eMaktab.uz
| eMaktab.uz | |
|---|---|
| Fayl:EMaktab platformasi logotipi.png | |
| Tijoratmi | Ha |
| Sayt turi | Raqamli taʼlim platformasi |
| Roʻyxatdan oʻtish | Pullik (obuna asosida) |
| Roʻyxatdan oʻtgan foydalanuvchilar soni | 3 milliondan ortiq |
| Qaysi tillarda | Oʻzbek |
| Muassisi | „Kundalik“ MCHJ[1] |
| Bosh ijrochi direktor | Behzod Azimov |
| Ochilgan sanasi | 2019-yil |
| Joylashuv |
Toshkent,  Oʻzbekiston |
| Mamlakat |
Oʻzbekiston |
| URL | emaktab.uz |
eMaktab (2023-yilga qadar — Kundalik.com) — Oʻzbekiston umumtaʼlim maktablarida oʻqituvchilar, oʻquvchilar va ota-onalar uchun moʻljallangan raqamli taʼlim platformasi. Loyiha Oʻzbekiston Respublikasi Maktabgacha va maktab taʼlimi vazirligi bilan hamkorlikda davlat-xususiy sheriklik asosida faoliyat yuritadi.
Tarixi
2018-yil oktabr oyida Oʻzbekiston Xalq taʼlimi vazirligi va „Kundalik“ kompaniyasi oʻrtasida maktablarda elektron jurnallar va kundaliklarni joriy etish boʻyicha kelishuv imzolangan[2]. Platforma Rossiyaning „Dnevnik.ru“ tizimi asosida mahalliylashtirilgan.
2019-yil 1-apreldan boshlab Toshkent shahridagi 53 ta maktabda tajriba-sinov tariqasida ishga tushirilgan[3]. 2023-yil avgust oyida platforma nomi va domeni eMaktab.uzga oʻzgartirilgan[4].
Egaligi va boshqaruvi
„Kundalik“ MCHJ operator sifatida loyihani boshqaradi. Ochiq maʼlumotlarga koʻra, kompaniya ulushining 51 foizi Rossiyaning „Dnevnik.ru“ kompaniyasiga, 49 foizi esa Shveysariyada roʻyxatdan oʻtgan „Allied Capital Holding SA“ kompaniyasiga tegishli[5]. Kompaniya rahbari — Behzod Azimov[1].
Imkoniyatlari
Platforma quyidagi funksiyalarni taʼminlaydi:
- Elektron sinf jurnali va oʻquvchi kundaligi;
- Dars jadvali va uy vazifalarini kuzatish;
- Oʻqituvchi va ota-onalar oʻrtasida muloqot tizimi;
- Oʻquvchilarning oʻzlashtirish reytingi va statistik hisobotlar;
- Mobil ilovalar (Android va iOS platformalari uchun).
Axborot xavfsizligi
Foydalanuvchilarning shaxsiy maʼlumotlari Oʻzbekiston hududidagi „Uztelecom“ maʼlumotlar markazlarida saqlanadi. Platforma operatori maʼlumotlar xavfsizligi Oʻzbekiston Respublikasining „Shaxsiy maʼlumotlar toʻgʻrisida“gi qonuniga muvofiq himoyalanganini taʼkidlaydi[6].
Narxlar va obuna
Platformadan foydalanish obuna toʻlovi asosida amalga oshiriladi. Turli yillarda obuna narxi oʻzgarib borgan:
- 2020-yil: yiliga 9 200 soʻm;
- 2021-yil: yiliga 8 600 soʻm;
- 2022-yildan boshlab: „eMaktab“ (bazaviy) va „eMaktab PRO“ (kengaytirilgan) tariflari joriy etildi[7].
Tanqidlar
Loyiha joriy etilishi jarayonida jamoatchilik va IT-mutaxassislar tomonidan foydalanuvchilar maʼlumotlarining xorijiy kompaniya nazoratida boʻlishi, obuna toʻlovining majburiyligi hamda platformaning Rossiya texnologiyalariga bogʻliqligi borasida turli tanqidiy fikrlar bildirilgan[8].
2026-yil fevralida „Milliy tiklanish“ demokratik partiyasi deputati Umida Rahmonova eMaktab.uz sababli vazirlikni oʻqituvchilarga ortiqcha yuklama berayotganlikda tanqid qildi. Unga koʻra, ota-onalarning platformadan foydalanmasligi yoki obuna toʻlamagani uchun bevosita oʻqituvchilarning jazolanishi ularni taʼlim-tarbiya jarayonidan chalgʻitmoqda. Vazirlik bunga qatʼiy qarshi ekanini bildirsa-da, joylarda oʻqituvchilardan tushuntirish xatlari va hisobotlar talab qilish kabi bosimlar hamon davom etayotgani qayd etilgan[9].
Manbalar
- ↑ 1,0 1,1 „KUNDALIK“ mas’uliyati cheklangan jamiyati. orginfo.uz.
- ↑ „Электронные дневники и журналы внедрит российская компания“ (ru). Gazeta.uz (18-oktyabr 2018-yil). Qaraldi: 15-may 2024-yil.
- ↑ Kun.uz. „Yangi o‘quv yilidan boshlab poytaxt maktablarida Kundalik tizimi ishga tushiriladi“ (30-may 2019-yil). Qaraldi: 15-may 2024-yil.
- ↑ Daryo.uz. „“Kundalik.com” platformasi o‘z faoliyatini “emaktab.uz” sifatida davom ettiradi“ (27-avgust 2023-yil). Qaraldi: 15-may 2024-yil.
- ↑ Nurbek Alimov. „«Kundalik.com» surishtiruvi“ (25-noyabr 2020-yil). 2024-yil 15-mayda asl nusxadan arxivlangan. Qaraldi: 2024-yil 15-may.
- ↑ Yoshlar ovozi. „Kundalik.com nima?“ (7-sentyabr 2022-yil). Qaraldi: 15-may 2024-yil.
- ↑ „“Kundalik”da yangi to‘lov usullari va tarif paketlari ishga tushirildi“. OʻzA (30-avgust 2022-yil). Qaraldi: 15-may 2024-yil.
- ↑ „IT-ekspertlar: Kundalik.com xavf ostidami?“. Ozodlik radiosi (27-noyabr 2020-yil).
- ↑ „Elektron kundalik uchun o‘qituvchi javobgar qilingani sabab vazirlik keskin tanqid qilindi“. Xalq ta'lim Info (25-fevral 2026-yil).