Gʻulomqodir Rashidov

Rashidov Gʻulomqodir Rashidovich
Tavalludi	6-iyul 1926-yil Toshkent
Vafoti	1-avgust 2020-yil Toshkent
Millati	Oʻzbek
Dini	islom

Rashidov Gʻulomqodir Rashidovich (1926-yil, 7-iyun, Toshkent - 2020-yil, 8-yanvar. Toshkent) — tarixchi olim, Oʻzbekistonda xizmat koʻrsatgan fan arbobi (1989), tarix fanlari doktori (1966), professor (1973). Oʻrta Osiyo universitetining tarix fakultetini tugatgan (1948). Shu universitetda katta oʻqituvchi (1951—1954), Oy-bek nomidagi Oʻzbekiston xalklari tarixi muzeyining direktori (1952—1960, 1986—1992), Oʻzbekiston Fanlar akademiyasi tarix va arxeologiya institutida katta ilmiy xodim (1960—1967), Oʻzbekiston shaharlari tarixi sektorining mudiri (1967— 1986), Oʻzbekiston Fanlar akademiyasi Oʻzbekiston tarixi davlat muzeyi direktorining ilmiy ishlar boʻyicha oʻrinbosari (1992—1997). R.ning ilmiy ishlari Oʻzbekistonning XX asr 1-yarmidagi tarixi, shaharlar tarixi, shu jumladan, Toshkentning zamonaviy tarixiga bagʻishlangan.

1926-yil 6-iyulda Toshkent shahrining Beshyogʻoch dahasida tavallud topgan. 1943-yil Oʻrta Osiyo davlat universitetining tarix fakultetiga oʻqishga kirgan. Ilmiy faoliyatini 1960-yildan O’zbekiston Respublikasi Fanlar akademiyasida boshlagan. 1967-1986-yillar davomida Oʻzbekiston Respublikasi Fanlar akademiyasi Tarix institutining “Shaharlar tarixi” boʻlimi mudiri, 1960, 1986-1992-yillarda Oʻzbekiston tarixi davlat muzeyi direktori vazifasida faoliyat koʻrsatgan.

Ilmiy faoliyati davomida Oʻzbekiston shaharlarining tarixini oʻrganishga katta e'tibor berdi. 1960-1980-yillarda koʻpgina shaharlar tarixi, ularning jamiyatdagi ahamiyatiga oid ilmiy tadqiqotlar olib borildi. Uning rahbarligida Toshkent, Samarqand, Xorazm, Andijon, Qoʻqon va boshqa shaharlar tarixini oʻzida aks ettiruvchi qator ilmiy nashrlar chop etildi. Qadimgi shaharlar bilan bir qatorda XX asrda tashkil topgan shaharlar tarixi boʻyicha ham katta izlanishlar olib bordi. Olimning sa'y-harakati bilan Olmaliq, Bekobod, Chinoz, Navoiy, Boysun, Yangiyer, Guliston kabi oʻnlab yangi shaharlar tarixini yaratildi.

Oʻzining muzeydagi faoliyati davomida muzey ekspozitsiyasini takomillashtirish, muzeyshunoslikka oid ilmiy asarlar nashr etish, muzey fondlarini boyitishda alohida faollik koʻrsatdi.

Gʻulomqodir Rashidov 160 dan ortiq ilmiy nashrlar, 300 dan ortiq maqolalar chop etgan. Shuningdek, uning rahbarligida 30 dan ortiq fan doktori va nomzodlari muvaffaqiyatli himoya qildi. Oʻzining ilmiy-pedogogik faoliyati davomida Toshkent irrigatsiya va qishloq xoʻjaligini mexanizatsiyalash muxandislari instituti, Toshkent temir yoʻl transporti muhandislari institutida talabalarga Oʻzbekiston tarixidan saboq berdi.

Bugungi kunda Gʻulomqodir Rashidovning koʻplab shogirdlari uning ilmiy maktabi davomchisi sifatida faoliyat koʻrsatmoqdalar. Tarix fanlari doktori, professor, Oʻzbekistonda xizmat koʻrsatgan fan arbobi Rashidov Gʻulomqodir Rashidovich 2020-yil 1-avgust kuni 94 yoshida vafot etdi.

Manbalar

• Qadimiy va navqiron shahar, T., 1995.