Imodiddin Mahmud Junabadiy
Imodiddin Mahmud Junabadiy (forscha: عمادالدین محمود جنابادی; 2-yanvar 1415 – 1450-yillar) eronlik amaldor boʻlib, moliya xodimi va vazir sifatida Temuriylar imperiyasida xizmat qilgan. Sayyid Zaynobidin Junabodiyning oʻgʻli boʻlgan, Xurosondagi Junobod shahridan chiqqan sayyid oilasiga mansub boʻlib, u yerda yer-mulklarga ham egalik qilishgan[1][2].
Otasi 1425/1426-yillarda vafot etgach, Imodiddin Shohrux (h. 1405–1447) xizmatiga kiradi va 1443-yilda uning qudratli amiri Jaloliddin Firuzshoh tomonidan Balx shahrining moliyaviy hisobchisi etib tayinlanadi. Balx noiblarining mol-mulkni oʻzlashtirishlari haqida xabar topgan Shohrux, vaziyatni tekshirish uchun Imodiddinni yashirincha tanlaydi[2].
Shohruxning oʻgʻli Muhammad Jukiy (u noiblar ishlariga kirish huquqiga ega edi) yordami bilan Imodiddin daromadlarning oʻzlashtirilishini fosh qilishga muvaffaq boʻladi va 1444-yilda bu masalani Shohruxga taqdim etadi. Shohrux 1447-yilda vafot etgach, Imodiddin uning oʻgʻli va vorisi Ulugʻbek (h. 1447–1449) xizmatiga oʻtadi va 1448-yilda nihoyat uning vaziri boʻladi. Imodiddin keyinchalik Mirzo Abdullatif (h. 1449–1450) va Abulqosim Bobur Mirzo (h. 1449–1449, 1450–1457)ning devoniy (yuqori martabali amaldorlar)laridan biri sifatida qayd etilgan. Tarixchi Sayfiddin Uqayliyning maʼlumotiga koʻra, u Abulqosim Bobur Mirzo hukmronligi davrida Mirzo Sulton Sanjar xizmatida ham boʻlgan, biroq oradan koʻp oʻtmay vafot etgan[2].
Manbalar
Adabiyotlar
- Manz, Beatrice Forbes „Iranian Elites under the Timurids“, . Trajectories of State Formation across Fifteenth-Century Islamic West-Asia. Brill, 2020 — 257–282-bet. ISBN 978-9004431300.
- Ando, Shiro (2002). "Gonābādi, ʿEmād-al-Din Moḥammad". Encyclopædia Iranica, Vol. XI, online edition, Fasc. 2. New York. 122 b. https://iranicaonline.org/articles/gonabadi-emad-al-din.
- Manz, Beatrice Forbes. Power, Politics and Religion in Timurid Iran. Cambridge University Press, 2007. ISBN 978-1-139-46284-6.