Gemagtlyutinatsiya

Gemoagglyutinatsiya (gemo... va agglyutinatsiya) — serologik reaksiya; quyilayotgan qon retsipient (qon oluvchi bemor)ning qon guruhiga mos kelmaganda, qon shaklli elementlaridan eritrotsitlarning bir-biriga yopishib, gʻo‘j boʻlib choʻkishi. Bevosita va bilvosita gemoagglyutinatsiya farq qilinadi. Bevosita G.da eritrotsitlarning yopishib qolishi unga antitelo – gemoagglyutininlarning toʻgʻridan-toʻgʻri taʼsiri tufayli roʻy beradi. Agar gemoagglyutinin va eritrotsitlar bir turdagi organizmga xos boʻlsa, izogemoagglyutinatsiya sodir boʻladi. Bu qon guruhini aniqlash va donorni toʻgʻri tanlashda qoʻl keladi. Agar yuqoridagi holat har xil turdagi organizmga xos boʻlsa, geteroagglyutinatsiya roʻy beradi, bu, asosan, ayrim infeksion kasalliklar (masalan, infeksion mononukleoz)da kuzatiladi. Bilvosita G.da tegishli antigen yoki gapten bilan ishlangan eritrotsitlar yopishib qoladi. Bu reaksiya ayrim infeksion va allergik kasalliklarda qoʻllanadi. Eritrotsitlarning gʻo‘j boʻlib yopishib qolishi viruslar taʼsirida (masalan, grippda) ham roʻy berishi mumkin. Virusli kasalliklarni aniqlashda bu reaksiyalarning oʻziga xos tomonlaridan foydalaniladi.

Adabiyotlar

• OʻzME. Birinchi jild. Toshkent, 2000-yil