Ismoil Saifnazarov

Ismoil Saifnazarov — Falsafa fanlari doktori (1992), professor(1994).

Hayoti va faoliyati

Ismoil Saifnazarov 1948-yil 10-iyun Toshkent viloyati Yangiyoʻl tumanida tavallud topgan.

1966-yilda Yangiyoʻl shahridagi 4-son „A.Navoiy“ nomli oʻrta maktabni bitirgan.

1971-yilda Toshkent davlat universitetini (hozirgi Oʻzbekiston Milliy Universiteti) falsafa ixtisosligi boʻyicha tugatib, Toshkent xalq xoʻjaligi institutining (hozirgi TDIU) „Falsafa“ kafedrasi assistenti lavozimida ish boshlagan.

Katta oʻqituvchi, dotsent, professor va kafedra mudiri (1990-1993; 1998-2010), institut yoshlar qoʻmitasi kotibi (1976-1979), xorijiy talabalar dekani (1979-1985), institut partiya qoʻmitasi kotibi (1985-1990), Toshkent davlat iqtisodiyot universiteti qoshidagi Respublika iqtisodiyot litseyi birinchi direktori (1993-1997), TDIU maʼnaviy-maʼrifiy masalalar boʻyicha birinchi prorektori (1997-2001), TDIU Birlashgan kasaba uyushmasi raisi (2002-2005) boʻlgan.

2015-yil 12-yanvardan boshlab TDIU „falsafa“ kafedrasi professori lavozimida mehnat qilmoqda.

Ijtimoiy-siyosiy faoliyati

Oliy Majlis Qonunchilik palatasi AKT masalalari qoʻmitasi raisi oʻrinbosari (2005-2008), Qonunchilik palatasi Spikeri oʻrinbosari (2008-2012), AKT qoʻmitasi aʼzosi (2013-2015) lavozimlarida ishlagan.

U ikki chaqiriq (2005-2009, 2010-2015) Oliy Majlis Qonunchilik palatasi deputati va Oʻzbekiston „Adolat“ SDP Siyosiy Kengashi raisi hamda partiya fraksiyasi rahbari (2008-2013) boʻlgan.

I.Saifnazarov ijtimoiy–siyosiy faoliyatining bosh mezoni — mavjud ijtimoiy ahloqiy qiyinchiliklarga qaramasdan, mehnat jamoalaridagi ulkan islohotlarni izchil davom ettirish va xususiy tadbirkorlikka yanada keng yoʻl ochib berish hisobidan mamlakatimizning barqaror taraqqiyotiga koʻmaklashishdan iborat.

Ilmiy –pedagogik faoliyati

Ismoil Saifnazarov 1983-yili nomzodlik, 1992-yilda doktorlik dissertatsiyalarini yoqlagan. 1985-yilda dotsentlik, 1994-yilda professorlik ilmiy unvonini olgan.

1983-yilda „Shaxsning har tomonlama rivojlanishida ishlab chiqarish jamoalarining roli“. („Rol proizvodstvennogo kollektiva vo vsestoronnem razvitii lichnosti“) mavzuida tayyorlagan dissertatsiya ishi uchun falsafa fanlari nomzodi ilmiy darajasiga erishgan.

Nomzodlik dissertatsiya ishi boʻyicha ilmiy rahbar, falsafa fanlari doktori, professor Abdushukurov Telman Rustamovich boʻlgan.

1992-yilda falsafa fanlari doktori ilmiy darajasiga „Zamonaviy mehnat jamoalarining ijtimoiy ahloqiy mohiyati“, (Sotsialno-nravstvennaya suщnost sovremennogo trudovogo kollektiva) mavzusidagi dissertatsiya ishi uchun erishgan.

Professor Ismoil Saifnazarov muallifligi va rahbarligida: „Filosofiya“ (rus tilida), „Ilmiy ijod metodologiyasi“ (oʻzbek va rus tillarida), „Ilmiy tadqiqot metodologiyasi“ va "Fanning falsafiy masalalari " (oʻzbek va rus tillarida), „Menejment asoslari“ (oʻzbek va rus tillarida) kabi oʻquv qoʻllanmalari nashr etilgan.

Professor I. Saifnazarov Ijtimoiy falsafa, maʼnaviyat, siyosiy madaniyat, jamiyat axborotlashuvi, boshqaruv va fan metodologiyasi sohalarida ilmiy faoliyat olib boradi. 200 dan ortiq monografiya, risola, ilmiy maqola, tezis, oʻquv-uslubiy ishlanmalar muallifi.

Xorijiy ilmiy safarlari

1997-yili AQSh

1998-yili Malayziyaning

va 2001-yil Janubiy Koreyaning Xose universitetida xalqaro loyihalarda ishtirok etgan va malaka oshirgan.

Manbalar

1. OʻzMU. — rasmiy sayti
2. TDIU (Wayback Machine saytida 2016-04-21 sanasida arxivlangan) — rasmiy sayti
3. Oʻzbekiston Respublikasi Oliy Majlisi Qonunchilik palatasi rasmiy sayti — http://www.parliament.gov.uz/ (Wayback Machine saytida 2006-08-31 sanasida arxivlangan)
4. Oʻzbekiston „Adolat“ sotsial-demokratik partiyasi rasmiy veb-sayti — http://www.adolat.uz/