Eskishehir Sepiolit muzeyi
Eskishehir Sepiolit muzeyi (turkcha: Lyuletoshi muzeyi) — Turkiyaning Eskishehir shahri Odunpazari tumanida joylashgan qadimiy hunarmandchilik muzeyi boʻlib, unda qoʻlda yasalgan turli sepiolit (lyuletoshi) buyumlari namoyish etiladi.
Sepiolit yoki lyuletoshi yumshoq oq gil minerali boʻlib, asosan tamaki chubuklari yasashda qoʻllaniladi; bu chubuklar sepiolit chubuklar deb yuritiladi. Shaffof boʻlmagan va oqish, kulrang yoki sargʻish tusli bu mineral qazib olingan paytda yumshoq boʻladi. Biroq quyosh issiqligiga yoki iliq joyda quritilganda qotib qoladi. Shu xususiyat uning yumshoq holatda oʻyib ishlangandan keyin doimiy shakl saqlab qolishiga imkon beradi. Lyuletoshi konlari dunyoda yetakchi oʻrinlardan biri boʻlgan Eskishehir mintaqasida, odatda, yer yuzasidan 150 m (490 ft) chuqurlikkacha uchraydi[1].
Muzeyda namoyish etilayotgan buyumlar 1998-yildan beri Eskishehirda oʻtkazib kelinayotgan Xalqaro lyuletoshi festivali, lyuletoshi hunarmandchiligi tanlovlari va koʻrgazmalari chogʻida Eskishehir hokimligi tomonidan toʻplangan. 60 nafar ustaning qoʻl mehnati bilan yaratilgan qariyb 400 ta buyum Odunpazari hokimligiga topshirilgan. Muzey 2008-yilda Odunpazaridagi Kurshunli majmui ichida, oʻz turida dunyoda yagona boʻlgan muassasa sifatida Odunpazari hokimligi tomonidan tashkil etilgan[1][2].
Manbalar
- ↑ 1,0 1,1 „Lületaşı Müzesi“ (tr). Odunpazarı Belediyesi. Qaraldi: 2017-yil 14-aprel.
- ↑ „Dünyanın İlk Lületaşı Müzesi - Eskişehir Lületaşı“ (tr) (2012-yil 21-yanvar). Qaraldi: 2017-yil 14-aprel.[sayt ishlamaydi]