Esma Sulton saroyi
| Esma Sulton saroyi | |
|---|---|
 | |
| Umumiy maʼlumot | |
| Turi |
Gʻisht Qayta qurish: gʻisht, poʻlat va shisha |
| Joylashuvi | Ortaköy, Istanbul, Turkiya |
| Koordinatalar | 41°02′51″N 29°01′39″E / 41.047481°N 29.02745°E |
| Oʻlchamlari | |
| Boshqa oʻlchamlari | 31.5 m × 27 m (103 ft × 89 ft) |
| Texnik holati | |
| Qavatlar soni | 3 |
| Dizayn va konstruksiya | |
| Meʼmor |
Sarkis Balyan Qayta qurish: Gökhan Avcıoğlu |
Esma Sulton saroyi (turkcha: Esma Sultan Yalısı) — Turkiyaning Istanbul shahri Ortaköy mahallasida, Bosfor boʻgʻozi boʻyida joylashgan tarixiy saroy. Dastlabki egasi Usmoniylar imperiyasi malikasi Esma Sulton sharafiga nomlangan ushbu bino qayta taʼmirdan chiqarilgan va bugungi kunda madaniyat markazi sifatida foydalanib kelinadi.
Tarixi
Uch qavatli gʻishtin imorat mashhur meʼmor Sarkis Balyan tomonidan loyihalashtirilgan va 1875-yilda Ortaköy masjidi yonida qurib bitkazilgan. Bino 1889-yilda Usmoniylar sultoni Abdulazizning qizi malika Esma Sultonga toʻy sovgʻasi sifatida taqdim etilgan.
Saroy 1915-yilgacha Usmoniylar sulolasining mulki boʻlgan. Shundan soʻng bino avval tamaki ombori, soʻngra 1920-yildan 1975-yilgacha koʻmir ombori sifatida ishlatilgan. 1975-yilda yongʻin oqibatida vayron boʻlgan[1].
Qayta qurilishi
Faqat tashqi devorlaridan iborat boʻlib qolgan bino xarobasi 1990-yillarning boshlarida Marmara Collection tomonidan sotib olingan. Meʼmorlar Haluk Sezgin va Philippe Robertning loyihasi asosida amalga oshirilgan taʼmirlash va qoʻshimcha qurilish ishlaridan soʻng saroy 2001-yilda koʻp tarmoqli tadbirlar oʻtkaziladigan maskan sifatida ochilgan. Asl holicha saqlab qolingan gʻishtin tashqi devorlar ichiga poʻlat va shishadan iborat konstruksiya oʻrnatilgan. „GAD Architecture Group“ maʼlumotlariga koʻra, meʼmor Gökhan Avcıoğlu tomonidan ishlab chiqilgan qayta loyihalashtirish ishlari 2005-yilda yakunlangan[2]. Bino bir necha qavatda joylashgan bar, restoran va tadbirlar zalini oʻz ichiga oladi[3]. Saroy 2,226 m2 (23,960 kv ft) maydonni egallovchi bogʻda joylashgan. Birinchi qavatining eni 31.5 m (103 ft), uzunligi 27 m (89 ft), balandligi esa 3.80 m (12.5 ft). Ikkinchi qavat uchinchi qavat bilan birlashtirilgan boʻlib, eni 31.5 m (103 ft), uzunligi 31 m (102 ft), balandligi 6.80 m (22.3 ft)ni tashkil qiladi[4].
„The Marmara Hotel“ mehmonxonalar tarmogʻi tomonidan turli uchrashuv va konferensiyalar oʻtkazish maskani sifatida boshqariladigan Esma Sulton saroyi tarixiy muhitdagi ziyofatlar uchun xizmat koʻrsatadi. Bogʻda 1 000 nafargacha mehmon, birinchi qavatda 180 nafar, ikkinchi 330 nafar mehmonni qabul qilish imkoniyati mavjud. Qabul marosimlari uchun bogʻda 3 000 nafargacha mehmon, birinchi qavatda 300 nafar, ikkinchi qavatda 600 nafar mehmon uchun joy mavjud[5]. Ushbu maskanda Istanbul xalqaro jaz festivali[6] hamda Istanbul xalqaro musiqa festivali konsertlari ham oʻtkaziladi[7].
Manbalar
 |
Vikiomborda „Esma Sulton saroyi“ mavzusi boʻyicha mediafayllar bor. |
- ↑ „History – Esma Sultan“. Marmara Hotels. 2016-yil 15-avgustda asl nusxadan arxivlangan. Qaraldi: 2016-yil 29-iyun.
- ↑ „GAD Architecture: Studio page, Gökhan Avcıoğlu“. GAD Architecture (2014-yil 17-oktyabr). 2015-yil 25-mayda asl nusxadan arxivlangan. Qaraldi: 2014-yil 17-oktyabr.
- ↑ „Esma Sultan Mansion“. ArchNet. 2012-yil 18-aprelda asl nusxadan arxivlangan. Qaraldi: 2008-yil 24-noyabr.
- ↑ „The Marmara Esma Sultan“. Incentive Venues and Social Programmes. 2009-yil 5-martda asl nusxadan arxivlangan. Qaraldi: 2008-yil 24-noyabr.
- ↑ „Venues - Esma Sultan“. Moneta Travel. 2009-yil 30-mayda asl nusxadan arxivlangan. Qaraldi: 2008-yil 24-noyabr.
- ↑ „Istanbul Jazz Festival“. Istanbul Tourist. 2011-yil 23-iyulda asl nusxadan arxivlangan. Qaraldi: 2008-yil 24-noyabr.
- ↑ „Istanbul Music Festival celebrating 35th year“. Cyprus Observer. 2012-yil 16-fevralda asl nusxadan arxivlangan. Qaraldi: 2008-yil 24-noyabr.