Eshqobil Shukur

Eshqobil Shukurov—shoir va jurnalist. Oʻzbekistonda xizmat koʻrsatgan madaniyat xodimi. Eshqobil Shukurov 1962-yil 20-iyulda Surxondaryo viloyati Qumqoʻrgʻon tumani Boymoqli qishlogʻida tugʻilgan. 1979-1984-yillarda Toshkent davlat universitetining (hozirgi Oʻzbekiston Milliy universiteti) Filologiya fakultetida tahsil olgan. 1985-1992-yillarda Oʻzbekiston televideniyesi muharriri, 1992-1994-yillarda "Saodat“ jurnalida bosh muharrir oʻrinbosari, 1994-1995-yillarda Oʻzbekiston Respublikasi Davlat matbuot qoʻmitasi bosh muharriri, 1995-2014-yillarda Oʻzbekiston milliy teleradiokompaniyasining "Yoshlar" teleradiokanali muharriri va "Oʻzbekiston" teleradiokanali bosh muharriri vazifalarida ishlagan. 2014-yildan to hozirgi kungacha "Maʼnaviy hayot“ jurnali bosh muharriri lavozimida xizmat qilmoqda. "Madaniyat va maʼrifat" telekanalida efirga uzatilgan "Bobosoʻz" koʻrsatuvini olib bormoqda va koʻrsatuv muallifi hisoblanadi. Eshqobil Shukur „Qadimgi bitiktoshlarga yozuvlar“, „Mengim momoning yoʻqlovi“ singari dastlabki sheʼrlari bilanoq tilga tushgan. Uning „Yurakni oʻrganish“, „Sochlari sumbul-sumbul“, „Tungi gullar“, „Yashil qushlar“, „Hamal ayvoni“, „Koʻz yumib koʻrganlarim“ kabi sheriy kitoblarini oʻquvchilar yaxshi biladi. Ijodkor „Koʻhna bogʻ rivoyatlari“, „Oqibat oqshomi“, „Padarkush“ kabi nasriy asarlar hamda „Ibtido xatosi“, „Naqshband“ nomli dramatik dostonlar, „Lahza siniqlari“, „Nasoyim-ul muhabbatga sayr“ turkumlari, „Dunyoning koʻchishi“, „Qoʻriqxonada“, „Pul sanayotgan odam“ kabi qissa va hikoyalar hamda „Bobosoʻz izidan“ nomli tilimiz tarixi va tadrijiga bagʻishlangan kitoblar muallifi hamdir. Eshqobil Shukur 1989-yilda Usmon Nosir nomidagi adabiy mukofoti, 2012-yilda "Oʻzbekistonda xizmat koʻrsatgan madaniyat xodimi" unvoni, 2013-yil „Eʼtirof“ mukofoti sohibi, 2016-yil „Oltin qalam“ xalqaro milliy mukofoti tanlovi gʻolibi boʻlgan. Shuningdek, serqirra ijodkor 2016-yilda Turkiyaning Istanbul shahrida boʻlib oʻtgan turkiy tilli adiblar anjumanida „Turkiy tillar sharafi“ mukofotiga hamda 2022-yil iyun oyida 14-Turkiy xalqlar sheʼriyat festivalida „Qaldirgʻoch“ sheʼri uchun Baxtiyor Vahobzoda nomidagi Ozarbayjon Respublikasi Davlat mukofotiga sazovor boʻldi.