete Book of Turkish Cooking, A.Algar (1985) ISBN 0-7103-0334-3
  5. ↑ Kenneth F. Kiple, Kriemhild Coneè Ornelas, eds., Cambridge World History of Food, Cambridge, 2000. ISBN 0-521-40216-6. Vol. 2, p. 1147.
  6. ↑ „Doner kebab 'inventor' Kadir Nurman dies in Berlin“. BBC. Qaraldi: 2013-yil 1-noyabr.

https://uz.wikipedia.org/wiki/Eron oshxonasi

Eron milliy oshxonasi Andoza:Cuisine of TurkeyAndoza:Cuisine of IranAndoza:African cuisineAndoza:Cuisine of the LevantAndoza:Barbecue

Andoza:Street food