Kontent qismiga oʻtish

Eda Erdem

ZiyoSfera, erkin ensiklopediya
Eda Erdem Dündar
Shaxsiy maʼlumotlari
Jinsi ayol
Fuqaroligi Turkiya bayrogʻi Turkiya
Tavallud sanasi 1987-yil 22-iyun (1987-06-22) (39 yosh)
Istanbul, Turkiya
Faoliyat yillari 2004–2008
2008–
Boʻyi 188 cm (6 ft 2 in)
Vazni 73 kg (161 lb)
Sport
Mamlakat Turkiya
Qaysi sport Voleybol
Pozitsiyasi Markaziy toʻsuvchi
Klubi Turkiya Fenerbahçe

Eda Erdem Dündar (turkcha: Eda Erdem; [ɛdɑː æɾ̞dæm ˈdyndɑɾ̞̊]; 1987-yil 22-iyun, Istanbul, Turkiya) — asl kelib chiqishi bosniyak millatiga mansub turk professional voleybolchisi. Hozirda Fenerbahçe hamda Turkiya ayollar milliy voleybol terma jamoasida oʻynaydi va ikkala jamoaning ham sardori hisoblanadi. Eda Erdem 2008-yildan beri Fenerbahçe safida toʻp surib keladi[1].

Terma jamoadagi oʻyini
Gʻalaba onlari

Faoliyati

Eda Erdem oʻz faoliyatini 2000-yilda “Beşiktaş” yoshlar akademiyasida boshlagan. Iste’dodi tez orada namoyon boʻlgach, 2004-yilda asosiy tarkibga qabul qilingan. “Beşiktaş” safida toʻrt mavsum davomida oʻynab, oxirgi ikki mavsumida jamoa sardori sifatida maydonga tushgan. 2008-yilda esa Eda Erdem faoliyatidagi muhim qadamni tashlab, nufuzli Fenerbahçe klubiga oʻtadi.

“Fenerbahçe” bilan 2008–2009-yilgi mavsumda klub tarixidagi ilk professional liga chempionligini qoʻlga kiritdi. Shundan soʻng ketma-ket uch mavsum — 2008–2009, 2009–2010 va 2010–2011-yillarda chempion boʻldi[2].

Qatarning Doha shahrida Eda Erdem 2010 FIVB voleybol boʻyicha ayollar klublari oʻrtasidagi Jahon chempionatida “Fenerbahçe” safida gʻalaba qozonib, “Eng yaxshi toʻp uzatuvchi (server)” mukofotiga sazovor boʻldi[3].

Ozarbayjonning Boku shahrida 2011–2012-yilgi ayollar klublari oʻrtasidagi CEV Chempionlar ligasida “Fenerbahçe” bilan oltin medalni qoʻlga kiritdi[4].

2012-yilda Qatarning Doha shahrida oʻtkazilgan FIVB voleybol boʻyicha ayollar klublari oʻrtasidagi jahon chempionatida jamoasiga Puerto-Rikoning Lancheras de Cataño klubini 3–0 hisobida magʻlub etib, bronza medalini qoʻlga kiritishda yordam berdi[5]. 2021 FIVB voleybol boʻyicha ayollar klublari oʻrtasidagi jahon chempionatida ham bronza medalini qoʻlga kiritdi.

Italiyaning Montichiari shahrida oʻtkazilgan 2015–2016-yilgi CEV ayollar chempionlar ligasida Rossiyaning Dinamo Qozon klubini 3–1 hisobida magʻlub etib, bronza medalini qoʻlga kiritdi va “Eng yaxshi markaziy toʻsuvchi” unvoniga sazovor boʻldi. Shuningdek, 2009–2010-yilgi CEV CEV ayollar chempionlar ligasida kumush medal, 2018–2019, 2021–2022, 2022–2023 va 2023–2024-yillarda bronza medallarini qoʻlga kiritdi.

Xalqaro miqyosda

Eda Erdem 2005-yildan beri Turkiya Ayollar Milliy Voleybol Terma jamoasi safida 300 dan ortiq oʻyinda maydonga tushgan.

2010-yilda Voleybol boʻyicha ayollar oʻrtasidagi Yevropa chempionatida “Eng yaxshi toʻsuvchi” unvonini qo‘lga kiritgan, 2011-yilgi Voleybol boʻyicha ayollar oʻrtasidagi Yevropa chempionatida esa “Eng yaxshi toʻp uzatuvchi” mukofotiga sazovor boʻlgan[6].

Shuningdek, 2015, 2017, 2019 va 2021-yillardagi Yevropa chempionatlarida, hamda 2018 va 2021-yillardagi FIVB Ayollar voleybol klublari Millatlar ligasida “Eng yaxshi markaziy toʻsuvchi” unvonini qoʻlga kiritgan.

2024-yil 9-iyul kuni Parij 2024-yilgi Yozgi Olimpiada oʻyinlari uchun “Filenin Sultanları” terma jamoasining tarkibi e’lon qilindi va Eda Erdem o‘zining uchinchi Olimpiadasida jamoa sardori sifatida qatnashishi ma’lum bo‘ldi[7].

Shaxsiy hayoti

U 2011-yil Erdem Dündar bilan turmush qurgan. Erining ismi „Erdem“ bo‘lib, bu Eda Erdemning qizlik familiyasi bilan bir xil. Shu sababli u ikkala familiyani ham birgalikda, yaʼni “Erdem Dündar” tarzida ishlatadi. Shuningdek, futbolkasida ham erining ismi va familiyasini yozib chiqadi[8].

