Issiqlik tashuvchilar

Issiqlik tashuvchilar — issiqroq jismdan sovuqroq jismga issiqlik uzatishda qoʻllaniladigan harakatlanuvchi muhit. I. t. issiqlik bilan taʼminlash, isitish, shamollatish (ventilyasiya) tizimlarida, texnologik issiqlik va b. qurilmalarda sovitish, quritish, termik ishlov berish va b. uchun xizmat qiladi. Yoqilgʻi oʻchoq (tutun) gazlari, suv, suv bugʻi, suyuq metallar (kaliy, natriy, simob), freon va b. eng keng tarqalgan I. t. hisoblanadi. I. t. issiqlikni uzatish jarayonida agregat holatini (qaynayotgan suyuqlik, kondensatlanayotgan bugʻ) oʻzgartirishi yoki bu holatni oʻzgartirmay saqlab qolishi (qaynamayotgan suyuqlik, oʻta qizdirilgan bugʻ, kondensatlanmaydigan gaz) mumkin. Birinchi holda I. t. ning temperaturasi oʻzgarmay qoladi, chunki faqat fazaviy oʻtish issiqligigina uzatiladi; ikkinchi holda esa temperatura oʻzgaradi (pasayadi yoki koʻtariladi). Yadro reaktorida I. t. ga alohida talablar qoʻyiladi.