Jim Thompson uyi
| Jim Thompson uyi | |
|---|---|
| |
| Joylashuvi | Pathum Van tumani, Bangkok, Tailand |
| Koordinatalari | 13°44′57″N 100°31′42″E / 13.74917°N 100.52833°E |
| Sayt | jimthompsonhouse.org |
Jim Thompson uyi markaziy Bangkokda joylashgan muzey boʻlib, amerikalik tadbirkor va meʼmor James Harrison Wilson Thompson, yoki oddiygina Jim Thompson nomi bilan tanilgan muzey loyihachisi va sobiq egasining sanʼat toʻplami saqlanadi[1]. 1959-yilda qurilgan ushbu muzey toʻrtburchak shakldagi bir ray yer maydonini (taxminan yarim akr yoki 2023,43 kvadrat metr) egallaydi[2].
Bangkokka koʻchib kelishi va 1948-yilda Thai Silk Company Ltd. kompaniyasiga asos solganidan soʻng, Thompson, oʻsha paytda gʻarbliklar orasida yaxshi maʼlum boʻlmagan Janubi-Sharqiy Osiyo sanʼatining yirik kollektoriga ham aylandi. U ularning nozik hunarmandchiligi va ifodasini yoqtirib, tarixiy budda haykallari hamda yogʻoch, mato va qogʻozga ishlangan, Budda hayoti va Vessantara Jataka afsonasini tasvirlagan anʼanaviy tay rasmlarining katta toʻplamini yaratdi. U dunyoviy sanʼat asarlarini nafaqat Tailanddan, balki Birma, Kambodja va Laosdan ham toʻpladi, bu mamlakatlarga tez-tez xarid safarlariga borib turardi. Uning toʻplamiga, shuningdek, 16–17-asrlarda Tailandga kirib kelgan oq va koʻk rangli xitoy chinnilari ham kiradi[2].
1958-yilda u oʻz meʼmorlik faoliyatining choʻqqisi boʻlgan — oʻzi yashashi va oʻz sanʼat toʻplamini namoyish etishi uchun moʻljallangan yangi uy qurilishini boshladi. Muzey olti anʼanaviy yogʻochdan qurilgan tay uslubidagi uylarning murakkab majmuasi va 1950–1960-yillarda Tailandning turli hududlaridan toʻplangan turli qadimiy tay inshootlaridan iborat boʻlishi rejalashtirilgan edi[2]. Uning uyi Bangkruaga qarama-qarshi tomonda, kompaniyasining toʻquvchilari oʻsha paytda joylashgan joyda, klong (kanal) Saen Saep boʻyida joylashgan. 19-asrga oid uylarning aksariyati Ayutthaya shahridan buzib olinib, bu yerga koʻchirib keltirilgan, eng kattasi — toʻquvchi uyi (hozirgi yashash xonasi) esa Bangkruadan olib kelingan[1].
Thompsonning 1967-yilda Malayziyada gʻoyib boʻlib qolganidan keyin, uy malika Maxa Chakri Sirindhornning qirollik homiyligi ostidagi James H. V. Thompson jamgʻarmasi tasarrufiga oʻtdi. Uy manzili: Soi Kasemsan 2, 6-uy, Rama 1 koʻchasi, Patumvan tumani, Bangkok milliy stadionidan bir blok narida joylashgan. Ekskursovodli sayohatlar mavjud[2][1].
Manbalar
- ↑ 1,0 1,1 1,2 Datta, Ranga. „Silk, secrets and splendour: Explore the enchanting Jim Thompson House Museum in Bangkok“. The Telegraph. My Kolkata (2023-yil 23-noyabr). Qaraldi: 2023-yil 4-dekabr.
- ↑ 2,0 2,1 2,2 2,3 „Thai House & Museum“. www.jimthompsonhouse.com. 2017-yil 9-noyabrda asl nusxadan arxivlangan. Qaraldi: 2016-yil 14-noyabr.
Adabiyotlar
- Lenzi, Iola. Museums of Southeast Asia. Singapore: Archipelago Press, 2004 — 200-bet. ISBN 981-4068-96-9.
Havolalar
 |
Vikiomborda „Jim Thompson uyi“ mavzusi boʻyicha mediafayllar bor. |