Fergana turizm
Farg‘ona turistik-rekreatsion zonasi
Fargʻona viloyatida turizm salohiyatini tubdan oshirish, zamonaviy turizm va xizmat koʻrsatish infratuzilmasini barpo etish hamda yangi ish oʻrinlarini yaratish maqsadida tashkil etilgan maxsus rekreatsion hudud[1].
Turistik-rekreatsion zona Oʻzbekiston Respublikasi Prezidentining 2026-yil 12-janvardagi “Farg‘ona” turistik-rekreatsion zonasini tashkil etish chora-tadbirlari toʻgʻrisida”gi PQ-5-sonli qaroriga muvofiq tashkil etilgan[2].
Maqsadi va vazifalari
Strategik maqsad: Hududda yagona "Fargʻona turizm halqasi"ni yaratish, xorijiy va mahalliy turistlarning viloyatda qolish muddatini uzaytirish hamda tashrif buyuriladigan obʼektlar sonini kamida 2 barobarga oshirishdan iboratdir[3].
Shuningdek, hududning ekologik xavfsizligini taʼminlagan holda zamonaviy mehmonxonalar va pansionatlar tarmogʻini kengaytirish belgilangan[4].
Umumiy tavsif va boshqaruv
“Farg‘ona” turistik-rekreatsion zonasi jami 2 396 gektar maydonni qamrab oladi va u faoliyat koʻrsatish muddatini keyinchalik uzaytirish imkoniyati bilan 30 yil muddatga tashkil qilingan[5][6]. Mazkur muddat davomida ushbu hududda alohida soliq, bojxona va investitsiya rejimlari amal qiladi[2].
Zonani samarali boshqarish, investitsiya loyihalarini muvofiqlashtirish va drayver loyihalarni rivojlantirish maqsadida Davlat aktivlarini boshqarish agentligi tizimida rasman roʻyxatdan oʻtgan davlat muassasasi shaklidagi “Farg‘ona” turistik-rekreatsion zonasi direksiyasi tashkil etilgan[7]. Hozirgi kunda direksiya rahbari (direktori) lavozimida Sadafbek Xusanboyev faoliyat yuritib kelmoqda.
Asosiy hududiy tarkibi va drayver yoʻnalishlari
Turistik-rekreatsion zonaning asosiy oʻzagi va drayver loyihalari quyidagi strategik hududlarda joylashtirilgan[2]:
- Vodil agroturizm klasteri: Fargʻona tumanining Vodil hududidagi ("Sanoat" va "Hosilot" MFYlar) oʻziga xos tabiiy iqlimi va mashhur malina yetishtirish anʼanalari negizida zamonaviy agroturizm xizmatlarini yoʻlga qoʻyish. Hududda yengil konstruksiyali xizmat koʻrsatish shaxobchalari, mevalarni saqlash uchun muzlatkichlar va mahsulotlarni chuqur qayta ishlash sexlarini barpo etish rejalashtirilgan[3].
- “Shohimardon — Yordon” umummavsumiy xalqaro kurort zonasi: Togʻli hududning betakror tabiati va iqlimiy salohiyatidan foydalangan holda ziyorat turizmi, ekoturizm hamda alpinizmni rivojlantirish. Hududda dor yoʻllari (kanat), dorbozlik maydonlari, pansionatlar, ziplayn va deltaplanlar uchun maxsus ekstremal sport maydonchalari, shuningdek, piyodalar va velosiped yoʻlaklarini tashkil etish koʻzda tutilgan[2].
- “Avval” koʻngilochar turizm majmuasi: Fargʻona tumanining Avval hududida oilaviy dam olish maskanlari, zamonaviy iaʼshobchalar (restoran va kafelar), madaniy-koʻngilochar obʼektlar va xizmat koʻrsatish majmualarini barpo etish orqali infratuzilmani tubdan yangilash.
- “Chimyon” sanatoriy-kurort zonasi: Hududdagi mavjud shifobaxsh mineral suvlar va sanatoriy-sogʻlomlashtirish resurslaridan samarali foydalanish. Bu yerda tibbiyot turizmini (*medical tourism*) xalqaro standartlar darajasiga koʻtarish, zamonaviy pansionatlar va sogʻlomlashtirish maskanlarini qurish.
Investitsiyalar va moliyalashtirish
2026–2029-yillarga moʻljallangan dasturga koʻra, zonaga jami 300 million AQSh dollari qiymatidagi mahalliy va xorijiy investitsiyalarni jalb etish belgilangan[2]. Ushbu mablagʻlar hisobiga zamonaviy mehmonxonalar, dam olish maskanlari, restoranlar, Wi-Fi hududlari hamda elektromobillarni quvvatlantirish stansiyalari qurilishi koʻzda tutilgan.
Yoʻl-transport, muhandislik-kommunikatsiya va ishlab chiqarish infratuzilmasini rivojlantirish uchun Tiklanish va taraqqiyot jamgʻarmasidan 20 million AQSh dollari miqdorida kredit mablagʻlari ajratilishi belgilangan[8].
Manbalar
- ↑ „Farg‘ona turistik-rekreatsion zonasi tashkil etiladi“. Kapital.uz (13-yanvar 2026-yil). Qaraldi: 16-iyun 2026-yil.
- ↑ 2,0 2,1 2,2 2,3 2,4 Oʻzbekiston Respublikasi Prezidentining qarori. „„Farg‘ona“ turistik-rekreatsion zonasini tashkil etish chora-tadbirlari toʻgʻrisida“ PQ-5-sonli qarori“. Lex.uz (12-yanvar 2026-yil). Qaraldi: 16-iyun 2026-yil.
- ↑ 3,0 3,1 „“Fargʻona” turistik-rekreatsion zonasi tashkil etiladi“. Yuz.uz (13-yanvar 2026-yil). Qaraldi: 16-iyun 2026-yil.
- ↑ „Fargʻonada qariyb 2,4 ming gektar maydonda turistik zona tashkil qilinadi“. Vaqt.uz (13-yanvar 2026-yil). Qaraldi: 16-iyun 2026-yil.
- ↑ „В Ферганской области создадут туристическую зону площадью почти 2,4 тысячи гектаров“. Caravan-info.uz (13-yanvar 2026-yil). Qaraldi: 16-iyun 2026-yil.
- ↑ Oʻzbekiston Respublikasi Turizm qoʻmitasi. „„Farg‘ona“ turistik-rekreatsion zonasi tashkil etiladi“. Gov.uz (13-yanvar 2026-yil). Qaraldi: 16-iyun 2026-yil.
- ↑ Davlat aktivlarini boshqarish agentligi. „„Farg‘ona“ turistik-rekreatsion zonasi direksiyasi“ davlat muassasasi“. Davaktiv.uz (2026-yil). Qaraldi: 16-iyun 2026-yil.
- ↑ „Farg‘onada 2,3 ming gektardan ortiq maydonda turistik-rekreatsion zona tashkil etiladi“. Daryo.uz (13-yanvar 2026-yil). Qaraldi: 16-iyun 2026-yil.