Georg Isayev

Georg Georginovich Isayev
Oʻzbekiston qurilish materiallari sanoati vazirining birinchi oʻrinbosari
	Mansab davri; 1989-yil 16-oktyabr – 1993-yil 27-yanvargacha
O‘zSSR qurilish materiallari sanoati vaziri
	Mansab davri; 1981-yil 21-dekabr – 1989-yil 1-yanvargacha
Hukumat boshligʻi	Narmaxonmadi Xudoyberdiyev; Gʻayrat Qodirov
Oʻtmishdoshi	Mixail Muxortov
Vorisi	Inom Iskandarov
Shaxsiy maʼlumotlari
Tavalludi	15-iyun 1934-yil; Samarqand, Oʻzbekiston SSR
Vafoti	9-yanvar 2013-yil ; (78 yoshda) ; Moskva, Rossiya
Siyosiy partiyasi	KPSS

Georg Georginovich Isayev (1934-yil 15-iyun, Samarqand — 2013-yil 9-yanvar, Moskva) — oʻzbekistonlik davlat va xoʻjalik arbobi. Oʻzbekiston Respublikasida xizmat koʻrsatgan quruvchi (1994) va Mustaqil davlatlar hamdoʻstligida xizmat koʻrsatgan energetik (2003) faxriy unvonlari sohibi.

Hayoti

Georg Georginovich Isayev 1934-yil 15-iyunda Samarqand shahrida temiryoʻl xizmatchisi Georgin Beglyarovich Isayev (1887–1958) va onkolog-shifokor Muza Aleksandrovna Xodzko (1913–2006) oilasida tugʻilgan.

Mehnat faoliyatini 1957-yilda „Lokomotiv” sport jamiyatida elektrik sifatida boshlagan. Keyinchalik muhandis, Oʻzbekiston SSR Madaniyat vazirligi gazeta-jurnal kombinati qurilishi direksiyasi boshligʻi lavozimlarida ishlagan.

1960-yilda Butunittifoq sirtqi energetika institutini tamomlagach, SSSR energetika va elektrlashtirish vazirligi tizimida ishlagan. U katta muhandis, ishlab chiqarish-texnik boʻlim boshligʻi oʻrinbosari, navbatchi muhandis, Toshkent GRES direktorining kapital qurilish boʻyicha oʻrinbosari lavozimlarida faoliyat yuritgan. 1964-yildan KPSS a’zosi boʻlgan.

1966-yilda „Oʻzbekgidroenergoqurilish” tresti tizimida ish boshlagan. Dastlab qurilayotgan korxonalar birlashgan direksiyasi boshligʻi etib tasdiqlangan. 1971–1975-yillarda „Energostroyindustriya” ishlab chiqarish birlashmasiga rahbarlik qilgan. 1975-yilda Chorvoq GES qurilishi boshqarmasiga, 1979-yilda esa „Oʻzbekgidroenergoqurilish” trestiga rahbar boʻlgan. Uning rahbarligida Oʻrta Chirchiq GESlari kaskadida faol ishlar olib borilgan: Chorvoq gidrouzeli qurilishi „a’lo” baho bilan yakunlangan (1977), Xoʻjakent GESi (1976) va Gʻazalkent GESi (1981) qurilib, foydalanishga topshirilgan.

Georg Isayev Xoʻjakent GES qurilishida
Georg Isayev 1977-yil 13-noyabrda Chorvoq GESining ochilish marosimida nutq soʻzlamoqda
Georg Isayev Chorvoq GESining ramziy kalitini Oʻzbekiston KP MQning Birinchi kotibi Sharof Rashidovga topshirmoqda

Georg Isayev Oʻzbekiston SSR Oliy Sovetining 10- va 11-chaqiriqlari deputati etib Arnasoy saylov okrugidan saylangan. 1981-yilda Toshkent viloyat partiya qoʻmitasi a’zosi boʻlgan. 1986-yildan Oʻzbekiston Kompartiyasi Markaziy Qoʻmitasi a’zoligiga nomzod boʻlgan^[1].

1981-yildan 1989-yilgacha Oʻzbekiston SSR Qurilish materiallari sanoati vaziri lavozimida ishlagan. Shundan soʻng birinchi vazir oʻrinbosari lavozimiga oʻtgan. 1993-yilda lavozimini tark etib, yana „Oʻzbekgidroenergoqurilish” trestiga, keyinchalik ochiq aksiyadorlik jamiyatiga rahbarlik qilgan.

