Gunafshadoshlar

Gunafshadoshlar oilasi (Violaceae ) -ikki urugʻ pallali oʻsimliklar oilasi. Tropik va subtropik mintaqalarda keng tarqalgan. Taxminan 16 turkum va 850 tur kiradi. Ular bir yillik va koʻp yillik oʻt, buta, chala buta hamda past boʻyli daraxt shaklida boʻladi. Barglari asosan butun va navbat bilan joylashgan. Gullari bitta yoki ikkitadan boʻlib, barg qoʻltigʻidan chiqadi; aktinomorf yoki zigomorf. Kosachasi va tojbarglari — 5 tadan. Pastki tojbarglarining ostki qismi pixaga aylanadi. Changchisi — 5 ta, urugʻchisi 2 — 5 ta. Tugunchasi ustki va bir uyali. Oʻzbekistonda binafsha turkumiga mansub turlari oʻsadi. Ayrim turlari bahorda ochiladigan xushmanzara oʻsimlik sifatida ekiladi.

Adabiyotlar

• OʻzME. Birinchi jild. Toshkent, 2000-yil