Fakultet dekani
 |
Lavozim vazifalari
Fakultet[1] dekan[2]i fakultet dekanatining faoliyatini va xodimlarini umumiy boshqarish, fakultetda malakali mutaxassis kadrlar tayyorlashni taʼminlash, oʻquv-uslubiy, ilmiy, maʼnaviy-maʼrifiy ishlarga bevosita rahbarlik qilish, davlat taʼlim standartlari, oʻquv rejalar, oʻquv dasturlar bajarilishini taʼminlash, oʻquv mashgʻulotlarini oʻtkazish jadvallari tuzishni tashkil etish va bajarilishini nazorat qilish, talabalarning oʻzlashtirishi va davomati tekshirib borilishini, reyting nazorati olib borilishini, intizom nazoratini tashkil etish, talabalarning kursdan kursga oʻtkazish toʻgʻrisida buyruqlar loyihasini tayyorlash, talabalarga stipendiya[3] berilishi toʻgʻrisidagi taqdimnomani tayyorlash, talabalarning bitiruv malakaviy ishlarini ximoya qilishi va davlat attestasiyasida qatnashishlarini tashkil etish, iqtidorli talabalarni izlash, aniqlash va ular bilan individual, maqsadli ishlash tadbirlarini tashkil etish, ularni fanlar boʻyicha olimpiadalar, turli jamgʻarmalar[4] (jumladan xorijiy) tanlovlarida qatnashishga tayyorlash, stajyor-tadqiqotchi-izlanuvchilarni tayyorlash, professor-oʻqituvchilar malakasini oshirishi ishlarini muvofiqlashtirish, fakultet tarkibidagi taʼlim yoʻnalishlariga taalluqli darsliklar, oʻquv va uslubiy qoʻllanmalar tayyorlash ishlarini muvofiqlashtirish, boshqarish, yangi informatsion texnologiyalarni oʻquv jarayoniga keng tatbiq etilishini, professor-oʻqituvchilarning yangi informasion texnologiyalarni egallashlarini taʼminlashdan iborat. Bundan tashqari fakultet dekani fakultet Kengashini faoliyatini boshqarish, ilmiy va ilmiy uslubiy konferensiyalar, kafedralararo yigʻilishlar, fakultet professor[5]-oʻqituvchi[6]lari va talabalari ishtirokida dolzarb mavzularda (jumladan, oʻz sohasida yangiliklar va ilmiy-texnik rivojlanish masalalari, mamlakat iqtisodiy- ijtimoiy rivojlanishi masalalari va x.k.) seminarlar, muloqot (diskussiya)lar tashkil etish va oʻtkazish, oliy taʼlim muassasasining marketing xizmati bilan hamkorlikda fakultetda tayyorlanadigan mutaxassisliklar boʻyicha mavjud va istiqbol ehtiyojni oʻrganish, mutaxassislarga talabgor tashkilot, korxona, muassasalar bilan aloqalar oʻrnatish, bitiruvchilarni ishga joylashishi imkoniyatlarini tartibga solish (maqsadli shartnomalar), amaliy tavsiyalar berish, turdosh oliy va oʻrta-maxsus taʼlim muassasalari hamda ilmiy muassasalar, jumladan rivojlangan xorijiy mamlakatlar bilan hamkorlik aloqalarini oʻrnatish, fakultet miqyosida mustaqil ravishda qoʻshimcha taʼlim xizmatlari koʻrsatishni tashkil etish (oʻz hisob raqamiga ega boʻlgan alohida „Markaz“, „Kurs“ va hokazo), grantlar, investisiyalar jalb etish, bunda fakultet professor-oʻqituvchilari va talabalarining faol ishtirokini taʼminlash, talabalar turar joylarida tarbiyaviy ishlarni tashkil etish, vakolati doirasida murojaatlarni koʻrib chiqishdan iborat.
Bilishi kerak
Fakultet dekani fakultet faoliyatiga tegishli qonunlar, Vazirlar Mahkamasi[7][8]ning Qarorlari, Vazirlik[9]ning Xay’at Qarorlari, buyruqlari, rektori buyruqlarining mohiyatini bilishi, yillik va istiqbolli rejalarini bilishi kerak boʻladi.
Malaka talablari
Fakultet dekani oliy taʼlim muassasalarida boshqaruv lavozimida zarur boʻlgan kasbiy va tashkilotchilik qobiliyatlariga, taʼlim[10] sohasida rahbarlik ish tajribasi va stajiga, faoliyat turi va vakolatlari doirasida tegishli bilim va koʻnikmalarga, namunaviy shaxsiy fazilatlarga-intellekt, madaniyatli, etakchilik, ijodiy qobiliyatlar, xushmuomalalik, tashkilotchilik, tashabbuskorlik va tadbirkorlik qobiliyatlariga ega boʻlish, mas’uliyat xissi, mustaqil qaror qabul qilish va ish tutish, qatʼiy harakat qilish, muassasa strategik maqsadlariga erishishni taʼminlash xususiyatlariga ega boʻlishi kerak. Fakultet dekani bakalavr va magistrlar tayyorlash yoʻnalishlari va mutaxassisliklaridan biri boʻyicha fan doktori yoki nomzodi ilmiy darajasiga, professor yoki dotsent[11] ilmiy unvoniga ega boʻlishi, fakultet yoʻnalishi boʻyicha kamida 5 yillik samarali ish stajiga ega boʻlishi zarur.