2006-yilda mehnat faoliyatini yakunlab, nafaqaga chiqqan.

Hayotining soʻnggi yillarida oilasi bilan Moskvada yashagan. 2013-yil 9-yanvarda miokard infarktidan vafot etgan.

Sport faoliyati

Yoshligida sport bilan shugʻullangan, Samarqand kechki yoshlar sport maktabi musobaqalarida sambo va ogʻir atletika boʻyicha qatnashgan. Keyinchalik asosiy e’tiborini ogʻir atletikaga qaratgan. Oʻzbekiston SSR qishki spartakiadasida, shuningdek, „Lokomotiv” va „Nauka” sport jamiyatlari musobaqalarida ishtirok etgan. Ogʻir atletika boʻyicha sport ustasi unvoniga ega boʻlgan^[2]. 1978-yilda Oʻzbekiston SSR ogʻir atletika boʻyicha respublika toifasidagi sport hakami unvonini olgan. 1970–1992-yillarda Respublika ogʻir atletika federatsiyasi raisi lavozimida ishlagan^[3].

Oilasi

Birinchi nikohidan Muza ismli qizi boʻlgan. Ikkinchi nikohidan ikki qizi — Tatyana va Yelena tugʻilgan.

Mukofotlari va faxriy unvonlari

Oʻzbekiston

#	Mukofot/faxriy unvon	Sanasi
1	Mehnat shuhrati ordeni^[4]	26.08.2003
2	Oʻzbekiston energetikasi faxriysi	1993
3	Oʻzbekiston Respublikasida xizmat koʻrsatgan quruvchi	15.09.1994

Sovet Ittifoqi

#	Mukofot	Sanasi
1	„Mehnat Qizil bayroq“ ordeni	11.04.1978
2	„Mehnatda oʻrnak koʻrsatganlik uchun” medali	20.04.1971
3	„Jamoat tartibini saqlashdagi a’lo xizmati uchun” medali	14.11.1977
4	„Mehnat faxriysi” medali	12.03.1985

Mustaqil davlatlar hamdoʻstligi

#	Faxriy unvon	Sanasi
1	MDHda xizmat koʻrsatgan energetik^[5]	10.10.2003

Manbalar

↑ XXI съезд Коммунистической партии Узбекистана, 30 янв. – 1 февр. 1986 г.: Стеногр. отчет.. Ташкент: Узбекистон, 1987 — 304-bet.
↑ Паков А. В. Тяжёлая атлетика в Узбекистане: (ист. очерк). Ташкент: Изд-во им. Ибн Сины, 1991 — 14-bet. ISBN ISBN 5-638-00560-9.
↑ SPORT — Спортивный раздел ZiyoNET. „Тяжелая атлетика“.
↑ „Выпуск №167 (25106) | Правда Востока“.
↑ Электроэнергетический Совет Содружества Независимых Государств. Исполнительный комитет. „Список специалистов-энергетиков, которым присвоено почетное звание "Заслуженный энергетик СНГ"“.

Havolalar

Депутаты Верховного Совета Узбекской ССР: Десятый созыв. (Краткие биографические сведения). — Ташкент: Узбекистон, 1981. — 137-bet.
Острицкий Д. Г. Полвека на передовых рубежах: 50 лет тресту «Узбекгидроэнергострой». Очерки. — Ташкент: Узбекистон, 1982. — 122—125-bet, 156-bet.
Узбекская Советская Социалистическая Республика. Персональный состав (1925—1991)
Справочник по истории Коммунистической партии и Советского Союза 1898—1991

[1] XXI съезд Коммунистической партии Узбекистана, 30 янв. – 1 февр. 1986 г.: Стеногр. отчет.. Ташкент: Узбекистон, 1987 — 304-bet.

[2] Паков А. В. Тяжёлая атлетика в Узбекистане: (ист. очерк). Ташкент: Изд-во им. Ибн Сины, 1991 — 14-bet. ISBN ISBN 5-638-00560-9.

[3] SPORT — Спортивный раздел ZiyoNET. „Тяжелая атлетика“.

[4] „Выпуск №167 (25106) | Правда Востока“.

[5] Электроэнергетический Совет Содружества Независимых Государств. Исполнительный комитет. „Список специалистов-энергетиков, которым присвоено почетное звание "Заслуженный энергетик СНГ"“.

[1]

[2]

[3]

[4]

[5]