Inomjon Rasulov
| Inomjon Rasulov | |
|---|---|
| Tavalludi |
1925-yil Qoʻqon, Fargʻona viloyati, Oʻzbekiston SSR, SSSR |
| Fuqaroligi |
 SSSR |
| Millati | oʻzbek |
| Mukofotlari | „Mehnatda oʻrnak koʻrsatganligi uchun“, „Shavkatli mehnati uchun“ |
Inomjon Rasulov (1925-yil, Qoʻqon, Fargʻona viloyati, Oʻzbekiston SSR, SSSR ) – oʻzbek tilshunosi, pedagog-olim, bir qancha diktant va qoidalar toʻplamlari muallifi, dotsent[1].
Hayoti
Inomjon Rasulov 1925-yili Oʻzbekiston SSR tarkibidagi Fargʻona viloyatining Qoʻqon shahrida tugʻilgan. 1933-yildan 1938-yilgacha shahardagi boshlangʻich taʼlim beradigan maktabda tahsil oldi. 1938-yildan 1940-yilgacha Qoʻqondagi qishloq xoʻjaligi tayyorlov kursida taʼlim olgan. Oliy taʼlimni esa, shahar oʻqituvchilarni tayyorlash institutida 1940-yildan 1942-yilgacha olgan. Oliygohni tamomlagach, shu yerda oʻzbek tili fani oʻqituvchisi sifatida oʻz faoliyatini boshladi.
Faoliyati
1946-yili Toshkent davlat pedagogika institutini sirtqi boʻlimi tamomlab, Oʻzbekiston SSR fanlar akademiyasiga qarashli boʻlgan til va adabiyot institutiga aspirantura taʼlim bosqichiga oʻqishga qabul qilinadi. Aspiranturaga oʻzbek professori A.Gʻulomov ilmiy rahbarligida qabul qilingan. 1951-yilda „Ulugʻ Vatan urushi yillarida oʻzbek tili leksikasi taraqqiyoti“ mavzusida nomzodlik dissertatsiyasini himoya qilgan[2]. Oradan 1 yil oʻtib, 1952-yil dotsentlik ilmiy unvonini qabul qilib olgan. Fanlar akademiyasining til va adabiyot institutining aspiranturasini bitirgach, turli yillarda Qoʻqon davlat pedagogika universitetida oʻqituvchi, dotsent, kafedra mudiri, direktorning ilmiy ishlar boʻyicha oʻrinbosari lavozimlarida faoliyat yuritdi. 1957-yilda ushbu universitet rektori etib tayinlangan. Rasulov 1952-yilgi sovet respublika ilmiy-amaliy konferensiyada „Oʻzbek tilida ilmiy-texnika terminologiyasining baʼzi masalalari“ mavzusidagi ilmiy ishi asosida bir qancha oliy taʼlim muassasalari fan darsliklariga taqriz sifatida foydalanishgan. Shu yili, „Hozirgi zamon oʻzbek tilida bir sostavli gaplar“ mavzusida doktorlik dissertatsiyasini yoqlagan. 1966-yilda Toshkent shahrida umumtaʼlim maktablaridagi oʻquvchilar uchun „Diktantlar toʻplami“ kitobi nashr etilgan. Shu yili, Oʻzbekistondagi pedagogika oliygohlari uchun „Oʻzbek tili“ fan darsligini ishlab chiqib, chop etgan.
U ilmiy faoliyatidan tashqari, ijtimoiy faoliyat bilan ham shugʻullangan. Turli yillarda Qoʻqon shahri „Bilim“ jamiyati raisi, Qoʻqon shahri sovetining xalq maorifi boʻyicha doimiy komissiya rahbari boʻlib ishlagan.
Mukofotlari
Inomjon Rasulov oʻzining ilmiy va ijtimoiy faoliyati sabab hukumat tomonidan bir qancha mukofotlar bilan mukofotlangan. „Mehnatda oʻrnak koʻrsatganligi uchun“ medali, „Shavkatli mehnati uchun“ ordenlari bilan mukofotlangan. Shu bilan birgalikda, Oʻzbekiston SSR Oliy Soveti Prezidiumining faxriy yorligʻi bilan taqdirlangan.