DJ BoBo
DJ BoBo | |
|---|---|
 DJ BoBo 2024-yilgi konsert dasturida | |
| Umumiy maʼlumot | |
| Tavalludi |
Peter René Baumann[1] 1968-yil 5-yanvar Kölliken, Shveysariya |
| Janrlar | |
| Kasbi |
|
| Faoliyat yillari | 1989–hozirgacha |
| Leybllar |
|
Peter René Baumann (5-yanvar 1968-yil) shveysariyalik xonanda, qoʻshiqnavis, repper, raqqos, dublyaj aktyori va musiqa prodyuseridir. DJ BoBo taxallusi bilan tanilgan[1]. Peter butun dunyo boʻylab 14 million nusxada albom sotgan hamda 12 ta studiyaviy albom, shuningdek, oʻzining eski xit taronalarini yangicha talqinda jamlagan bir nechta terma albomlarini taqdim etgan[2]. BoBo, shuningdek, 34 ta singl chiqargan boʻlib, ularning ayrimlari nafaqat nemis tilli davlatlar xit-paradlarida, balki boshqa Yevropa mamlakatlarida ham yuqori oʻrinlarni egallagan.
Raqs musiqasi prodyuseri sifatida uning ilk katta muvaffaqiyati kuyi Rockwellning „Somebody's Watching Me“ taronasidan olingan „Somebody Dance with Me“ singli orqali kelgan[3]. BoBo „Keep on Dancing“, „Take Control“, „Everybody“, „Let the Dream Come True“, „Love Is All Around“, „Freedom“, „Pray“, „What a Feeling“ hamda „Chihuahua“ kabi singllari bilan hit-paradlardan joy olgan. Bu taronalarning deyarli barchasi ayol xonandalar vokali hamda BoBo tomonidan ijro etilgan rep parchalari uygʻunlashgan tez surʼatli Eurodance yoʻnalishidan iborat edi.
1992 va 2007-yillar oraligʻida Peterning 27 ta singli Shveysariya va Olmoniya xit-paradlarida yuqori oʻrinlarni zabt etgan. Hamda u Shveysariyaning eng koʻp albom sotgan xonandasi sifatida oʻnta „World Music Awards“ mukofotiga loyiq koʻrilgan[4]. BoBo oʻz ijodiy ishlari uchun koʻplab oltin va platina sertifikatlarini qoʻlga kiritgan hamda Yevropa (asosan Olmoniya va Shveysariya), Kanada, Osiyo va Janubiy Amerikada katta shuhrat qozongan.
Biografiyasi
1985–1991: Ilk qadamlar
Peter René Baumann 1968-yilda Shveysariyaning Kölliken shahrida italiyalik Luigi Cipriano va shveysariyalik Ruth Baumann oilasida dunyoga kelgan. Dastlab Baumann qandolatchilik va nonvoylik sohasida ishlashni maqsad qilgan[5]. Biroq, maktabni tamomlaganidan soʻng, undagi raqsga, xususan, breykdans yoʻnalishiga boʻlgan kuchli ishtiyoq tufayli nonvoylik sohasiga koʻproq vaqt ajratmagan. Koʻplab raqs tanlovlarida qatnashgan Baumann oʻzining akrobatik raqs uslubi bilan Olmoniyaning „Disco Kings“ raqs koʻrik-tanlovida kuchli oʻntalikka kirishga muvaffaq boʻlgan.
Baumann disk-jokeylik (DJ) faoliyatini 1985-yilda boshlagan. Oradan bir yil oʻtib Shveysariya DJ-lik chempionatida ikkinchi oʻrinni egallagan[3]. U Shveysariyadagi „Don Paco“ va „Hazyland“ kabi koʻplab tungi klublarda DJ sifatida ishlashni davom ettirgan. Yetarli darajada tajriba toʻplagach, u keyinchalik shaxsiy taronasini yaratishga qaror qilgan. Uning ilk singli „I Love You“ 1989-yilning oxirida eʼlon qilingan. Peter bu davrda hamon DJ sifatida faoliyat yuritardi, biroq bor eʼtiborini kelgusi mualliflik ishlariga qaratgan. 1991-yilda DJ BoBo yana ikkita singlini taqdim etgan, bular: „Ladies in the House“ va „Letʼs Groove On“. Ulardan oxirgisi biroz muvaffaqiyatliroq boʻlib, hatto uning birinchi albomiga ham kiritilmagan.
Manbalar
- ↑ 1,0 1,1 „Global Music Pulse: Switzerland“. Billboard. 19 November 1994. Qaraldi: 11 January 2017.
- ↑ „Das sind die Musik-Events 2010 in Köln“. Koeln.de. 2011-yil 16-iyulda asl nusxadan arxivlangan. Qaraldi: 2010-yil 31-oktyabr.
- ↑ 3,0 3,1 „VH1: DJ BoBo“. VH1. 2004-yil 28-oktyabrda asl nusxadan arxivlangan. Qaraldi: 2010-yil 31-oktyabr.
- ↑ „Awards“. djbobo.ch. 2013-yil 16-dekabrda asl nusxadan arxivlangan. Qaraldi: 2013-yil 17-noyabr.
- ↑ „DJ Bobo Vom Bäcker zum Popstar“ (de). 3sat.de. Qaraldi: 2010-yil 31-oktyabr.