Bundan tashqari Eda Ergem dengizchilik guvohnomasiga ham ega boʻlib, kema kapitani hisoblanadi[9].

Kortdan tashqarida

Maydondan tashqarida ham Eda Erdem oʻz tajribasi bilan yosh sportchilar uchun oʻrnakka aylangan. Voleyboldan tashqari ijtimoiy loyihalarda ham faol qatnashadi. Shunday loyihalardan biri — qizlarni sport bilan shugʻullanishga undash tashabbusi hisoblanadi[10].

2022-yil 30-mart kuni Turkiya Milliy Olimpiya Qoʻmitasi qoshidagi Sportchilar komissiyasi raisi etib saylangan[11][12] .

2024-yil 8-mart kuni Fenerbahçe sport klubi Xalqaro xotin-qizlar kuni munosabati bilan “Yosh qizlar va barcha muvaffaqiyatli ayollar timsoli” haykalining ochilish marosimini oʻtkazdi[13][14]. Haykal Istanbuldagi Şükrü Saraçoğlu stadionining oldida joylashgan boʻlib, klubning boshqa mashhur shaxslari — Turkiya Respublikasi asoschisi Mustafa Kemal Atatürk, klub futbol jamoasining isteʼdodli futbolchilari Lefter Küçükandonyadis va Alexsandro de Souza, shuningdek futbol va basketbolda mashhur boʻlgan Can Bartu haykallari yonida oʻrnatilgan[15].

2024-yil 26-mart kuni u AQShning “Xalqaro Jasur Ayollar” mukofotiga nomzod sifatida ko‘rsatildi. Bu mukofot uning yutuqlari va ayollarni qo‘llab-quvvatlash borasidagi ishlariga e’tirof sifatida berildi[16].

Shu bilan birga, Turkiya Milliy Olimpiya Qoʻmitasi tashabbusi bilan amalga oshirilayotgan “Sport orqali qizlarni ragʻbatlantirish” loyihasining yuziga aylandi[17].

Manbalar

  1. ↑ „Player Profile“. fenerbahce.org.
  2. ↑ „Eda Erdem Dündar: A Volleyball Legend Dominating the Court“. onedio.co. Qaraldi: 9-avgust 2025-yil.
  3. ↑ FIVB. „Fenerbahce crowned Women's Club World champions“. Qaraldi: 2010-yil 21-dekabr.
  4. ↑ „Fenerbahce and a Korean star named Kim shine in Baku“. www.cev.lu. 2012-yil 28-aprelda asl nusxadan arxivlangan. Qaraldi: 2017-yil 21-noyabr.
  5. ↑ „Fenerbahce defeat Lancheras for women's bronze medal“. Doha, Qatar: FIVB (2012-yil 19-oktyabr). Qaraldi: 2012-yil 19-oktyabr.
  6. ↑ CEV. „Serbia claims third consecutive crown“ (2011-yil 15-iyul). 2011-yil 22-iyulda asl nusxadan arxivlangan. Qaraldi: 2011-yil 16-iyul.
  7. ↑ CEV. „Eda Erdem to captain Team Türkiye in third Olympic appearance“ (2024-yil 9-iyul). Qaraldi: 2024-yil 6-noyabr.
  8. ↑ „Hem Voleybolun Hem Eşinin Kraliçesi: Filenin Sultanları'nın Biricik Kaptanı Eda Erdem'in Hikayesi Kalp Eritti!“. Onedio.com (2024-yil 8-avgust). Qaraldi: 2024-yil 5-noyabr.
  9. ↑ „Eda Erdem: Captain of All Trades“. FIVB.com (2021-yil 4-fevral). Qaraldi: 2024-yil 6-noyabr.
  10. ↑ „Changing the Game: Record number of women athletes from Türkiye to compete in Paris 2024 Olympics“. unwomen.org (2024-yil 26-iyul). Qaraldi: 2024-yil 6-noyabr.
  11. ↑ „Gold medal-winning volleyball player takes part in Turkish Olympic Committee female empowerment programme“. insidegames.biz (2023-yil 27-iyul).
  12. ↑ „Turkish Olympic Committee Athletes' Commission helps prepare Olympians for career transition“. eurolympic.org (2023-yil 14-fevral).
  13. ↑ „Unveiling Ceremony of Eda Erdem's Monument Took Place Today On The Women's Day“. CEV (2024-yil 8-mart).
  14. ↑ „EFSANE VOLEYBOLCUMUZ EDA ERDEM DÜNDAR'IN HEYKELİNİN AÇILIŞI YAPILDI“. Fenerbahçe SK (2024-yil 8-mart).
  15. ↑ „Fenerbahçe'nin efsane futbolcularının heykelleri yer değiştirdi“. haberler.com (2024-yil 14-aprel).
  16. ↑ „Eda Erdem'e Büyük Onur: Kaptanımız, ABD'nin "Uluslararası Cesur Kadınlar" ödülüne aday gösterildi“. Fenerbahçe SK (2024-yil 26-mart).
  17. ↑ „"Empowering Girls Through Sport Project" in Turkiye“. CIJM (2023-yil 14-iyun). Qaraldi: 2024-yil 6-noyabr.

Havolalar

Vikiomborda „Eda Erdem“ mavzusi boʻyicha mediafayllar bor. 
"https://ziyosfera.uz/index.php?title=Eda_Erdem&oldid=409886" dan olindi